អ្នកសារព័ត៌មានមួយរូប របស់ទូរទស្សន៍ជាតិវៀតណាម បានសម្ដែងប្រតិកម្មដ៏គួរឲ្យចង់សើច នៅពេល​ដែល​ទូរស័ព្ទ​របស់គាត់ បានរោទ៍ឡើងចំពេលដែលគាត់ និងពិធីការិនីម្នាក់ទៀត កំពុងធ្វើអន្តរាគមន៍ក្នុងកម្មវិធីផ្សាយផ្ទាល់។

រូបអ្នកសារព័ត៌មាន និងពិធីការិនីនៅក្នុងកម្មវិធីផ្សាយផ្ទាល់ នៃទូរទស្សន៍ជាតិវៀតណាម។ (រូបផ្ដិតពីវីដេអូ)

ទស្សនាវដ្ដីមនោរម្យ.អាំងហ្វូ បានស្វែងរកព្រឹត្តិការណ៍ដ៏កម្រៗ កើតមានពីគ្រប់ទីកន្លែងក្នុងលោក មកជូន​ប្រិយ​មិត្ត​អ្នកអានរបស់ខ្លួន។

ពីនេះពីនោះ - ហេតុការណ៍ចម្លែកៗ ចេះតែកើតមានរហូតតែម្ដង។ ជាពិសេសនៅពេលដែលអ្នកសារព័ត៌មាន​ទាំង​ពីរនាក់ កំពុងជក់និយាយនៅក្នុងកម្មវិធីផ្សាយបន្តផ្ទាល់ តាមទូរទស្សន៍ជាតិផងនោះ ស្រាប់តែទូរស័ព្ទ​បានរោទ៍​ឡើង។ កម្មវិធីនោះ កំពុងធ្វើការផ្សាយផ្ទាល់ នៅពេលព្រឹកព្រលឹម ស្ដីពីបញ្ហាទឹកជំនន់កាលពីចុងខែកក្កដាកន្លងទៅ នាខេត្ត​ឡងសឺន ផ្នែកខាងជើងនៃប្រទេសវៀតណាម ដោយសារខ្យល់ព្យុះ រ៉ាម៉ាស៊ុន ដែលបង្កឲ្យមានមនុស្ស១១​នាក់​ស្លាប់។

តែសម្លេងទូរស័ព្ទ បានរោទ៍ឡើង បង្កឲ្យភាពក្ដៅក្រហាយ កើតមានឡើង។

ប៉ុន្តែអ្នកសារព័ត៌មានបុរសរូបនេះ ធ្វើដូចជាមិនសូវចាប់អារម្មណ៍អ្វី នឹងទូរស័ព្ទឡើយ ដោយគ្រាន់តែធ្វើម៉េច ដើម្បីឲ្យ​សម្លេងរោទ៍នេះ បាត់ទៅវិញឲ្យឆាប់រហ័សតែប៉ុណ្ណោះ។ ដូច្នេះវិធីមួយដ៏មានប្រសិទ្ធិភាព គឹគ្រវាត់វាចោលទៅឲ្យឆ្ងាយ ... ឲ្យឆ្ងាយពីមីក្រូចាប់សម្លេង។ តែផ្ទុយទៅវិញ កាយវិការរបស់អ្នកសារព័ត៌មានបែបនេះ បែរជាបង្ក ឲ្យមានការផ្ទុះ​សំណើច​ទៅវិញ។

មិនឲ្យផ្ទុះសំណើចយ៉ាងម៉េច បើសម្លេងបោះទូរស័ព្ទទៅលើដី លាន់លឺសូរខ្លាំងជាសម្លេងទូរស័ព្ទរោទ៍នោះទៅទៀត? តាមពិតទៅ នៅក្នុងស្ទូឌីយោថតណាក៏ដូចគ្នាដែរ មីក្រូចាប់សម្លេងតែងទទួលបានជានិច្ចនូវសម្លេង ដែលកើតមាន​នៅក្នុងបន្ទប់នេះ ទោះជាសម្លេងនោះកើតឡើង តិចឬខ្លាំង ជិតឬឆ្ងាយពីមីក្រូក៏ដោយ៕

សូមទស្សនាវីដេអូ៖