ប្រតិកម្មប្រឆាំងស្ត្រី «វាយកំទេចព្រះពុទ្ធបដិមា ព្រោះមានរូបសណ្ឋិត»
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី១៦ តុលា ២០១៤
- កែប្រែចុងក្រោយ: October 17, 2014
- ប្រធានបទ: បេតិកភណ្ឌ
- អត្ថបទ: មានបញ្ហា?
- មតិ-យោបល់
-
បន្ទាប់ពីស្រ្តីជាតិញូហ្សេឡេនម្នាក់ ដែលបានវាយកំទេចរូបបដិមា នៅក្នុងប្រាសាទបាយ័ន បានឆ្លើយដោះសារ តាមរយៈសារព័តមានបរទេសនានា ថាដោយសារតែមានវិញ្ញាណចម្លែក ចូលសណ្ឋិតក្នុងខ្លួន ទើបបណ្តាលឱ្យនាងវាយកំទេចព្រះពុទ្ធបដិមា ត្រូវបានក្រុមអ្នកប្រើប្រាស់បណ្តាញសង្គម ហ្វេសប៊ុក រិះគន់យ៉ាងខ្លាំង និងស្នើឱ្យអាជ្ញាធរត្រូវចាត់វិធានការដាក់ទោស ចំពោះស្រ្តីរូបនោះឱ្យខានតែបាន។
សារព័ត៌មាន របស់ប្រទេសញ៊ូវហ្សេឡេន បានស្រង់សម្តីស្រ្តីរពិសដៃ«ផ្ទៃមិនឆ្អែក»នេះថា នាងមិនមានចេតនា វាយបំផ្លាញរូបព្រះពុទ្ធបដិមា នៅក្នុងប្រាសាទបាយ័នទេ ប៉ុន្តែដោយសារតែមានរឿងចម្លែក បានកើតឡើងចំពោះនាង ដែលក្នុងពេលដែលនាងនៅក្នុងប្រាសាទនោះ នាងលឺសំលេងអ្វីម្យ៉ាង កំពុងតែនិយាយជាមួយនាង។ ស្រ្តីជាតិញ៊ូហ្សេឡេន បានបន្តថា សំលេងនោះបានប្រាប់នាងថា ត្រូវតែឱ្យនាងយករូបព្រះពុទ្ធបដិមានេះចេញ ប៉ុន្តែនាងពិតជាមិនចង់ធ្វើដូច្នេះឡើយ ។
ស្រ្តីនេះបានរៀបរាប់ទៀតថា ប្រាសាទបាយ័ននេះ មិនមែនជាទីកន្លែងសក្ការៈរបស់ព្រះពុទ្ធទេ ប៉ុន្តែវាជាទីកន្លែងសក្ការៈ របស់ទេពអប្សរឈ្មោះ អ៊ិនអានណា (Inanna) ដែលពីដំបូងឡើយ វាជារបស់ព្រះនាង ប៉ុន្តែក្រោយមក ត្រូវបានគេប្តូរទៅជាកន្លែងសក្ការៈបូជា របស់ព្រះពុទ្ធវិញ ដូច្នេះទ្រង់ចង់បានប្រាសាទមួយនេះ ជារបស់ខ្លួនវិញ។
ចំពោះការលើកឡើង របស់ស្រ្តីជនជាតិញ៊ូហ្សេឡេនខាងលើនេះ បានធ្វើឱ្យមានប្រតិកម្មយ៉ាងខ្លាំងខ្លា ពីសំណាក់អ្នកប្រើប្រាស់បណ្តាញ សង្គមហ្វេសប៊ុក ដោយពួកគេលើកឡើងថា ស្រ្តីរូបនោះគ្រាន់តែឆ្លើយដោះសារ ដើម្បីគេចពីការទទួលខុសត្រូវតែប៉ុណ្ណោះ។
