យ៉ង់ គឹមអេង សរសើរ​ប្អូន​ស្រី ហ៊ុន សែន ដែល​លា​លែង​ពី​តំណែង ថា​ជា​​«គំរូ​​ល្អ»

កម្រណាស់ក្នុងសង្គមកម្ពុជា ដែលភាគច្រើននៃមន្រ្តីធំៗ ក្នុងក្របខណ្ឌរដ្ឋ ធ្វើការលាលែងតំណែង និង​ឋានៈ​ខ្លួន​ដោយ​ការ​ស្ម័គ្រ​ចិត្ត​នោះ។ នេះជាការសរសើរការលាលែងរបស់លោក ហ៊ុន ស៊ីណាត ពីសំណាក់លោក យ៉ង់ គឹមអេង ប្រធាន​មជ្ឈមណ្ឌល​ប្រជា​ពលរដ្ឋ ដើម្បី​ការ​អភិវឌ្ឍន៍ និងសន្តិភាព។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី០៤ ធ្នូ ២០១៤
  • កែប្រែចុងក្រោយ: December 05, 2014
  • ប្រធានបទ: តំណែង
  • អត្ថបទ: មានបញ្ហា?
  • មតិ-យោបល់

ប្រធានមជ្ឈមណ្ឌលប្រជាពលរដ្ឋ ដើម្បី​ការ​អភិវឌ្ឍន៍ និង​សន្តិភាព លោក យ៉ង់ គីមអេង បាន​បញ្ជាក់​ប្រាប់​ទស្សនាវដ្តី​មនោរម្យ.អាំងហ្វូ​ថា លោក​មាន​ការ​កោត​សរសើរ ចំពោះ​ភាព​ស្មោះ​ត្រង់​​របស់​​លោក​ស្រី ហ៊ុន ស៊ីណាត មន្ត្រី​ជាន់​ខ្ពស់​រដ្ឋា​ភិបាល និង​ជា​សាច់​ញាតិ​របស់​លោក​នាយក​រដ្ឋមន្ត្រី ហ៊ុន សែន ក្នុង​ការ​លា​លែង​ពី​តំណែង​ក្នុងជួររដ្ឋាភិបាល ដោយ​លោក​ចាត់ទុក​ថា នេះ​ជា​ការ​ទទួល​ខុស​ត្រូវ​មួយ​យ៉ាង​ធំ របស់​អ្នក​នយោបាយ។

ការថ្លែង​សរសើរ​របស់​ប្រធាន​មជ្ឈមណ្ឌល​ប្រជា​ពលរដ្ឋ ដើម្បី​ការ​អភិវឌ្ឍន៍ និង​សន្តិភាព​ខាង​លើ បានធ្វើ​ឡើង​បន្ទាប់​ពី​លោកស្រី ហ៊ុន ស៊ីណាត ប្អូន​ស្រី​បង្កើត​របស់​លោក​ ហ៊ុន សែន បាន​បញ្ចប់​តំណែង​របស់​ខ្លួន ពី​អនុ​រដ្ឋលេខាធិការ​ក្រសួង​ទំនាក់​ទំនង​ជា​មួយ​រដ្ឋសភា ព្រឹទ្ធសភា និង​អធិការ​កិច្ច កាល​ពី​ថ្ងៃ​ទី០១ ខែ​ធ្នូ ឆ្នាំ​២០១៤។ ការ​បញ្ចប់​មុខតំ​ណែង​នេះ ដោយ​យោង​តាម​ព្រះ​រាជក្រឹត្យ របស់​ព្រះ​មហាក្សត្រ​ព្រះ​ករុណា​ព្រះ​បាទ​សម្ដេច​ព្រះ​បរម​នាថ នរោត្ដម សីហមុនី បន្ទាប់​ពី​លោកស្រីបានដាក់លិខិត ជូនទៅលោកនាយករដ្ឋមន្ត្រី ហ៊ុន សែន តាម​រយៈ​លោក​ស្រី ម៉ែន សំអន ឧបនាយករដ្ឋមន្ដ្រីរដ្ឋមន្ដ្រីទំនាក់ទំនងរដ្ឋសភា ព្រឹទ្ធសភា និង​អធិការ​កិច្ច​កាល​ពី​ព្រឹក​ថ្ងៃ​ទី​០១ ខែ​ធ្នូ ឆ្នាំ​២០១៤។

