លោក គីម ជុនអ៊ុន ដែលមានអាយុពី៣០ ទៅ៣១ឆ្នាំនោះ មិនបានចេញតាមកញ្ចក់តាមទូរទស្សន៍រដ្ឋ តាំងពី​ថ្ងៃទី៣ ខែកញ្ញា នៅក្នុងការប្រគុំតន្ត្រីមួយ ក្នុងរដ្ឋធានីព្យុងយ៉ាង (Pyongyang) ដែលជាធម្មតាលោក ត្រូវមាន​វត្តមានជាមួយភរិយារបស់លោក។

កាលពីខែកក្កដា លោកត្រូវបានគេឃើញថាបានរុំខ្លួនជុំជិត នៅពេលដែលលោកបានមកចូលរួម ក្នុងពិធី​បុណ្យខួបមរណភាពលើកទី២០ របស់ជីតារបស់លោក ដែលជាអ្នកបង្កើតរបបកុម្មុយនីស នៅកូរ៉េខាងជើង។ គេបានសង្ស័យ ពីការហ៊ំខ្លួនជុំជិតនេះ ថាជារោគសញ្ញានៃជម្ងឺ«ហើម»។

នៅក្នុងសន្និសីទការសែតមួយ អ្នកនាំពាក្យមួយរូប របស់ក្រសួងបង្រួបបង្រួមទឹកដីកូរ៉េ នៃប្រទេសកូរ៉េ​ខាង​ត្បូង បងប្អូនគូរសត្រូវរបស់កូរ៉េខាងជើង បានថ្លែងឲ្យដឹងថា៖ «ប្រទេសកូរ៉េខាងជើង មិនបានប្រកាសជា​ផ្លូវ​ការអ្វី​សោះ (...) អញ្ចឹងយើងមិនមានការបកស្រាយអ្វីទេ។ យើងកំពុងសម្លឹងមើលពីករណីជាច្រើន ក្នុងនោះ​ពាក្យចចាមអារាម ដែលនិយាយពីស្ថានភាពសុខភាពរបស់លោក។»។

ការសង្ស័យនេះ កាន់តែរីកធំឡើង បន្ទាប់ពីអវត្តមានរបស់អគ្គមគ្គទេសក៍រូបនេះ នៅក្នុងការបើកសម័យ​កាល​ប្រជុំថ្មីមួយ នៅក្នុងសប្ដាហ៍នេះ នៅសភាប្រជាមានិតរបស់កូរ៉េខាងជើង។ ការបើកសម័យប្រជុំនេះ ជា​ព្រឹត្តិការណ៍​ដ៏សំខាន់សម្រាប់ប្រទេស ដោយសារតែវាបានធ្វើឡើងតែម្ដង ឬពីរដងប៉ុណ្ណោះ ក្នុងមួយឆ្នាំ ដើម្បី​ពិនិត្យយល់ព្រម ទៅលើការសម្រេចចិត្ត របស់គណបក្សកុម្មុយនីសដឹកនាំប្រទេស ដែលមានតែមួយគត់។

ប្រភពព័ត៌មានរបស់ទីភ្នាក់ងារព័ត៌មានកូរ៉េខាងត្បូង យ៉ុងហាប់ (Yonhap) បានលើកយកដំណើររាងឃ្លោង កាលពីខែកក្កដា មកបកស្រាយថា នេះអាចទំនងជាមកពីជម្ងឺហើម និងអាចបណ្ដាលមកពីជម្ងឺទឹកនោមផ្អែម ការធាត់ចុកខ្លាញ់ និងសម្ពាធឈាមឡើងខ្លាញ់។ ប្រភពព័ត៌មានមួយទៀត បានលើកឡើងថា គ្រូពេទ្យជា​ច្រើន​នាក់របស់ប្រទេសកូរ៉េខាងជើង បានធ្វើដំណើរទៅកាន់ប្រទេសអាល្លឺម៉ង់ ឬប្រទេសស្វីស ដើម្បីសុំ​យោបល់​ពីក្រុមគ្រូពេទ្យជំនាញៗនៅទីនោះ។

សម្រាប់អ្នកស្រាវជ្រាវមួយរូប លោក ហុង អ៊ុនអីក (Hong Hyun-Ik) នៅរដ្ឋធានី សេអ៊ូល ប្រទេសកូរ៉េខាង​ត្បូង បាននិយាយការពារលោក គីម ថា៖ «ពាក្យចចាមអារាមទាំងនោះ ដូចជាជ្រុលបន្ដិចហើយ។ វាប្រហែល​ជា​ការ​លាក់ខ្លួនេះ បណ្ដាលមកពីការអស់កម្លាំង ហើយលោកត្រូវការសម្រាកបន្តិច»៕