សម្ភាសតេជគុណ កែវ សុផល វិចិត្រ ពីអាជ្ញាធរយួនចាប់ខ្លួនព្រះសង្ឃខ្មែរក្រោម (vdo)
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី៣១ តុលា ២០១៤
- កែប្រែចុងក្រោយ: October 31, 2014
- ប្រធានបទ: កម្ពុជាក្រោម
- អត្ថបទ: មានបញ្ហា?
- មតិ-យោបល់
-
ក្រោមហេតុផលថា ឆ្លងដែនដោយគ្មានលិខិតឆ្លងដែន ឬអត្តសញ្ញាណប័ណ្ណ មិនផ្តល់ព័ត៌មានដល់អាជ្ញាធរមូលដ្ឋាន ពេលទៅដល់ស្រុកកំណើត បានធ្វើឲ្យព្រះសង្ឃខ្មែរ មកពីកម្ពុជាក្រោមជាច្រើនអង្គ ត្រូវបានចាប់ខ្លួនដោយអាជ្ញាធរវៀតណាម។ ការចាប់ខ្លួននេះ បានធ្វើឡើង នៅចំណុចព្រំដែនចេញចូល រវាងប្រទេសកម្ពុជា និងវៀតណាម។ ព្រះសង្ឃខ្មែរកម្ពុជាក្រោមទាំងនោះ ត្រូវបានអាជ្ញាធរវៀតណាម ធ្វើការឆែកឆេរទូរស័ព្ទដៃ និងចោទថា មានចេតនាបំផុសបំផុល ប្រឆាំងនឹងរដ្ឋអំណាចវៀតណាម។ នេះបើតាមសង្ឃដីការរបស់ព្រះតេជគុណ កែវ សុផលវិចិត្រ ក្នុងកិច្ចសម្ភាសផ្ដាច់មុខមួយ ជាមួយទស្សនាវដ្តីមនោរម្យ.អាំងហ្វូ។
គង់នៅវត្តសាមគ្គីរង្សី ព្រះសង្ឃ កែវ សុផលវិចិត្រ បានមានសង្ឃដីការទៀតថា តែសម្រាប់ប្រជាពលរដ្ឋ ឬអ្នកទេសចរណ៍ផ្សេងទៀត ក្រៅពីខ្មែរកម្ពុជាក្រោម មិនដែលឃើញអាជ្ញាធរវៀតណាម ហៅនរណាម្នាក់មកធ្វើការសាកសួរដូច្នេះឡើយ។
ក្នុងសន្និសីទសារព័ត៌មាន នៅវត្តសាមគ្គីរង្ស៊ី កាលពីថ្ងៃទី៣០ ខែតុលា ឆ្នាំ២០១៤ ព្រះតេជគុណ កឹម វីរៈ (ហៅ កឹម សុខា) ដែលរងនូវការចាប់ខ្លួនដែរនោះ បានបញ្ជាក់ថា កាលពីង្ងៃទី២៨ ខែតុលា អាជ្ញាធរវៀតណាមបានចាប់ព្រះសង្ឃ និងគ្រហស្ថចំនួន១៣នាក់/អង្គ ក្នុងនោះមានក្មេងចំនួន៣នាក់ ដែលទៅចូលរួមក្នុងពីធីធ្វើបុណ្យកឋិនទាន ពីប្រទេសកម្ពុជាទៅវត្ត ខ្វែងទទឹង ឃុំខ្វែងទទឹង ស្រុកឃ្លាំងមឿងខេត្តក្រមួនសរ ក្នុងទឹកដីខ្មែរកម្ពុជាក្រោម។ ព្រះសង្ឃ ក៏ដូចជាប្រជាពលរដ្ឋខ្មែរកម្ពុជាក្រោម ដែលបានឡើងមករស់នៅកម្ពុជា កំពុងត្អូងត្អែរថា ពួកគាត់ពេលទៅស្រុកកំណើតម្តងៗ អាជ្ញាធរវៀតណាមតែងតាមឈ្លាំមើលជានិច្ច ខុសពីជនជាតិវៀតណាមមកនៅកម្ពុជា។
ព្រះតេជគុណ កែវ សុផលវិចិត្រ បានបញ្ជាក់ទៀតថា ការឃាត់ខ្លួននេះ ត្រូវបានធ្វើឡើងតាំងពីព្រឹក ជាមួយនឹងការសួរចម្លើយ រហូតដល់ម៉ោង៨យប់ ទើបដោះលែង។ ការសួរចម្លើយនេះ មានទាំងការសំឡុតកំហែង ឲ្យឆ្លើយអ្វីទៅតាមការពិត ឬតាមអ្វីដែលចង់បាន។ ព្រះអង្គថា ក៏មានការដកហូតនូវទ្រព្យសម្បត្តិមួយចំនួន ដែលមកទល់ពេលនេះ នៅមិនទាន់ប្រគល់ឲ្យវិញនៅឡើយ ក្នុងនោះរួមមានទូរសព្ទ iPhone ទូរស័ព្ទ Samsung Galaxy ទំនើបៗចំនួន៨គ្រឿង។
សូមស្តាប់កិច្ចសម្ភាសព្រះតេជគុណ កែវ សុផល វិចិត្រ ជាមួយទស្សនាវដ្តីមនោរម្យ.អាំងហ្វូដូចខាងក្រោម៖