នាវាយក្សផ្ទុក កុងទឺន័រ ពីរគ្រឿង បុកគ្នានៅច្រកសមុទ្រ ស៊ុយអេ (vdo)
- ដោយ: សេក មនោរកុមារ ដោយ សេក មនោរកុមារ (ទាក់ទង៖ [email protected]) - ប៉ារីស ថ្ងៃទី០១ តុលា ២០១៤
- កែប្រែចុងក្រោយ: October 02, 2014
- ប្រធានបទ: គ្រោះថ្នាក់ផ្លូវទឹក
- អត្ថបទ: មានបញ្ហា?
- មតិ-យោបល់
-
នាវាទាំងពីរ ទីមួយរបស់ប្រទេសអាល្លឺម៉ង់ ឈ្មោះ Colombo Express និងមួយទៀតរបស់ប្រទេសស៊ាំងហ្គាពួរ ឈ្មោះ Maersk Tanjong បានធ្វើដំណើរពីជើងចុះទៅត្បូង កាត់តាមច្រកសមុទ្រ ស៊ុយអេ (Suez) នៃប្រទេសអេហ្សីប កាលពីថ្ងៃចន្ទទី២៩ ខែកញ្ញា ហើយបានជល់គ្នា យ៉ាងកក្រើក។ រូបភាពដ៏អស្ចារ្យនេះ ដែលថតដោយកងកម្លាំងនគរបាលផ្លូវទឹក របស់ប្រទេសអេហ្សីបនោះ ដូចជាបានបង្ហាញថា ពួកឆ្មាំថែរក្សាសន្តិសុខ នៅទីនោះ បានដឹងមុនពីការបុកគ្នានេះ។
នាវាយក្សរបស់អាល្លឺម៉ង់ Colombo Express បានទទួលស្គាល់ថា ខ្លួនបានវេចង្កូត ហើយកុងទឺន័រចំនួនបី បានធ្លាក់ចូលទៅក្នុងទឹក បន្ទាប់ពីបានជល់គ្នានោះ។ មូលហេតុដែលឈានទៅដល់ការវេចង្កូត មិនត្រូវបានបញ្ជាក់ឲ្យដឹងនៅឡើយ រហូតមកដល់ថ្ងៃពុធទី០១ ខែតុលានេះ។ ប៉ុន្តែប្រព័ន្ធចងភ្ជាប់ កុងទឺន័រ របស់នាវាយក្សទាំងនោះ មើលនៅក្នុងវីដេអូ បង្កឲ្យមានការសង្ស័យដ៏ខ្លាំងមួយ។
ការស៊ើបអង្កេតមួយត្រូវបានបើកធ្វើ ហើយក្នុងពេលនោះ នាវាទាំងពីរត្រូវបានឃាត់ទុកជាបណ្ដោះអាសន្ន។ គ្រោះថ្នាក់នេះ បានបង្កឲ្យចរាចរណ៍ នៅតាមបណ្ដោយច្រកស៊ុយអេ ជួបនឹងភាពរអាក់រអួល រហូតដល់ទៅ៣ម៉ោង។
ច្រកសមុទ្រ ស៊ុយអេ ជាច្រកពាណិជ្ជកម្ម ដែលគេចូលចិត្តប្រើច្រើនជាងគេទាំងអស់ នៅក្នុងចំណោមច្រកធំៗប្រាំ នៅក្នុងពិភពលោក។ ច្រកនេះភ្ជាប់មហាសមុទ្រឥណ្ឌា មកសមុទ្រមេឌីទែរ៉ាណេ ដោយឆ្លងតាមឈូងសមុទ្រក្រហម៕