ព្រះសង្ឃ លួន សុវ៉ាត សង្ឃឹមស្ថានទូតបរទេស ពេលសវនាការនៅសាលាដំបូង
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ១៨ វិច្ឆិកា ២០១៤
- កែប្រែចុងក្រោយ: November 18, 2014
- ប្រធានបទ: យុត្តិធម៌
- អត្ថបទ: មានបញ្ហា?
- មតិ-យោបល់
-
ព្រឹត្តិការណ៍បង្កឲ្យមានការចាប់អារម្មណ៍ នៅព្រឹកថ្ងៃទី ១៨ ខែវិច្ឆិកា ឆ្នាំ២០១៤នេះ ជាការដង្ហែដាក់ញត្តិ នៅតាមស្ថានទូតបរទេសសំខាន់ៗនានា ដឹកនាំដោយព្រះសង្ឃ លួន សុវ៉ាត។ ការដង្ហែញត្តិរបស់ព្រះសង្ឃអង្គនេះ បានរៀបចំឡើង បន្ទាប់ពីព្រះអង្គបានទទួលដីការ របស់ព្រះរាជអាជ្ញារង សាលាដំបូងរាជធានីភ្នំពេញ លោក មាស ច័ន្ទពិសិដ្ឋ កាលពីថ្ងៃទី២២ ខែតុលា កន្លងមក បង្គាប់ព្រះអង្គដែលល្បីព្រះនាម ខាងការទាមទារសិទ្ធិសេរីភាព ឲ្យចូលសវនាការនៅម៉ោង ៨ព្រឹក ថ្ងៃទី២៥ ខែវិច្ឆិកា ខាងមុខ។
ម្ចាស់ពានរង្វាន់សិទ្ធិមនុស្ស ពីសហគមន៍អ៊ឺរ៉ុបអង្គនេះ បានបង្ហាញជំនឿថា បណ្ដាប្រទេសនៅសហគមន៍អឺរ៉ុប ដែលបានស្គាល់ព្រះនាមរបស់ព្រះអង្គ អាចនឹងជួយជម្រុញទៅរដ្ឋាភិបាលកម្ពុជា ធ្វើយ៉ាងណាឲ្យគោរពសិទ្ធិមនុស្ស។
ព្រះសង្ឃ លួន សុវ៉ាត ដែលត្រូវបានគេស្គាល់ថា ជាសកម្មជនអ្នកការពារសិទ្ធិមនុស្សផងនោះ ត្រូវបានតុលាការក្រុងភ្នំពេញ ចោទប្រកាន់ពីបទក្បត់ជាតិ និងញុះញង់ឲ្យប្រព្រឹត្តបទឧក្រិដ្ឋ ទាំងនៅក្នុងប្រទេស និងក្រៅប្រទេស។ ប៉ុន្តែព្រះតេជគុណ លួន សុវ៉ាត បានបដិសេធបទចោទប្រកាន់ទាំងនេះ ដោយចាត់ទុកថា ជាការប្រើដាវអាជ្ញាសឹកមកចោទប្រកាន់ និងកាត់ទោសលើព្រះអង្គ រំលោភលើច្បាប់ព្រះពុទ្ធសាសនា និងច្បាប់រដ្ឋធម្មនុញ្ញកម្ពុជា។
ព្រះអង្គមានសង្ឃដីការថា សព្វថ្ងៃនេះ ព្រះអង្គមិនដែលទៅញុះញង់ ឲ្យបងប្អូនណាសម្លាប់គ្នា វាយគ្នា បាញ់គ្នានោះទេ សូម្បីតែការស្លាប់របស់បាតុករ នៅផ្លូវវេងស្រេង ស្ពានមន្នីវង្ស មុខវត្តស្ទឹងមានជ័យ ទីលានប្រជាធិបតេយ្យ មានការវាយតប់គ្នាទាំងព្រះសង្ឃ និងពុទ្ធបរិស័ទ ព្រមទាំងរឿងដីធ្លី នៅបុរីកីឡា បឹងកក់ ក៍ព្រះអង្គមិនបានទៅញុះញង់នោះដែរ។
ស្ថានទូតនានា ដែលសុទ្ធសឹងជាទិសដៅ នៃការដាក់ញត្តិរបស់ព្រះអង្គ រួមមាន ស្ថានទូតអាមេរិក អង់គ្លេស បារាំង កូរ៉េខាងត្បូង សហភាពអឺរ៉ុប អង្គការសហប្រជាជាតិ ជប៉ុន និងស្ថានទូតថៃប្រចាំនៅកម្ពុជាជាដើម។ ការដង្ហែដែលបានចាប់ផ្ដើមធ្វើ តាំងពីម៉ោង៨ព្រឹកមកនោះ បានប្រព្រឹត្តិទៅ ដោយមិនមានហេតុភេទអ្វីកើតឡើងទាំងអស់ បើទោះជាការដង្ហែនេះ ស្ថិតក្រោមក្រសែភ្នែកតាមដាន របស់ក្រុមសមត្ថកិច្ចចម្រុះនោះយ៉ាងណាក៏ដោយ។
ព្រះសង្ឃដែលតែងមានព្រះភ័ក្រ សឹងនៅគ្រប់ការតវ៉ានោះ មិនបានទទួលស្គាល់ថា នៅថ្ងៃទី ២៥ ខែវិច្ឆិកា ខាងមុខនេះ តុលាការមានសិទ្ធិនឹងធ្វើការកាត់ទោស លើព្រះអង្គនោះឡើយ។ ព្រះអង្គមានសង្ឃដីការថា៖ «អាត្មាទៅវិញទេ ដែលមានសិទ្ធិជាព្រះសង្ឃ ទៅទេសនានៅក្នុងតុលាការ»៕