ខុសពីរសប្តាហ៍មុនៗ បេក្ខជន​ម្នាក់​របស់​ឌឹវយ្សន៍ លោក អឿម រុន ដែល​ត្រូវ​បាន​ទស្សនិក​ជន​គាំទ្រ​បោះ​ឆ្នោត​ឱ្យ​ជាប់ ស្ទើរ​គ្រប់​សប្តាហ៍​នោះ ឥលូវ​នេះ​បទ​ចម្រៀង​២បទ ដែល អឿម រុន បាន​បក​ស្រាយ​ក្នុង​សប្តាហ៍​នេះ រួម​មាន​បទ​«ទុយ​មុយ» និង​បទ​«សត្វ​មមៀច» ហាក់​មិន​អាច​ទាក់​ទាញ ទឹក​ចិត្ត​ទស្សនិកជន ឱ្យ​បោះ​ឆ្នោត​គាំទ្រ ដូច​សប្តាហ៍​មុនៗ​ទេ។ ការ​ដែល​បេក្ខជន​រូប​នេះ មិន​អាច​ទាក់​ទាញ​ទឹក​ចិត្ត​​ទស្សនិកជន​បាន ព្រោះ​តែ​បទ​ចម្រៀង ដែល​កញ្ញា ពេជ្រ សោភា គ្រូ​បង្វឹក​រៀបចំ​ឱ្យ​បេក្ខជន​រូប​នេះ យក​មក​ឲ្យ​ច្រៀង​ប្រលង​នោះ សុទ្ធ​តែ​លើស​ពី សមត្ថភាព​របស់​បេក្ខជន ជា​កូន​កំព្រា​អ្នក​ក្រ​ខ្សត់​រូប​នេះ។

ចំពោះការជ្រើសរើសបទចម្រៀង ដែល​មិន​សមស្រប ជាមួយទឹកដមសម្លេងដូចនេះ កញ្ញា ពេជ្រ សោភា ក៏ដូច​ជាកម្មវិធីThe Voice Cambodia បានរងនូវការតិះតៀនយ៉ាងខ្លាំងពីទស្សនិកជន បើទោះបីជាបេក្ខជនរូបនេះ ត្រូវ​បានគេមើលឃើញ សមត្ថភាពនៃសម្លេង នៅមានកម្រិតតាំងពីវគ្គដំបូង មកក៏ដោយ។ ទស្សនិកជនបាន​លើក​ឡើងថា បើទោះបីជាមើលឃើញថា  សមត្ថភាពសម្លេងរបស់បេក្ខជនរូបនេះ នៅមានកម្រិតក៏ដោយ ប៉ុន្តែក៏គួរ​តែ​ជ្រើសរើសបទចម្រៀងណា ដែលសមនឹងសម្លេងរបស់គេដែរ។

ទស្សនិកជនម្នាក់បានបរិហារចំៗ ទៅលើកម្មវិធី The Voice Cambodia ថា ការដែល The Voice Cambodia អោយ អឿម រុន ជាប់ដល់វគ្គនេះ គ្រាន់តែលួងចិត្តអ្នកគាំទ្រគាត់តែប៉ុណ្ណោះ ពីព្រោះមានអ្នកផ្ញើសារច្រើន។ ម្យ៉ាងគេចង់ថា អ្នកណារជាប់ធ្លាក់នៅលើមាត់គេទេ ព្រោះសារដែលទស្សនិកជនបោះឱ្យ គឺមានតែអ្នក​រៀបចំ​ប៉ុណ្ណោះដែលដឹង។ ប្រិយមិត្តរូបនេះ បានសរសេរសារ នៅលើគណនីហ្វេសប៊ុករបស់ខ្លួន  បន្តរិះគន់ថា៖ «កាល​ពីយប់មិញនេះ គឺគេខ្លាចគាត់ជាប់តាមសារទៀត គេបានរៀបចំអោយគាត់ច្រៀងបទ ដែលមិនពីរោះ និងពិបាក ដើម្បីអ្នកគាំទ្រគាត់អស់ចិត្តថា គាត់ពិតជាអន់។ ហង្សមាសមិនប្រថុយអោយគាត់ ឡើងដល់វគ្គផ្តាច់ព្រ័តទេ។» ម្ចាស់គណនីដដែលបន្ថែមថា បេក្ខជនទាំងអស់ សុទ្ឋតែបង្កើនសមត្តភាពច្រៀង ពីមួយវគ្គទៅមួយវគ្គទៀត ចំឡែកតែ អឿម រុន អន់ទៅៗ ហើយយកមកច្រៀងសុទ្ទតែបទយ៉ាប់ ស្តាប់មិនបានគ្មានន័យ។ បើចង់អោយ អឿម រុន ល្អ មិនមែនអង្គុយថាអន់ គ្មានសមត្តភាពនោះឡើយ គួរប្រាប់ចំនុចកែលំអ គួររើសបទត្រូវសំលេង​គាត់ ហើយបង្រៀនអោយអស់ពីចិត្ត។

