ចន ច័ន្ទលក្ខិណា៖ ចាក់បញ្ចាំងភាពយន្ដថៃឡើងវិញ អាចសម្លាប់ភាពយន្ដខ្មែរ
- ដោយ: ប្រាថ្នា ដោយ ចាន់នីតា (ទំនាក់ទំនង៖ [email protected] ) - ភ្នំពេញ ថ្ងៃទី២៧ កញ្ញា ២០១៤
- កែប្រែចុងក្រោយ: October 03, 2014
- ប្រធានបទ: សិល្បៈទី៧
- អត្ថបទ: មានបញ្ហា?
- មតិ-យោបល់
-
អស់រយៈពេលជាង១០ឆ្នាំមកហើយ ដែលខ្សែភាពយន្តរបស់ថៃ ត្រូវបានហាមឃាត់មិនឱ្យចាក់បញ្ចាំង នៅលើស្ថានីយទូរទស្សន៍នានា ក្នុងប្រទេសកម្ពុជា។ ប៉ុន្តែថ្មីៗនេះ គេសង្កេតឃើញស្ថានីយទូរទស្សន៍ ប៉ុស្ដិ៍លេខ៥ បានចាប់ផ្ដើមចាក់បញ្ចាំងឡើងវិញ ហើយស្ថានីយ៍ទូរទស្សន៍មួយចំនួនទៀត ក៏នឹងត្រៀមចាក់បញ្ចាំងដូចគ្នាដែរ។ ចំពោះការផ្តល់សិទ្ធិ ឱ្យចាក់បញ្ចាំងនូវភាពយន្តថៃឡើងវិញនេះ បង្កឲ្យមានទាំងប្រតិកម្មគាំទ្រ រួមជាមួយនឹងការរិះគន់យ៉ាងខ្លាំងក្លា ពីសំណាក់ប្រជាពលរដ្ឋ ក៏ដូចជាតារាសិល្បៈមួយចំនួនផង។
ក្នុងទំព័រហ្វេសប៊ុក របស់អ្នកនាង ចន ច័ន្ទលក្ខិណា ដែលជាតារាសម្តែងខ្មែរជើងចាស់មួយរូបនោះ អ្នកនាងបានសរសេរសារជាច្រើន បង្ហោះជាសាធារណៈ ប្រកាសសុំឱ្យបន្តការផ្អាក មិនឱ្យចាក់ផ្សាយភាពយន្តថៃ នៅលើកញ្ចកទូរទស្សន៍ក្នុងប្រទេសកម្ពុជា។
អ្នកនាងបានសរសេរថា៖ «ក្នុងនាមយើងទាំងអស់គ្នា ជាកូនខ្មែរ សូមចូលរួមគាំទ្រ បញ្ឈប់នូវការចាក់ខ្សែភាពយន្តបរទេស ជាពិសេសរឿងភាគថៃ ក្នុងម៉ោង prime time (ម៉ោងដែលមានមនុស្សមើលច្រើន) ! ចូលរួមទាំងអស់គ្នាក្នុងការជួយលើក ស្ទួយវិស័យសិល្បៈភាពយន្តខ្មែរ ឱ្យរស់រានមាន ជីវិតឡើងវិញ ដើម្បីបម្រើចំណីចក្ខុរម្មណ៍ទស្សនិកជន ទាំងក្នុងស្រុកនិងក្រៅស្រុក ក៏ដូចជារួមចំណែក ថែរក្សាមរតកវប្បធម៌ និងអត្តសញ្ញាណជាតិ របស់យើង ឱ្យបានថិតថេរគង់វង្ស!»
