ពូទីន ធ្វើទង្វើ«សុភាពបុរស» ដាក់ភរិយាប្រធានាធិបតីចិន
- ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី១២ វិច្ឆិកា ២០១៤
- កែប្រែចុងក្រោយ: November 13, 2014
- ប្រធានបទ: ជំនួបកំពូល
- អត្ថបទ: មានបញ្ហា?
- មតិ-យោបល់
-
មនុស្សតិចណាស់ដែលមិនដឹង៖ លោក វ្លាឌីមៀរ ពូទីន (Vladimir Poutine) ដែលទើបនឹងលែងលះ ពីអតីតភរិយារបស់លោក ជាសុភាពបុរសមួយរូប។ ជាក់ស្ដែង កាលពីថ្ងៃទី១០ ខែវិច្ឆិកា ក្នុងជំនួបកំពូល អេប៊ិច (Apec) នារដ្ឋធានីប៉េកាំង ខណៈពេលដែលប្រធានាធិបតីចិន លោក ស៊ី ជីនពីង (Xi Jinping) ជាស្វាមីកំពុងញញឹមញញែមទទួលភ្ញៀវ និងជជែកជាមួយប្រធានាធិបតីអាមេរិក លោក បារ៉ាក់ អូបាម៉ា (Barack Obama) ធ្វើបែបវាហីនោះ លោកប្រធានាធិបតី ពូទីន ឯណេះវិញ បានយកអាវធំរបស់លោក ដែលមានលក្ខណៈដូចជាភួយផងនោះ មកដណ្ដប់ឲ្យលោកស្រី ប៉េង លីយ័ន ស្ត្រីទីមួយនៃប្រទេសចិន។
ឈុតឆាកនេះ ត្រូវបានម៉ាស៊ីតថតរបស់ទូរទស្សន៍ ចិន ផ្លូវការ (CCTV) ចាប់រូបភាពបាន ហើយយកទៅផ្សាយ។ បន្ទាប់មក រូបភាពនេះត្រូវបានកាត់ជាបំណែកខ្លីៗ យកទៅចែកចាយពាសពេញពិភពលោក។
ទង្វើរបស់លោក ពូទីន គ្មានអ្វីក្រៅពីចង់ផ្ដល់ភាពកក់ក្ដៅ ទៅឲ្យលោកស្រី លីយ័ន ខណៈពេលដែលមានខ្យល់ត្រជាក់ បក់ចូលដល់ក្នុងបន្ទប់ប្រជុំនេះឡើយ។ ប៉ុន្តែសម្រាប់កាយវិការ នៅក្នុងចំណងការទូត និងពិធីការធំៗ រហូតដល់ថ្នាក់ប្រមុខរដ្ឋដូច្នេះ ទង្វើនេះអាចចាត់ទុកថា ជាកំហុសមួយដ៏ធំ ដែលមានលក្ខណៈទៅនឹង «ចែចង់ប្រពន្ធរបស់រដ្ឋបុរសម្នាក់ទៀត ដែលជាដៃគូរសន្ទនារបស់ខ្លួន»។
យ៉ាងណាក៏ដោយ វីដេអូត្រូវបានបែកធ្លាយ និងចែកចាយព្រោងព្រាត នៅតាមបណ្ដាញសង្គម និងប្រព័ន្ធចែកចាយវីដេអូ បង្កឲ្យមានចំណាប់អារម្មណ៍កាន់តែខ្លាំង។ ប៉ុន្តែនៅក្នុងប្រទេសចិនកុម្មុយនីសវិញ រូបភាពនេះ ត្រូវបានហាមឃាត់ និងដកចេញនូវប៉ុន្មានម៉ោងក្រោយមក ពីបណ្ដាញអ៊ិនធើណែត ជាពិសេស ពីបណ្ដាញសង្គម។
គេហទំព័រព័ត៌មានអាមេរិកាំងមួយ Foreign Policy បានរាយការណ៍ថា ប្រធានាធិបតីចិន លោក ស៊ី ជីនពីង បានធ្វើនយោបាយប្រឆាំង នឹងអំពើពុករលួយ នៅក្នុងរដ្ឋការរបស់ប្រទេសចិន។ ឆ្លងចេញពីយុទ្ធនាការនេះ មេដឹកនាំចិនរូបនេះ បានបញ្ជាឲ្យគេដកចេញ ឬលប់ចោលទាំងអស់ នូវអ្វីក៏ដោយដែលអាចប៉ះពាល់ដល់រូបភាពដ៏ស្អាតស្អំ របស់ខ្លួន និងអ្នកនៅជុំវិញ។
ចំណែកឯលោកស្រី ប៉េង លីយ័ន វិញ បានទទួលយកអាវធំនោះ មកគ្របខ្លួនបន្តិច តាមបែបគួរសម តែបានដោះវាចេញវិញ ទៅឲ្យអ្នកបម្រើម្នាក់ នៅប៉ុន្មានវិនាទីក្រោយមក៕