កាលពីថ្ងៃទី២៧ ខែវិច្ឆិកា២០១៤ លោកស្រី បានប្រកាសលាឈប់ តាមរយៈទំព័រហ្វេសប៊ុកផ្ទាល់របស់​លោក​ស្រី។ លោកស្រីបានបង្ហាញពីអារម្មណ៍ឈឹចាប់ និងចង់បង្ហាញពីការទទួលខុសត្រូវរបស់លោកស្រី ចំពោះ​ប្រជាពលរដ្ឋក្នុងករណីដីធ្លី ជាមួយអ្នកវិនិយោគទុន ដ៏មានអំណាចម្នាក់ក្នុងប្រទេសកម្ពុជា។

ការលាឈប់ពីតំណែងនេះ ត្រូវបានលោក យ៉ង់ គីមអេង ឲ្យតម្លៃថាគួរឲ្យគោរព។ លោកបានពន្យល់ថា៖ «កាលណាគាត់ធ្វើមិនកើត គាត់លាឈប់។ តួនាទីរបស់គាត់ ដើម្បីជួយប្រជាពលរដ្ឋ បើកាលណា​គាត់​ដោះ​ស្រាយហើយ គ្មានប្រយោជន៍ និងគ្មានយុត្តិធម៌ដល់សង្គម និងប្រជាពលរដ្ឋបាន គាត់ត្រូវតែលាឈប់។ ការ​លាឈប់នេះ ជាការបញ្ជាក់ពីការទទួលខុសត្រូវរបស់គាត់មួយ យ៉ាងសំខាន់។»

លោកបន្តថា លោកពុំដែលឃើញមានមន្រ្តីរដ្ឋាភិបាលកម្ពុជាណាម្នាក់ ធ្វើបែបនេះទេ នាពេលកន្លងមក។ លោក​បន្តថា នេះចាលើកទីមួយហើយ ដែលមានមន្រ្តីក្នុងក្របខណ្ឌរដ្ឋ ធ្វើការលាលែងពីតំណែង ព្រោះតែ​មិន​អាចអនុវត្ត និងបំពេញតួនាទីរបស់ខ្លួន ក្នុងការការពារផលប្រយោជន៍សង្គម និងប្រជាពលរដ្ឋនោះ។

ប្រធានមជ្ឈមណ្ឌលនិងជាតំណាងមន្ត្រីអង្គការសង្គមស៊ីវិល បានបញ្ជាក់ទៀតថា៖ «នេះជាគំរូមួយល្អ ក្នុងការ​ដាក់សម្ពាធឲ្យមានការពិចារណា ឲ្យមានការគិតគូរ ទៅដល់ប្រមុខរដ្ឋាភិបាល ក៏ដូចជាគណរដ្ឋមន្រ្តី ថា អាច​នឹង​មានអ្នកដែលគេមិនសប្បាយចិត្ត ចំពោះបញ្ហាចាក់ស្រេះ ហើយដោះមិនចេញ ដែលជា​មូលហេតុ​ត្រូវដើរ​ចេញ។ »

លោក គឹមអេង ចាត់ទុកថា ការដើរចេញនេះមិនមែនបង្ហាញ ពីភាពខ្លាំងរបស់រដ្ឋាភិបាលទេ តែជាការបង្ហាញ​ពីភាពខ្សោយរបស់រដ្ឋាភិបាល ដែលគ្មានលទ្ធភាពក្នុងការគាំទ្រ ដោះស្រាយបញ្ហាសម្រាប់ជាតិ និងប្រជា​ ជាមួយក្រុមអ្នកមានអំណាចដទៃមួយចំនួនទៀត។ លោកថា៖ «អ្នកខ្លះដោះស្រាយមិនចេញហើយ ខំតោង​កៅអី ក្រាញននៀលនោះ ជាគំរូអាក្រក់ណាស់។ ខ្ញុំសរសើរ។ នេះជាការបង្ហាញនូវគំរូថ្មីមួយទៀត សម្រាប់​មន្រ្តីផ្សេងៗនៅកម្ពុជា។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...