ជ័យលាភីទាំងបី របស់«សំនៀងចែងចាំង» មានសមត្ថភាព?
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី០៣ វិច្ឆិកា ២០១៤
- កែប្រែចុងក្រោយ: November 05, 2014
- ប្រធានបទ: ចម្រៀង
- អត្ថបទ: មានបញ្ហា?
- មតិ-យោបល់
-
ជ័យលាភីទាំងបី នៃរដូវកាលទី១ របស់កម្មវិធីប្រលងចម្រៀង «សំនៀងចែងចាំង» បានទៅលើ អ្នកជាប់ចំណាត់ថ្នាក់លេខ១ ឈ្មោះ ទូច មករា មកពីខេត្តបាត់ដំបង - អ្នកលេខ២ បានទៅលើបេក្ខជន ហួន សំអុល មកពីខេត្តកំពត និងចំណាត់ថ្នាក់លេខ៣ បានលើបេក្ខជន សន វិច្ឆិកា មកពីខេត្តតាកែវ។
តែទោះយ៉ាងណា ការទទួលជ័យលាភី លើការប្រលងចម្រៀងនៅវគ្គផ្តាច់ព្រ័តនេះ គឺជាការសម្រេចរបស់ទស្សនិកជន តាមរយៈការផ្ញើសារ មិនមែនជាការសម្រេច នឹងការដាក់ពិន្ទុ របស់គណកម្មាការទាំងបួន ដែលគេមើលឃើញថា សុទ្ធតែមានបទពិសោធន៍ និងសមត្ថភាពក្នុងការដាក់ពិន្ទុ នាពេលកន្លងមកនោះទេ។
វិធីសាស្ត្រនៃការផ្ញើរសារនេះ បានធ្វើឲ្យគេសន្និដ្ឋានថា បេក្ខជនទាំងបី ដែលជាប់ជ័យលាភីនេះ មានការទទួលស្គាល់ និងគាំទ្រពីទស្សនិកជន ច្រើនជាងបេក្ខជនដទៃទៀត។ ទស្សនិកជនម្នាក់ បានលើកសសើរបេក្ខជនទាំងបីនេះថា៖ «ជ័យលាភីបុរសទាំង៣នាក់ គឺសក្ដិសមណាស់ ខ្ញុំគាំទ្រពួកគាត់ទាំង៣អបអរសាទ»។ ចំណែកប្រិយមិត្តម្នាក់ទៀត បានថ្លែងសាទរចំពោះបេក្ខទាំងបីនាក់នេះ ដោយបានសរសេរថា៖ «ប្អូន មករា សំអុល និង វិច្ឆិកា ខំប្រឹងបន្តទៀតប្អូន ជាពិសេសនៅពេលដែលប្អូនល្បីហើយ សូមរៀបចំខ្លួនអោយសមសួន ជាតារាខ្មែរ ដើម្បីជាគំរូដល់យុវ័យ ជៀសវាងលំអានអាក្រក់ ដូចតារាមុនៗមួយចំនួន ធ្វើខ្លួនមានលក្ខណៈ ដូចក្មេងញៀនថ្នាំ រឺមនុស្សពាល»។
ព្រមជាមួយនឹងការអបអរសាទរ កម្មវិធីនេះក៏រងនូវការរិះគន់យ៉ាងចាស់ដៃ ពីទស្សនិកជនផងដែរ ព្រោះការសម្រេចនៅវគ្គផ្តាច់ព្រ័តនេះ គណកម្មការទាំងបួនរួមមាន ឃួន សិទ្ធិស័ក្ក លោក សូ ស្រណោះ អ្នកនាង ម៉េង កែវពេជ្ជតា និងកញ្ញា ហង្ស សុជាតា ដែលគេទទួលស្គាល់ជាតន្រ្តីករ និងជាតារាចម្រៀងអាជីព មានបទពិសោធន៍យូឆ្នាំ ដែលធ្លាក់ពិន្ទុយ៉ាងសុក្រិដ្ឋឱ្យបេក្ខជននោះ ប៉ុន្តែបែរជាគ្មានសិទ្ធិអ្វីសោះក្នុងការសម្រេច។ គេក៏បានមើលឃើញដែរថា គណកម្មាការទាំងបួនរូប ទំនងជាមិនពេញចិត្តនឹងលទ្ធផលនេះប៉ុន្មានទេ។
