នាព្រឹកថ្ងៃទី១៧ ខែតុលា ឆ្នាំ២០១៤នេះ ព្រះសងង្ឃ និស្សិត បញ្ញាវ័ន្ត និង​ប្រជាពលរដ្ឋ ដែល​រង​នឹង​ការ​បណ្តេញ​ចេញ ដោយ​បង្ខំ​ពី​លំនៅ​ដ្ឋាន បាន​មក​ជួបជុំ​គ្នា ទាមទារ​ឲ្យ​រដ្ឋាភិបាល​កម្ពុជា លុប​ចោល​នូវ​កិច្ច​ព្រម​ព្រៀង ទទួល​ជន​ភៀស​ខ្លួន​មក​ពី​ប្រទេស​អូស្ត្រាលី​នោះ។

ក្រៅ​ពី​និស្សិត ប្រជា​ពលរដ្ឋ ក៏​មាន​ការ​ចូលរួម ពី​តំណាង​សហជីព អង្គការ​សង្គម​ស៊ីវិល​ជាតិ និង​អន្តរជាតិ​មួយ​ចំនួន ក្នុង​ការ​ជម្រុញ​ឲ្យ​មាន​ការ​ដង្ហែ​ដាក់ និង​ទទួល​ញតិ្ត នៅ​តាម​ស្ថាប័ន​សំខាន់ៗ​របស់​រដ្ឋ ស្ថានទូត និង​គណបក្ស​នយោបាយ​ដែរ បើ​ទោះ​ជា​មាន​បំរាម​ឃាត់ ដោយ​សាលា​រាជធានី​ភ្នំពេញ​ក៏​ដោយ។ តាម​គម្រោង​នៃ​ការ​ដាក់​ញត្តិ​នេះ នឹង​ធ្វើ​ទៅ​កាន់​ទី​កន្លែង​ជា​ច្រើន ដូច​ជា​ទីស្តីការ​គណៈ​រដ្ឋមន្ត្រី រដ្ឋសភា ស្ថាតទូត​សហរដ្ឋ​អាមេរិក ការិយាល័យ​អង្គការ​សហ​ប្រជាជាតិ និង​ការិយាល័យ​សហភាព​អឺរ៉ុប​ប្រចាំ​កម្ពុជា គណបក្ស​ប្រជាជន​កម្ពុជា គណបក្ស​សង្គ្រោះ​ជាតិ ពិសេស​ស្ថាន​ទូត​អូស្ត្រាលី ដែល​តំណាង​ឲ្យ​ប្រទេស​ហត្ថលេខី​នេះ។

ញតិ្តដែលបានដាក់ទៅនោះ បានសរសេរបញ្ជាក់ថា កម្ពុជាជាប្រទេស«ក្រីក្រ»មួយ ក្នុងពិភពលោក គ្មាន​ហេដ្ឋារចនា​សម្ព័ន្ធ និងសេវាកម្មសាធារណៈគ្រប់គ្រាន់ ក្នុងការទទួលជនភៀសខ្លួនចម្រុះជាតិសាសន៍នោះ​បាននៅឡើយ។

ប្រធានសហព័ន្ធនិស្សិតបញ្ញវ័ន្តកម្ពុជា លោក ម៉ៅ ពិសេស បានលើកឡើងថា ទាំងប្រទេសកម្ពុជា ទាំង​ប្រទេស​អូស្ត្រាលី កំពុងតែរំលោភច្បាប់ រំលោភសិទ្ធិមនុស្ស និងរំលោភលើកាតព្វកិច្ចអន្តរជាតិ ស្តីពីជន​ភៀស​ខ្លួន សិទ្ធិ​នៃជនភៀសខ្លួន តាមរយៈការចុះហត្ថលេខានៃដោះដូរជនភៀសខ្លួន ថ្នូរនឹងទឹកប្រាក់​សម្រាក់​ការអភិវឌ្ឍន៍​កម្ពុជានោះ។

