បង្ហោះម៉ូតូមិនគោរពភ្លើងស្តុប បង្កគ្រោះឲ្យរបួសអ្នកដទៃ
- ដោយ: ក. សោភណ្ឌ អត្ថបទ៖ ក. សោភ័ណ្ឌ ([email protected]) - រាយការណ៍៖ ហេង វុទ្ធី - ភ្នំពេញ ថ្ងៃទី០១ ធ្នូ ២០១៤
- កែប្រែចុងក្រោយ: December 01, 2014
- ប្រធានបទ: គ្រោះថ្នាក់
- អត្ថបទ: មានបញ្ហា?
- មតិ-យោបល់
-
ករណីគ្រោះថ្នាក់ចររាចណ៍មួយ បានកើតឡើងនៅវេលាម៉ោងប្រមាណជា ១១ថ្ងៃត្រង់ ថ្ងៃទី០១ ខែធ្នូ ឆ្នាំ២០១៤នេះ នៅត្រង់ស្តុបអាងទឹកអូឡាំពិក បណ្តាលឲ្យមានរបួសស្រាលទាំងសងខាង។
សាក្សីនៅនឹងកន្លែងកើតហេតុ បានឲ្យទស្សនាវដ្ដីមនោរម្យ.អាំងហ្វូដឹងថា ហេតុការណ៍នេះបង្កឡើងដោយ ម៉ូតូសង់ឌ្រីមពណ៍ខ្មៅសេរី២០១៤ ពាក់ស្លាកលេខភ្នំពេញ CG-8542 បើកបរដោយយុវជនម្នាក់ (សុំមិនបញ្ចេញឈ្មោះ) ដែលបើកមិនគោរពភ្លើងស្តុប ក្នុងល្បឿនយ៉ាងលឿន ហើយជ្រុលទៅបុក ម៉ូតូមួយគ្រឿងទៀត ដែលកំពុងបើកបរក្នុងទិសដៅផ្ទុយគ្នា។ ម៉ូតូមួយគ្រឿងនោះ ម៉ាកឃ្លីកពណ៍ ស លាយ ខៀវ ពាក់ស្លាកលេខព្រះសីហនុ 1B-5004 បើកបរដោយ យុវតីមួយរូប បណ្តាលម៉ូតូទាំងពីរដួលបោកនៅកណ្តាលទ្រូងផ្លូវ និងម្ចាស់ម៉ូតូទាំងសងខាង រងរបួសស្រាលដូចគ្នា។
ប៉ុន្តែនៅក្នុងហេតុការណ៍នេះ ទាំងយុវជន និងយុវតីម្ចាស់ម៉ូតូទាំងពីរ បានប្រកែកគ្នានៅកណ្តាលផ្លូវ ដោយយកឈ្នះតែរៀងខ្លួន។ ភ្លាមៗនោះ នគរបាលចររាចណ៍ដែលប្រចាំការនៅចំណុចនោះ បានធ្វើអន្តរាគមន៍ ដោយបានយកម៉ូតូទាំងពីរទៅដាក់លើចិញ្ចើមថ្នល់ និងធ្វើការដោះស្រាយ ឲ្យមានការយោគយល់គ្នា។
លោកអនុសេនីយ៍ទោ សា រឿន ជានគរបាលប្រចាំការនៅគោលដៅអូឡាំពិក នោះបានប្រាប់ទស្សនាវដ្តីថា ម៉ូតូដែលបង្ករគ្រោះថ្នាក់ បានបើកក្នុងល្បឿនលឿន ហើយមិនគោរពភ្លើងស្តុប។ បន្ទាប់ពីបានបុកគ្នា យុវតីរងគ្រោះបានរងរបួសស្រាលនៅត្រង់ជើង ដោយសារតែត្រូវម៉ូតូដួលសង្កត់ពីលើ។ លោកបញ្ជាក់ថា ចំពោះករណីនេះ ភាគីទាំងសងខាងបានយល់ព្រមសម្របសម្រួលគ្នា និងបញ្ចប់រឿងនៅកន្លែងកើតហេតុ៕