តើការធ្វើដំណើរតាមយន្ដហោះ កាន់តែធ្វើឲ្យភ័យខ្លាចទៅៗ ឬយ៉ាងណា? តើនៅថ្ងៃទី២៣ ខែសីហា កន្លង​មកនេះ មានរឿងអ្វីកើតឡើងពិតប្រាកដ នៅលើជើងហោះហើរ ពីទីក្រុង សព្លីត ប្រទេសក្រូអាស៊ី មកទីក្រុង ណង់ ប្រទេសបារាំង? សូមតាមដានការរៀបរាប់របស់លោក ប៊េនចាមីន ហ្សីរ៉ា (Benjamin Girard) ជា​មេធាវី និងជាអ្នកដំណើរមួយរូប ដែលបានជិះនៅលើយន្ដហោះ ប៊ូអីង ៧៣៧នោះ។

«អ្នកបើកបរយន្ដហោះ បានប្រកាសថា នៅសល់ពេលតែ៦នាទីប៉ុណ្ណោះ មុននឹងយន្ដហោះត្រូវធ្លាក់ ប៉ុន្តែ​អ្នក​បើកបររូបនេះ បានសុំកុំឲ្យយើងតក់ស្លុក និងឆោឡោ» លោកមេធាវី ដែលបានធ្វើដំណើរទាំងគ្រួសារ មាន​ទាំងប្រពន្ធ និងកូនស្រីពីរនាក់នោះផង បានបន្តទៀតថា មេបញ្ជាការបើកបរយន្ដហោះ បាននិយាយ​ប្រាប់​ពី​ខ្យល់កួចដ៏ខ្លាំងមួយ នៅចំពីមុខ។

បន្ទាប់ពីធ្វើដំណើរបន្តបាន៣០នាទីក្រោយមក ស្រាប់តែនៅខាងក្រោយយន្ដហោះ មានភាពរជើបរំជួល​ខ្លាំង​ឡើង ពីម៉ាស៊ីនប្រតិកម្មរបស់យន្ដហោះ ថាបានខូច ហើយបន្ទាប់មក មេបញ្ជាការបើកបរយន្ដហោះ ក៏​បាន​អះអាងដែរថា ម៉ាស៊ីនប្រតិកម្មដែលខូចនោះស្ថិតនៅខាងឆ្វេង ជំរុញឲ្យយន្ដហោះ ត្រូវតែចុះចត​ជា​បន្ទាន់ នៅ​ព្រលានយន្ដហោះក្រុង វើនីស (Venise) ប្រទេសអ៊ីតាលី។ មេបញ្ជាការ បាននិយាយទៀតថា នេះ​ជា​ឱកាស​សម្រាប់អ្នកដែលមិនទាន់ស្គាល់ ទីក្រុងបូរាណសង់លើទឹកដ៏ល្បី របស់អតីតចក្រភព​រ៉ូម៉ាំង​។

ប៉ូន្តែសម្ដីរបស់អ្នកបើកបរយន្ដហោះ ដូចជាបានក្លាយ ជាការប្រកាសអាសន្នទៅវិញ ព្រោះនៅពេល​បន្ទាប់​មក អ្នកដំណើរទាំងអស់បានដឹងថា យន្ដហោះនឹងចុះចតនៅលើផ្ទៃសមុទ្រ ហើយអាចនឹងឆេះផ្ទុះឡើង។

«ប្រពន្ធខ្ញុំមានកូនស្រីអាយុ៦ខែនៅនឹងដៃ ហើយគ្មាននរណាមករវល់ជួយពាក់អាវការពារឲ្យនាងទេ។ រីឯ​ខ្ញុំ​នៅជិតកូនស្រីច្បងអាយុ៦ឆ្នាំ ហើយខ្ញុំមិនចង់បង្ហាញឲ្យកូនស្រីខ្ញុំ ដឹងពីបញ្ហានេះឡើយ។ ខ្ញុំចាប់ផ្ដើមមាន​អារម្មណ៍ ពីការជ្រួលច្របល់នៅក្នុងយន្ដហោះទាំងមូល ព្រោះអ្នកដំណើរ ត្រូវបានបញ្ជាឲ្យពាក់អាវ​ការពារ​ទាំងអស់។»

មេបញ្ជាការបើកបរយន្ដហោះ បានប្រកាសដោយក្ដី«អួលអាក់»ជាថ្មីទៀត ពីការចុះចតលើផ្ទៃសមុទ្រ របស់​យន្ដហោះ។ មនុស្សទាំងអស់នាំគ្នាស្រែកឡើង និងយំ ខណៈពេលដែលយន្ដហោះ បានសំយ៉ុងបន្ទាបខ្លួនចុះ យ៉ាងខ្លាំងខុសពីធម្មតា។ លោក ប៊េនចាមីន បានបន្តទៀតថា៖ «យើងមើលឃើញសមុទ្រ កាន់តែកៀកខ្លាំង​ឡើង»។ តែផ្ទុយទៅវិញ ខុសពីការប្រកាសរបស់មេបញ្ជាការបើកបរ យន្ដហោះបែរជា​បានចុះចតនៅព្រលាន​យន្ដហោះ ក្រុងវើនីស យ៉ាងសុវត្ថិភាពទៅវិញ។ អ្នកដំណើរដដែលបានបញ្ជាក់ទៀតថា ហើយមានរថយន្ដ​ជួយសង្គ្រោះជាច្រើន បានមកទទួលជួយឈឺឆ្អាលពួកគេ នៅដល់ជើងយន្ដហោះតែម្ដង។

តែសម្រាប់ក្រុមហ៊ុនអាកាសចរណ៍វិញ បានបដិសេធការរៀបរាប់ទាំងនេះ ដោយបញ្ជាក់នៅក្នុងការប្រកាស​ព័ត៌មានមួយថា៖ «ប្រសិនជាយន្ដហោះបានចុះចតនៅក្រុងវើនីស បន្ទាប់ពីម៉ាស៊ីនប្រតិកម្មមួយចំហៀងបាន​ខូច​នោះក៏ដោយ តែមិនមានភាពជ្រួលច្របល់នៅក្នុងយន្ដហោះនោះទេ។ ហើយក៏គ្មានភ្លើងឆេះ រហូតមាន​ក្រុម​អ្នកពន្លត់អគ្គិភ័យចេញមកធ្វើអន្តរាគមន៍នោះដែរ។» ក្រុមហ៊ុន អ៊ឺរ៉ុប អ៊ែរប៉ុស្ដ៍ ដែលមានទីតាំង​នៅក្នុង​ប្រទេស​បារាំង បានបញ្ជាក់ថា អ្នកដំណើររាល់រូបត្រូវបានថែទាំងយ៉ាងខ្ជាប់ខ្ជួន មុននឹងឡើង​ជិះយន្ដហោះ​មួយ​ទៀត ហោះមកកាន់ក្រុងណង់ ប្រទេសបារាំងនៅថ្ងៃបន្ទាប់មក៕