លើកឡើងប្រហែលគ្នានេះ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាពលោក យ៉ង់ គឹមអេង ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ បានលើកឡើងថា លោកគាំទ្រមិនឲ្យមានការ​បញ្ជូន​ជន​ភៀសខ្លួនទាំងនោះមកកម្ពុជា។ លោកបន្តថា កម្ពុជានៅមិនទាន់មានលទ្ធភាព និងសមត្ថភាព​គ្រប់គ្រាន់ ក្នុង​ការ​គ្រប់គ្រងលើជនបរទេស ដែលចម្រុះជាតិសាសន៍នោះឡើយ។ លោកបាននិយាយឲ្យ​ដឹង​ទៀតថា៖ «ប្រជា​ពលរដ្ឋ​កម្ពុជាភាគច្រើន កំពុងរស់នៅក្រោមបន្ទាត់នៃភាពក្រីក្រនៅឡើយ  ហើយមិនត្រូវ​បាន​​រដ្ឋាភិបាល​​កម្ពុជា​ខ្លួន​ឯង យកចិត្តទុកដាក់ និងដោះស្រាយបាននៅឡើយដែរ។ (…) អ្នកក្រ នៅក្រោម​បន្ទាត់​​ភាព​ក្រីក្រ យើង​(រដ្ឋាភិបាល)ដោះស្រាយមិនទាំងចេញផង។»

ការបង្ហាញពីភាពព្រួយបារម្មណ៍នេះ នៃការបញ្ជួនជនភៀសខ្លួនមកកម្ពុជា ពីសំណាក់ប្រជាពលរដ្ឋ និស្សិត សង្គមស៊ីវិល លោកនាយករដ្ឋមន្រ្តីស្តីទី ស ខេង នៅទីស្តីការក្រសួងមហាផ្ទៃ ក៏បានចេញមុខមកធ្វើការ​ពន្យល់ និងបកស្រាយបន្ថែមកាលពីថ្ងៃទី១៦ ខែតុលា ម្សិលម៉ិញថា កម្ពុជាទទួលយកជនភៀសខ្លួន តាម​គោល​ការណ៍​ស័្មគ្រចិត្តប៉ុណ្ណោះ។ ហើយប្រទេសអូស្ត្រាលី ក៏នឹងមិនចាប់បង្ខំជនភៀសខ្លួនទាំងនោះដែរ។ យ៉ាងណា​ក៏​ដោយ លោកទទួលយកនូវការបង្ហាញ ពីភាពព្រួយបារម្មណ៍របស់ប្រជាពលរដ្ឋ តែក៏ស្ថិតក្នុង​ការ​គិតគូ​និង​ពិចារណា​គ្រប់គ្រាន់ដែរ។ លោកបញ្ជាក់ដូច្នេះថា៖ «យើងព្រួយបារម្ភជាការត្រឹមត្រូវហើយ ប៉ុន្តែ​ព្រួយបារម្ភ​ធំ​ពេក នាំឲ្យ​មានបញ្ហាទៅវិញទេ។ យើងធ្វើប្រកបដោយការទទួលខុសត្រូវ សូមឲ្យយល់យ៉ាង​ដូច្នេះ។ យើង​មិន​​ធ្វើ​អ្វី ដោយ​ប្រថុយ​ប្រថានគ្មានការគិតគូរទេ។»។

សូមរំលឹកថាតាមកិច្ចព្រមព្រៀង កាលពីថ្ងៃទី២៦ ខែកញ្ញា ឆ្នាំ២០១៤ថ្មីៗនេះ ក្នុងការទទួលជនភៀសខ្លួន​អូស្រ្តាលី ដោយ​កម្ពុជាសំអាង លើអនុសញ្ញាស្តីពីជនភៀសខ្លួនឆ្នាំ១៩៥១ ពិធីសារឆ្នាំ១៩៦៧ស្តីពី​ឋានៈជន​ភៀសខ្លួន និងអនុក្រឹត្យស្តីពីនីតិវិធីក្នុងការពិនិត្យ និងទទួលស្គាល់ឋានៈជនភៀសខ្លួន ឬសិទ្ធជ្រកកោន​របស់​ជនបរទេស​នៅ​កម្ពុជា៕