កិច្ចពិភាក្សា ស្វែងរកដំណោះស្រាយ លើក«ទី១០» ថ្ងៃទី២៦ ខែកញ្ញា នៅទីស្តីការស្រសួងការងារ និងបណ្តុះ​បណ្តាល​វិជ្ជា​ជីវៈ ដែលបាន​អូស​បន្លាយជាច្រើនខែមកហើយ សឹងតែក្លាយជាកិច្ចប្រជុំ​របស់ក្រុម​«ចៅចាក់​ស្មុគ្រ» ដោយ​សារ​តែគេ​នៅមិន​ទាន់​រកឃើញដំណោះស្រាយរួម ហើយភាគីទាំងសងខាង នៅមិនទាន់​ព្រម​ព្រៀងគ្នា លើ​ចំណុច​ណាមួយ​នៅ​ឡើយ។ ក្រុមកម្មករ និងសហជីព និយាយពីប្រាក់ឈ្នួលអប្បបរិមា ១៧៧​ដុល្លារ ប៉ុន្តែ​ខាងភាគីនយោជក និយាយពីលទ្ធភាព ដែលពួកថៅកែរោងចក្រហ៊ានត្រឹមតែ ១១០ដុល្លារ​ក្នុង​មួយ​​ខែ​ប៉ុណ្ណោះ។

នៅក្នុង​ការចរចា​នៅមានសភាពតឹងតឹង សឹងតែភាគីទាំងសងខាង គ្មានអ្វីត្រូវនិយាយនិងត្រូវពិភាក្សាទៀត។ នេះបើតាមលោក អាត ធន់ ប្រធានសម្ព័ន្ធសហជីព ប្រជាធិបតេយ្យកម្មករកាត់ដេរកម្ពុជា ថ្លែងទៅកាន់​អ្នក​សារព័ត៌មាន បន្ទាប់ពីកិច្ចប្រជុំនោះ។ លោកបន្តថា៖ «រយៈពេលបីខែ​ហើយ​នៅ​ដដែល អញ្ចឹងហើយ បានជា​ខាងនយោជក បានស្នើរថាឲ្យរដ្ឋាភិបាលកំណត់ទៅ ព្រោះគេអស់​លទ្ធភាពកំណត់​ត្រឹមប៉ុណ្ណឹង ហើយចំណែក​ខាងសហជីព ក៍បានលើកឡើងថា សហជីពគឺអត់មានថយតួលេខណាទេ គឺ​ទុក​ឲ្យខាងរដ្ឋាភិបាល​កំណត់​ទៅ បើសិនជាការកំណត់ណ្នឹងសមរម្យ គឺយើងទទួលយកបាន បើមិនសមរម្យ​កម្មករ​នឹងបន្តជជែក​ពិភាក្សា​គ្នា តវ៉ាតអីទៀតទៅ។»

ដោយឡែកលោក អ៊ិត សំហេង រដ្ឋមន្ត្រីក្រសួងការងារ និងជាប្រធានគណៈកម្មការប្រឹក្សាការងារ បានថ្លែង​ប្រាប់អ្នកសារព័ត៌មានថា ជំនួបនៅថ្ងៃនេោះក៍មានផលវិជ្ជមាន«ដែរ» ដោយសារថាភាគីទាំងពីរ បានបន្ត​បង្ហាញ​នូវជំហរពិភាក្សាគ្នាក្នុងលក្ខណៈស្ថាបនា។ លោកបានសង្កតធ្ងន់ថា៖ «ប៉ុន្តែមកដល់ពេលនេះ យើង​មិនទាន់​រកចំនុចឯកភាពគ្នា ឃើញនៅឡើយទេ អង្គប្រជុំរបស់យើង នឹងត្រូវលើកទៅសម្រេចចុងក្រោយ នៅ​ថ្ងៃទី១០ ខែតុលា ម៉ោង ៩:០០ ព្រឹក។»

លោកបានបន្តទៀតថា៖ «ចំនុចដែលនៅសេសសល់សំខាន់បំផុត គឺលេខមិនទាន់ត្រូវគ្នា ដោយសារថា​អ្នក​ដែលសុំគឺសុំច្រើន ហើយអ្នកដែលឲ្យគឺថាខំបង្កើនដែរ ហើយអ្នកសុំក៍ខំបន្ថយដែរប៉ុន្តែវាមិនទាន់ត្រូវគ្នា។»

គួបញ្ជាក់ថា ប្រាក់ឈ្នួល១៧៧ដុល្លា ដែលក្រុមកម្មករនិងសហជីពបានកំណត់ គឺជាតួលេខឈរ មានន័យថា ជាលេខដែលអាចបត់បែនបាន នេះបើយោងតាមការបញ្ជាក់ ក្នុងពេលកន្លងមក របស់លោកលោក ប៉ាវ ស៊ីណា ប្រធាន​សហព័ន្ធ​សហជីពចលនាកម្មករ ហៅកាត់ជាភាសាអង់គ្លេសថា CUMW៕