អ្នកនាងសរសេរបន្តថា អ្នកនាងមានការព្រួយបារម្ភមែនទែន ខ្លាចក្រែងភាពយន្តរបស់ថៃ ដណ្តើមទីផ្សាររបស់ភាពយន្តខ្មែរ ខណៈដែលភាពយន្តខ្មែរ នៅមានកំរិត ធ្វើឱ្យទស្សនិកជនមិនទាន់ទទួលយកបាន ទាំងការសំដែង ទាំងការផលិត។ អ្នកនាងបន្ថែមថា៖ «ខ្ញុំដឹងថាមានអ្នកគាំទ្រ និងចូលចិត្តទស្សនារឿងថៃច្រើនណាស់។ តែយើងត្រូវគិតថា បើយើងគាំទ្ររឿងថៃពេក វានឹងធ្វើអោយរឿងយើងបាត់បង់។ តើយើងសុខចិត្តឈរមើល កាបាត់បង់ខ្សែរភាពយន្តខ្មែរ ជាថ្មីម្តងទៀត ឬក៏យ៉ាងមេច?»
ជាមួយនឹងការប្រកាសនេះ អ្នកនាង ចន ច័ន្ទលក្ខិណា កំពុងតែត្រៀមប្រមូលស្នាមមេដៃ សិល្បករសិល្បការនី ចាងហ្វាងផលិតកម្ម ផលិតករ អ្នកដឹកនាំរឿង និងអ្នកស្នេហា វិស័យសិល្បៈ ភាពយន្តខ្មែរនានា ដើម្បីឱ្យមានការពន្យារ ការចាក់ផ្សាយ ភាពយន្តភាគថៃ ក្នុងម៉ោង៦កន្លះ ទៅម៉ោង៩កន្លះ។ ការប្រមូលនេះធ្វើរួច អ្នកនាងនឹងយក ទៅប្រគល់ជូនក្រសួងព័ត៌មាន និងក្រសួងពាក់ព័ន្ធនានា ដើម្បីស្នើសុំនូវការផ្អាកនេះ។
សម្រាប់ក្រុមដែលយល់ស្រប ឱ្យមានការចាក់បញ្ចាំងភាពយន្តថៃ បានលើកឡើងថា ប្រទេសនីមួយៗ ត្រូវតែមានការផ្លាស់ប្តូរ សេវាគ្នាទៅវិញទៅមក មិនអាចបិទរឿងភាពយន្ដ រឿងបរទេស ព្រោះចង់រក្សាវប្បធម៌ និងតម្លៃភាពយន្តខ្មែរបាននោះទេ គួរតែបើកទូលាយ ជាងសព្វថ្ងៃនេះទៅទៀត។ បើចង់រក្សា និងឱ្យតម្លៃទៅដល់ ស្នាដៃភាពយន្តខ្មែរ ក៏ដូចជាវប្បធម៌របស់យើងនោះ ត្រូវតែខិតខំស្វែងយល់ ដកពិសោធន៍នូវការផលិតរបស់គេដែលប្រកបទៅដោយភាពច្នៃប្រឌិត សម្ភារៈបច្ចេកទេសផលិតទំនើបៗ ទាន់សម័យ ដើម្បីដើរឱ្យដើរទាន់ភាពយន្តបរទេសទាំងនោះ។
ជាការពិតរឿងភាគថៃ មិនដែលបានសាបរលាប ចេញពីចិត្តទស្សនិកជនខ្មែរឡើយ។ រយៈពេលនៃការហាមឃាត់នេះ ទោះបីទូរទស្សន៍មិនបានបញ្ចាំងពិតមែន តែតាមតូបជួល ស៊ីឌីនានាវិញ សម្បូរទៅដោយ រឿងភាគថៃ គ្រប់ប្រភេទ ដែលអ្នកលក់អះអាងថាលក់ដាច់ជាងភាពយន្តរបស់ខ្មែរ ព្រោះការផលិតរបស់គេពោរពេញ ដោយគុណភាព ទាំងសាច់រឿង កាយវិការមិនឆ្គាំឆ្គង ជាពិសេសតារាសម្ដែង សុទ្ធតែមានបទពិសោធន៍នៃការសម្តែងពិតប្រាកដ៕