The Voice Cambodia រើសអើង?

ម្ចាស់គណនីមួយរូបទៀត បានបន្ទរដែរថា៖ «បើគេចង់ទម្លាក់ហើយ ងាយណាស់។ គេរកតែបទដែលពិបាក យក​មកអោយច្រៀង គឺចប់។ ហើយប៉ះគ្រូបង្វឹកសោភាផង សម្តីមហាយ៉ាប់ ធ្វើមើលតែខ្លួនណ្នឹង មុនចូល​ច្រៀង​ធ្លាប់ប្រលងអញ្ចឹង? ខ្លួនច្រៀងអន់ជាងកូនក្រុមស្រី របស់ខ្លួនទៀត»។

ចំណែកប្រិយមិត្តមួយរូបទៀត បានសសេរញ្ចេញយោបល់ដែរថា បើប្រៀបធៀបសមត្ថភាព អឿម រុន មិនមាន​សមត្ថភាពដល់បេក្ខជនទាំងបួន ដែលជាប់ទៅកាន់វគ្គផ្តាច់ព្រ័ត្តនោះទេ។ ប៉ុន្តែអ្វីដែលគួរអោយកត់សំគាល់នោះ គឺគ្រូបង្វឹកកញ្ញា ពេជ្រ សោភា ហាក់ដូចជាស្អប់កូនក្រុមរបស់ខ្លួនរូបនេះខ្លាំងណាស់ តាមរយ:សកម្មភាព​កាយ​វិការហ្វឹកហាត់សមមុនឡើងច្រៀង។ ម្ចាស់គណនីដដែលបន្ថែមទៀតថា៖ «រីឯគ្រូបង្វឹកទាំងអស់ ដឹងច្បាស់​ណាស់ថា រុនមិនមែនជាម្ចាស់ជ័យលាភីក្នុងកម្មវិធីនេះទេ ប៉ុន្តែម្នាក់ៗ ផ្តល់មតិយោបល់ពោរពេញ ដោយការ​ស្តីបន្តោសបង្អាប់ និងស្អប់ខ្ពើម។»

ដោយឡែក ប្រិយមិត្តអ្នកស្នេហាកម្មវិធី The Voice Cambodia មួយរូបទៀត បានលើកឡើងដូចច្នេះថា៖ «អឿម រុន ធ្លាក់ត្រឹមវគ្គណ្នឹង គឺត្រឹមត្រូវហើយ ព្រោះថាសម្លេងគាត់នៅខ្សោយ ហើយខ្វះខាតច្រើនណាស់។ យើង​អាណិត វាចេះតែអាណិតហើយ តែវាអយុត្តិធម៌សម្រាប់អ្នកដែលមានសមត្ថភាពពិតប្រាកដ ។»

កាលពីថ្ងៃអាទិត្យទី០៩ វិចិ្ឆកា ដែលវគ្គពាក់កណ្តាលផ្តាចព្រ័ត របស់កម្មវិធី The Voice Cambodia បន្ទាប់ពី​បេក្ខជន អឿម រុន ដែលជាកូនក្រុមរបស់កញ្ញា ពេជ្រ សោភា បកស្រាយបទទីមួយចប់ កញ្ញា ឪក សុគន្ធ កញ្ញា និង​លោក ណុប ប៉ាយ៉ារិទ្ធ បានផ្តល់យោបល់កែលម្អជាច្រើនដល់បេក្ខជនរូបនេះ ប៉ុន្តែពាក្យដាស់តឿន​មួយ​ចំនួន ប្រៀបដូចជាអាវុធដែលចាក់ទម្លុះបេះដូងដូច្នេះដែរ៕