ដើម្បីលួងលោម ការអាក់អន់ស្រពន់ចិត្ តរបស់អ្នកគាំទ្រ លោកសម រង្ស៊ី ប្រធានគណបក្សសង្រ្គោះជាតិ បាន​អះអាង​ថា ការប្រឆាំងតាមបែបអហិង្សា និងផ្លូវច្បាប់មានប្រសិទ្ធិភាពជាងអ្វីទាំងអស់ ដែលអាចនឹងនាំឲ្យគណបក្សង្រ្គោះជាតិ ឈានទៅដឹកនាំប្រទេស នៅពេលខាងមុខ។

លោក សម រង្ស៊ី និងអ្នកគាំទ្ររបស់លោក។ (រូបថត គណបក្សសង្គ្រោះជាតិ)

នយោបាយ - ការដើរចុះតាមផ្លូវ ដើម្បីធ្វើការតវ៉ាឲ្យមានយុត្តិធម៌ និងការផ្លាស់ប្តូរនៅកម្ពុជា មិនមែនជាជម្រើស ដ៏​មានប្រសិទ្ធភាពនោះទេ។ តែប្រការសំខាន់ជាងនេះ គឺការកំណែទម្រង់ស្ថាប័នសំខាន់ៗ ពិសេសគណៈកម្មាធិការ​ជាតិរៀបចំការបោះឆ្នោត គ.ជ.ប ឲ្យមានភាពឯករាជ្យពិតប្រាកដដើម្បីបើកផ្លូវ ឲ្យប្រជាពលរដ្ឋមានលទ្ធភាព​ពេញ​លេញ ក្នុងការជ្រើសរើសគណបក្សនយោបាយ ដែលប្រជាពលរដ្ឋពេញចិត្ត។ នេះជាការពន្យល់ របស់លោក សម រង្ស៊ី ប្រធានគណបក្សសង្រ្គោះជាតិ ក្នុងកិច្ចសម្ភាស ជាមួយវិទ្យុសម្លេងសហរដ្ឋអាមេរិក នៅគ្រាចុងក្រោយនេះ។

ប្រធានគណបក្សប្រឆាំង ដែលចង់ឲ្យមានការផ្លាស់ប្តូរនៅកម្ពុជា ដោយប្រសិទ្ធភាព និងជៀងវាងការប្រើអំពើហិង្សា បានបញ្ជាក់ទៀតថា៖ «យើងនឹងចូលទៅក្នុងសភា ដើម្បីឲ្យមានការផ្លាស់ប្តូរ»។ លោកសម រង្ស៊ី ក៏បានស្នើដល់អ្នក​គាំទ្រ​គណបក្សសង្រ្គោះជាតិ គម្បីកុំអាលវិនិឆ្ឆ័យ តែត្រូវរង់ចាំមើលប្រសិទ្ធភាពការងាររបស់គណបក្សសង្រ្គោះជាតិ។

ប្រធានគណបក្សសង្រ្គោះជាតិដដែលនេះ បន្ថែមទៀតថា គណបក្សសង្រ្គោះជាតិចូលទៅក្នុងសភា ដើម្បីផ្លាស់ប្តូរ​ជា​វិជ្ជមានតាមផ្លូវច្បាប់ និងអហិង្សា តែមិនមែនចូលទៅក្នុងរដ្ឋាភិបាលចម្រុះ ជាមួយរដ្ឋាភិបាលគណបក្ស​ប្រជាជនកម្ពុជា​នោះទេ។ លោក សម រង្ស៊ី បញ្ជាក់ថា៖ «ចូលទៅក្នុងសភា គឺចូលទៅតតាំង ប្រឆាំងគណបក្សប្រជាជន។ ហើយ​ប្រឆាំង​​តាមផ្លូវច្បាប់ និងអហិង្សា មានប្រសិទ្ធភាព។ មិនដែលមានទេគណបក្សធំៗតែពីរ តតាំងនៅក្នុងសភា។»

ការថ្លែងបញ្ជាក់របស់លោក សម រង្ស៊ី បានធ្វើឡើង បន្ទាប់ពីមជ្ឍដ្ឋានអ្នកគាំទ្រ របស់គណបក្សសង្រ្គោះជាតិមួយភាគ បានសម្តែងការខឹងសម្បារចំពោះគណបក្សសង្រ្គោះជាតិ ដែលបានចុះកិច្ចព្រមព្រៀងបញ្ចប់វិបត្តិ​នយោបាយ និងយល់​ព្រម​ចូលប្រជុំក្នុងសភា ជាមួយ​គណបក្សប្រជាជនកម្ពុជា កាលពីថ្ងៃទី២២ ខែក្កដា ឆ្នាំ២០១៤។ តែកិច្ចព្រមព្រៀង ដែល​ភាគ​ច្រើន​ផ្តោតសំខាន់ ទៅ​លើការកែទម្រង់ក្បាលម៉ាស៊ីន ស្ថានប័នសំខាន់មួយចំនួននោះ ត្រូវបានសាទរពី អង្គការ​សង្គមស៊ីវិល អ្នកវិភាគនយោបាយឯករាជ្យមួយចំនួន និងសហគមន៍អន្តរជាតិជាទូទៅ៕