ទសវត្សរ៍ទីមួយ រំលឹកការគ្រងរាជសម្បត្តិ នៃព្រះមហាក្សត្រ នរោត្តម សីហមុនី
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី២៩ តុលា ២០១៤
- កែប្រែចុងក្រោយ: October 29, 2014
- ប្រធានបទ: ខួប
- អត្ថបទ: មានបញ្ហា?
- មតិ-យោបល់
-
នៅក្នុងការប្រារព្ធពិធីខួប១០ឆ្នាំ នៃការគ្រងព្រះបរមរាជសម្បត្តិ ថ្វាយព្រះអង្គជាស្ដេចផែនដី នៅថ្ងៃទី២៩ ខែតុលា ឆ្នាំ២០១៤ នេះ មានការចូលរួមពីមហាជន ប្រមាណជាងពីរម៉ឺននាក់ មកពីគ្រប់ខេត្ត ក្រុង ស្រុក ខណ្ឌ។ ក្នុងចំណោមនោះ ក៏មានឥស្សរជនថ្នាក់ដឹកនាំរដ្ឋ ក្រសួង ស្ថាប័ន មន្ទីរ អង្គភាព កងកម្លាំងប្រដាប់អាវុធ និងតំណាងរាជធានីខេត្ត ទាំង២៥ បូករួមទាំងអង្គទូតផងដែរ។
ជាមួយគ្នានេះ ក៏មានពិធីរាប់បាត្រ ដែលមានការនិមន្តចូលរួម ពីព្រះសង្ឃប្រមាណជា៥០០អង្គនោះផងដែរ។ ព្រះសង្ឃរាប់រយអង្គទាំងនេះ បាននិមន្ដមកកាន់មុខព្រះបរមរាជវាំង តាំងពីថ្ងៃទី២៨ ខែតុលាម្សិលម៉ិញ ដើម្បីទទួលទ័យទាន និងវត្ថុផ្សេងៗ ក្នុងពិធីរាប់បាត្រដែលពុំធ្លាប់មាន ក្រោយការឡើងគ្រងរាជសម្បត្តិ តាំងពីឆ្នាំ២០០៤មកនោះ។
ឯគណៈកម្មាធិការរៀបចំបុណ្យជាតិ និងអន្តរជាតិឯណោះវិញ បានរៀបចំតុបតែងភ្លើង ផ្កាភ្ញី និងរូបព្រះឆាយាលក្ខ័ណ៍របស់ព្រះអង្គ ពន្លេចដោយភ្លើងពណ៌ និងរូបភាពយ៉ាងសម្បូរបែប នាមុខព្រះបរមរាជវាំង។ នៅតាមដងមហាវិថីនានា ក្នុងរាជធានី ក៏មានតម្រូវឲ្យដោតទង់ជាតិ នៃព្រះរាជាណាចក្រកម្ពុជា ដើម្បីជានិមិត្តរូបនៃការអបអរសាទរ ទៅដល់ការរំឭកខួប នៃការឡើងគ្រងរាជសម្បត្តិរបស់ព្រះអង្គដែរ។
សូមជម្រាបជូនឡើងវិញដែរថា ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ទ្រង់ព្រះប្រសូតនៅថ្ងៃទី១៤ ខែ ឧសភា ឆ្នាំ១៩៥៣ នៅរាជធានីភ្នំពេញ។ ព្រះអង្គជាបុត្រានៃព្រះករុណា ព្រះបរមរតនកោដ្ឋ ព្រះបាទសម្តេចព្រះនរោត្តម សីហនុ និង សម្តេចម៉ែ ព្រះនរោត្តម មុនីនាថ សីហនុ។ ព្រះអង្គបានយាង ឡើងគ្រងព្រះបរមរាជសម្បត្តិ នៅថ្ងៃទី២៩ ខែតុលា ឆ្នាំ២០០៤។
រដ្ឋធម្មនុញ្ញ ដែលជាច្បាប់កំពូលរបស់ប្រទេសកម្ពុជា បានចែងថា ព្រះមហាក្សត្រ ទ្រង់ជាព្រះប្រមុខរដ្ឋ តែមិនកាន់អំណាចឡើយ។ ប៉ុន្តេនៅក្នុងរយៈកាលនៃការគ្រងរាជ្យសម្បត្តិ ព្រះបាទសម្តេច ព្រះបរមនាថ នរោត្តម សីហមុនី ត្រូវបានគេឃើញថា ទ្រង់បានធ្វើនូវព្រះរាជសកម្មភាព ដ៏ថ្លៃថ្លាជាច្រើនរបស់ព្រះអង្គ ក្នុងនោះមានការជម្រុញវិស័យសង្គមកិច្ច វិស័យវប្បធម៌ វិស័យអប់រំ វិស័យសុខាភិបាល និងជាពិសេសវិស័យមនុស្សធម៌៕