ចំណែកនៅលើបណ្តាញសង្គមហ្វេសប៊ុកឯណោះវិញ មានប្រតិកម្មជាច្រើនបានលើកឡើង ព្រមជាមួយនឹងការខកចិត្ត ខណៈដែលបេក្ខនារីទាំងបី ដែលមិនទទួលបាននូវជ័យលោភីនោះ ត្រូវបានគេមើលឃើញថា មានសំនៀងក្រអួនក្រអៅផងដែរ ប៉ុន្តែបែរជាគ្មានបេក្ខនារីណាម្នាក់ ជាប់ទាល់តែសោះ ក្នុងចំណោមជ័យលោភីទាំងបី។
ទស្សនិកជនជាច្រើន បានបញ្ចេញយោបល់ថា អ្នកផលិតកម្មវិធីសំនៀងចែងចាំង មិនគួរឱ្យតម្លៃទៅលើការបោះឆ្នោតពីទស្សនិកជននោះទេ ការអោយឈ្នះចាញ់ ដោយឱ្យប្រិយមិត្តបោះឆ្នោតគាំទ្រ គឺជារឿងមួយឆ្គង។ ម្ចាស់គណនីម្នាក់ បានផ្តល់មតិថា៖
«CTN គួរតែទទួលយកនូវអនុសាសន៍ខាងក្រោម មកធ្វើការពិចារណា ដើម្បីរៀបចំកម្មវិធីលើកក្រោយ ឲ្យកាន់តែប្រសិទ្ធិភាព និងកាន់តែមានការគាំទ្រ៖
១. គណះកម្មការ គួរតែមានសិទ្ធិក្នុងការផ្តល់ពិន្ទុជូនបេក្ខជន
២. ការផ្តល់ពិន្ទុ គួរតែមានតម្លាភាពលើគ្រប់ផ្នែកទាំងអស់ (ចំនួនពិន្ទុគួរតែត្រូវបានបង្ហាញ)
៣. ទោះបីការបោះឆ្នោតតាមទូរស័ព្ទ ពីសំណាក់ប្រិយមិត្ត គឺជារឿងខានមិនបាន ប៉ុន្តែយើងអាចកែឆ្នៃវាឲ្យទៅជារឿងមួយដែលអាចទទួលយកបានទាំងអស់គ្នា ដូចជា លទ្ធផលដែលបានមកពីការបោះឆ្នោតប្រិយមិត្ត នឹងត្រូវបានជាពិន្ទុជំនួយជួយយោង នូវពិន្ទុដែលបានផ្តល់អោយគណៈកម្មការ។ ខ្ញុំគិតថា បើធ្វើបែបនេះបាន CTN អាចនឹងចៀសផុតពីការរិះគន់ទាំងឡាយ ដែលថាអ្នកណាដែលមានខ្សែរយៈ និងលុយច្រើន អ្នកនោះនឹងជាប់ជាជ័យលាភី។»
ចំណែកអ្នកប្រើប្រាស់បណ្តាញសង្គមហ្វេសប៊ុកម្នាក់ទៀត បានបន្ទរជាមួយដែរថា៖ «ខ្ញុំចង់និយាយពាក្យនេះយួរហើយ។ Vote មិនសុក្រឹត្យទេ ។ មេប្រយោគជ្រើសរើស ទើបសុក្រឹត្យជាង។ ក្រែងយើងចង់បាន អ្នកដែលមានសំលេងល្អ មែនឬអត់?៕