អ្នកប្រើប្រាស់បណ្តាញសង្គមហ្វេសប៊ុកម្នាក់ បានចោទជាសំណួរឡើងថា ប្រសិនបើនាងពិតជាមានវិញ្ញាណចូលសណ្ឋិតមែន តើព្រលឹងបុព្វបុរសចេះនិយាយ ភាសាអង់គ្លេសដែរឬ? ម្យ៉ាងបើតាមប្រវត្តិសាស្រ្ត គេមិនដែលលឺគេនិយាយ ពីទេពអប្សររអ៊ានអេនណា នេះទេ។
បើទោះបីស្រ្តីរូបនោះឆ្លើយដោះសារយ៉ាងណាក៏ដោយ ក្រុមអ្នកប្រើប្រាស់បណ្តាញសង្គមហ្វេសប៊ុក បានស្នើទៅកាន់អជ្ញាធរថា ត្រូវតែដាក់ទោសជនបរទេសនោះតាមច្បាប់ ដើម្បីទុកជាគំរូដល់ជនបរទេសផ្សេងទៀត ដែលមានចេតនាបំផ្លាញទ្រព្យសម្បត្តិរបស់ខ្មែរ។
ម្ចាស់គណនីហ្វេសប៊ុកមួយរូបទៀត បានសរសេរបញ្ចេញយោបល់ដែរថា៖ «បំផ្លាញសម្បត្តិបេតិកភណ្ឪពិភពលោក ជាពិសេសគឺជាសម្បតិ្តរបស់ប្រទេសខ្មែរ ដែរជាវត្ថុដ៏មានតំលៃ តែបែរជានិយាយធ្វើដូចអត់មានរឿងអី កើតឡើងទៀត ! សូមឲ្យអាជ្ញាធរអប្សារា មេត្តាទទួលខុសត្រូវផង។ (...) សុំឲ្យស្រ្តីជនជាតិបរទេសហ្នឹង ចេញមុខមកទទួលខុសត្រូវ និងចេញមុខសុំទោស ដល់ប្រជាជនខ្មែរជាសារធាណៈ។»។
សេចក្តីប្រកាសព័ត៌មាន របស់អាជ្ញាធរអប្សរា កាលពីថ្ងៃទី១២ ខែ តុលាបានឱ្យដឹងថា កាលពីថ្ងៃទី៩ តុលា ម៉ោងប្រមាណ៦ល្ងាច អ្នករត់រ៉ឺម៉កកង់បីម្នាក់ បានរាយការជូនសមត្ថកិច្ចថា មានភ្ញៀវរបស់ខ្លួនម្នាក់ ជាស្រ្តីជាតិញ៉ូវហ្សេឡេន អាយុប្រហែល៤០ឆ្នាំ បានបាត់ខ្លួន ហើយអាជ្ញាធរបានព្យាយាមតាមរក ពេញមួយយប់ប៉ុន្តែរកមិនឃើញ។ លុះដល់ទាបភ្លឺ កម្មករជួសជុលប្រសាទបាយ័ន បានប្រទះឃើញនាង នៅទិសអាគ្នេយ៍នៃប្រសាទបាយ័ន រួចអាជ្ញាធរក៏បាននាំនាងទៅសួរនាំ។
សេចក្តីប្រកាសរបស់អាជ្ញាធរអប្សរាបន្តថា លុះដល់ម៉ោង៦ព្រឹក ទើបកម្លាំងនគរបាលការពារបេតិកភណ្ឌ បានដឹងថាមានការបាក់បែកព្រះពុទ្ធរូប នៅប្រាង្គកណ្តាលនៃប្រសាទបាយ័ន។ នៅពេលដែលធ្វើកំណត់ហេតុរួចរាល់ ស្រ្តីរូបនោះបានបាត់ពីទីនោះ ព្រោះត្រូវបានម្ចាស់ផ្ទះសំណាក់ មកទទួលទៅវិញ៕