កាំជ្រួចផ្កាយរណបអាមេរិកបង្ហោះមិនឡើង តែបានធ្លាក់ផ្ទុះខ្លាំងអស្ចារ្យ (vdo)
- ដោយ: សុបិន្ដ ដោយ សុបិន្ត (ទាក់ទង៖ [email protected]) - ម៉ុងរ៉េអាល់ ថ្ងៃទី២៨ តុលា ២០១៤
- កែប្រែចុងក្រោយ: October 29, 2014
- ប្រធានបទ: អាវកាស
- អត្ថបទ: មានបញ្ហា?
- មតិ-យោបល់
-
រូបភាពដែលបានថតជាប់ពីការផ្ទុះនេះ មានសភាពគួរឲ្យតក់ស្លុត។ ប៉ុន្តែជាសំណាងល្អ ដែលគ្រោះថ្នាក់នេះ មិនបានបង្កឲ្យមានប៉ះពាល់ ដល់ជីវិតមនុស្សណាម្នាក់ឡើយ។ កាំជ្រួចផ្កាយរណប អេនតារ៉េស (Antares) បានផ្ទុះនៅ១០វិនាទី ក្រោយពីការបង្ហោះវា នៅយប់ថ្ងៃអង្គារទី២៨ ខែតុលានេះ ចេញពីស្ថានីយអាវកាសអន្តរជាតិ លើកោះ វ័លូប។ កាំជ្រួចនេះ ត្រូវបានយកមកធ្វើអាជីវកម្មបន្ត ពីទីភ្នាក់ងារអាវកាសអាមេរិក ហៅកាត់ថា ណាហ្សា (Nasa) ដោយក្រុមហ៊ុនឯកទេសខាងវិទ្យាសាស្ត្រមួយ ឈ្មោះហៅថា អូប៊ីថល សាយអេន (Orbital Sciences)។
ក្រុមហ៊ុន អូប៊ីថល សាយអេន បានសរសេរប្រកាសព័ត៌មានថា៖ «បន្ទាប់ពីងើបខ្លួនបានបន្តិច តួកាំជ្រួចបានជួបនឹងបញ្ហារអាក់រអួលមួយ ដែលបង្កឲ្យក្លាយជាវិនាសកម្ម»។ ចំណែកឯទីភ្នាក់ងារ ណាហ្សា វិញ បានថ្លែងដែរថា៖ «គ្មានអ្នករបួស ឬសមាជិកបម្រើការណាម្នាក់ កើតមានផលប៉ះពាល់ នៅក្នុងហេតុការណ៍ផ្ទុះនេះទេ»។
ជាការផ្ទុះលើកទីមួយ នៃកាំជ្រួច ដែលធ្វើអាជីវកម្មបន្ត
លោក ហ្វ្រេគ គូប៊ើរសុន (Frank Culbertson) នាយកប្រតិបត្តិរបស់ក្រុមហ៊ុន អូប៊ីថល សាយអេន បាននិយាយដែរថា៖ «យើងបានបើកឲ្យមានការស៊ើបអង្កេតមួយភ្លាម ដើម្បីរកឃើញពីមូលហេតុនៃភាពរអាក់រអួល ហើយនឹងកំណត់ឲ្យបានពីវិធានការ ដើម្បីអាចឲ្យយើងបញ្ជៀសបាន ពីគ្រោះថ្នាក់របៀបនេះ នៅលើកក្រោយទៀត»។
វាជាការផ្ទុះលើកទីមួយ នៃកាំជ្រួចផ្កាយរណប បន្ទាប់ពី ណាហ្សា បានសម្រេចចិត្តឲ្យក្រុមហ៊ុនឯកជន យកគម្រោងនេះទៅធ្វើអាជីវកម្មបន្ត ដើម្បីរងចាំការបង្កើតប្រព័ន្ធបាញ់បង្ហោះ របស់ខ្លួនមួយថ្មីទៀត។ រីឯក្រុមហ៊ុន អូប៊ីថល សាយអេន ដែលទទួលយកគម្រោងនេះមកផលិតកាំជ្រួចនោះ ធ្លាប់បានបាញ់បង្ហោះប្រកបដោយជោគជ័យពីរដងហើយ បើគិតចាប់តាំងពីពេលបង្កើតក្រុមហ៊ុន នៅឆ្នាំ១៩៨២មក។ ប៉ុន្តែ អូប៊ីថល អាយអេន មិនដែលបានទទួលយកកាំជ្រួចប្រភេទ អេតារ៉េស នេះ មកធ្វើទេ ព្រោះគម្រោងនេះ តែងត្រូវបានផ្ដល់ទៅឲ្យក្រុមហ៊ុនពីរផ្សេងទៀត គឺក្រុមហ៊ុន ស្ពេសអ៊ិច (SpaceX) និងក្រុមហ៊ុន ប៊ូអីង (Boeing)៕