អាជ្ញាធរដែនអាកាសរបស់ប្រទេសអាហ្សេរី ទើបនឹងអះអាងប្រាប់ទីភ្នាក់ងារ សារព័ត៌មាន រ៉យទ័រ ថា​យន្ដហោះ​បាន​ធ្លាក់ តែមិនបានបញ្ជាក់ថា ធ្លាក់នៅទីណា ឲ្យប្រាកដនៅឡើយ។ បើតាមនាយទាហារមួយរូប ដែលធ្វើការក្នុងកងទ័ព​អន្តរជាតិ របស់អង្គការសហប្រជាជាតិ បាននិយាយថា តំបន់ដែលយន្ដហោះធ្លាក់នោះ នៅរវាងក្រុង ហ្គាវ (Gao) និង​តាសាលី (Tassalit) នៅប្រទេសម៉ាលី។

យន្ដហោះប្រភេទ ម៉ាកដូណែល៨៣ ដែលក្រុមហ៊ុនមួយនៅអេស្ប៉ាញ ជួលទៅឲ្យក្រុមហ៊ុន អ៊ែរអាហ្សេរី។ (រូបថត​ក្រុមហ៊ុន)

ធ្លាក់យន្ដហោះ - លោក នាយករដ្ឋមន្ត្រីអាហ្សេរី បានប្រកាសតាមវិទ្យុក្នុងស្រុកថា៖ «យន្ដហោះបានបាត់ខ្លួន នៅ​ក្រុង ហ្គាវ ប្រទេសម៉ាលី នៅចំងាយប្រមាណជា ៥០០គីឡូម៉ែត្រ ពីព្រំដែនអាហ្សេរី-ម៉ាលី។ យើងមានជនរងគ្រោះ ចម្រុះ​ជាតិសាសន៍ច្រើនណាស់។»

យន្ដហោះនោះ ជាប្រភេទយន្ដហោះ ម៉ាកដូណែល៨៣ (McDonnell 83) ដែលក្រុមហ៊ុនបានជួលពីក្រុមហ៊ុនមួយទៀត នៅប្រទេសអេស្ប៉ាញ ឈ្មោះ ឈ្វីតអ៊ែរ (Swiftair) ហើយបានផ្ទុកអ្នកដំណើរ១១៩នាក់ ដែលមកពីច្រើនជាតិសាសន៍ រាប់​ទាំងអ្នកបម្រើការលើយន្ដហោះ ៧នាក់ផង។ ប៉ុន្តែសហជីពមួយរបស់ក្រុមអ្នកបើកបរយន្ដហោះ បានលើកតួលេខ​មកនិយាយថា មានចំនួនមនុស្សជិះដល់ទៅ ១២០នាក់។

នៅក្នុងចំណោមអ្នកជិះនៅលើយន្ដហោះ មានជនជាតិបារាំងប្រមាណជាជាង ៥០នាក់។ នេះបើតាមអ្នកតំណាង​ឲ្យ​ក្រុមហ៊ុនអាកាសចរណ៍ អាហ្សេរី ប្រចាំនៅប្រទេសប៊ួគីណា ហ្វាសូ (Burkina Faso - អាហ្វ្រិក​កណ្ដាល)។ ដំណឹងនេះ បានបង្កឲ្យមានភាពរន្ធត់ញាប់ញ័រភ្លាមៗ នៅប្រទេសបារាំង តែការិយាល័យអាកាសចរណ៍ស៊ីវិលបារាំង កំពុងធ្វើការ​ត្រួតពិនិត្យព័ត៌មាននេះនៅឡើយ។

ប្រភពមួយ បានបង្ហើបប្រាប់ ទីភ្នាក់ងារសារព័ត៌មានបារាំងថា៖ «គេបានស្នើសុំឲ្យយន្ដហោះ ហោះងាកចេញពីផ្លូវបន្តិច ដោយសារតែបញ្ហាព្យុះសមុទ្រខ្សាច់ ធ្វើឲ្យមើលមិនឃើញ អាចបង្កឲ្យជល់នឹងយន្ដហោះ​ផ្សេង​ទៀត ដែលភ្ជាប់ការ​ហោះហើរ ពីរដ្ឋធានី អាហ្សេ ទៅរដ្ឋធានី បាម៉ាកូ (Bamako) ប្រទេសម៉ាលី»។

ប្រភពនោះ បានបញ្ជាក់ទៀតថា៖ «សញ្ញាទំនាក់ទំនង បានបាត់បន្ទាប់ពីផ្លូវហោះហើរ បានផ្លាស់ប្ដូរ»។

រហូតមកដល់ម៉ោងនេះ គេនៅមិនទាន់អាចបញ្ជាក់អ្វីឲ្យបានច្រើននៅឡើយ ពីស្ថានការណ៍ដ៏អភ័ព ដែលចេះតែកើត​មានមិនចេះឈប់ នៅក្នុងវិស័យអាកាសចរណ៍ពិភពលោក។ ពីយប់ម្សិលម៉ិញ យន្ដហោះមួយគ្រឿង របស់ក្រុមហ៊ុន​អាកាសចរណ៍តៃវ៉ាន់ឈ្មោះ ត្រេនអេស៊ៀ បានធ្លាក់បោកខ្លួនដែរ នៅលើកោះតូចមួយ ក្បែរនឹងកោះតៃវ៉ាន់ បង្កឲ្យមាន​មនុស្សស្លាប់ប្រមាណជា ៥១នាក់។ ហេតុការណ៍ទាំងពីរភ្លាមៗខាងលើ បានកើតក្រោយតែ១សប្ដាហ៍ប៉ុណ្ណោះ ពីការ​បាញ់ទម្លាក់យន្ដហោះ ម៉ាឡេស៊ីអ៊ែរឡាញ នៅប្រទេសអ៊ុយក្រែន ធ្វើឲ្យមនុស្ស២៩៨នាក់ស្លាប់៕