ហេតុការទាក់ទងនឹង គ្រោះថ្នាក់យន្ដហោះ កើតជាបន្តបន្ទាប់ មួយហើយមួយទៀត។ នៅព្រឹកថ្ងៃទី២៤ ខែកក្កដានេះ ក្រុមហ៊ុនអាកាសចរណ៍ជាតិ អាហ្សេរី បានប្រកាសថា យន្ដហោះរបស់ខ្លួនដែលមានមនុស្សជិះ១១០នាក់ បានបាត់​ពី​កញ្ចក់ត្រួតពិនិត្យរលកអាកាស នៅលើលំហមេឃរបស់ប្រទេស ម៉ាលី។ ការបាត់ខ្លួនដ៏ចម្លែកមួយទៀត ដែលគេ​សង្ស័យ​ថា មានជាប់ពាក់ព័ន្ធនឹងករណីភេវរកម្ម។

យន្ដហោះមួយគ្រៀង របស់ក្រុមហ៊ុនអាកាសចរណ៍ជាតិ អាហ្សេរី។ (រូបថតជំនួស របស់ក្រុមហ៊ុន)

បាត់យន្ដហោះ - ក្រុមហ៊ុនអាកាសចរណ៍ជាតិ របស់ប្រទេសអាហ្សេរី ឈ្មោះ អ៊ែរអាហ្សេរី (Air Algérie) បាន​ប្រកាស​ឲ្យដឹង នៅថ្ងៃព្រហស្បត្តិ៍នេះថា បានបាត់ការទាក់ទង ជាមួយនឹងយន្ដហោះមួយរបស់ខ្លួន នៅ៥០នាទីក្រោយ ពី​យន្ដហោះបានហោះចេញពីរដ្ឋធានី អ៊ូហ្គាឌូហ្គូ (Ouagadougou) ប្រទេសប៊ួគីណា ហ្វាសូ (Burkina Faso - អាហ្វ្រិក​កណ្ដាល) ឆ្ពោះមករដ្ឋធានី អាហ្សេ (Alger) ប្រទេស អាហ្សេរី។

យន្ដហោះ បានដឹកអ្នកដំណើរ១១០នាក់ ចម្រុះគ្រប់ជាតិសាសន៍ ហើយបានបាត់ដំណឹងសូន្យឈឹង នៅពេលដែល​ហោះមកក្នុងលំហអាកាសខាងជើង នៃប្រទេសម៉ាលី។ ក្រុមហ៊ុន អ៊ែរអាហ្សេរី បានថ្លែងនៅក្នុង​សេចក្ដីប្រកាស​ព័ត៌មាន​ថា «ផ្នែកទំនាក់ទំនងចរាចរណ៍អាកាស បានទទួលសញ្ញាចុងក្រោយ ពីយន្ដហោះ នៃជើងហោះហើរ AH 5017 នៅថ្ងៃព្រហស្បត្តិ៍ទី២៤ ខែកក្កដានេះ វេលាម៉ោង ១ និង៥៥នាទី (ម៉ោងក្នុងតំបន់) បន្ទាប់ពីយន្ដហោះ បានហោះ​ចេញពីដី បានប្រមាណជា៥០នាទី»។

សេចក្ដីប្រកាសព័ត៌មាននោះ បានសរសេរទៀតថា៖ «ក្រុមហ៊ុន បានចាត់វិធានការបន្ទាន់មួយ»ឡើយហើយ ដើម្បីតាម​រកយន្ដហោះនេះ។

បើតាមគេហទំព័ររបស់ក្រុមហ៊ុនអាកាសចរណ៍ របស់ប្រទេសអាហ្វ្រិកខាងជើងមួយនេះ បានឲ្យដឹងថា ខ្លួនបានហោះ​ភ្ជាប់ជើង​ហោះហើរនេះ ចំនួន៤ដង នៅក្នុងមួយសប្ដាហ៍។ យន្ដហោះនោះ ជាប្រភេទយន្ដហោះ ម៉ាកដូណែល៨៣ (McDonnell 83) ដែលក្រុមហ៊ុនបានជួលពីក្រុមហ៊ុនមួយទៀត នៅអ៊ឺរ៉ុប។

ការទាក់ទងជាមួយអ្នកបើកបរយន្ដហោះ បានបាត់នៅពេលដែលយន្ដហោះ បានហោះនៅលើលំហនៃប្រទេសម៉ាលី មកជិតដល់ព្រំដែននៃប្រទេសអាហ្សេរី ខាងត្បងហើយ។ ប្រភពមួយបានបង្ហើបថា៖ «គេបានស្នើសុំឲ្យយន្ដហោះ ហោះងាកចេញពីផ្លូវបន្តិច ដោយសារតែបញ្ហាពពកធ្វើឲ្យមើលមិនសូវឃើញ អាចបង្កឲ្យ ជល់នឹងយន្ដហោះ​ផ្សេង​ទៀត ដែលភ្ជាប់ការហោះហើរ ពីរដ្ឋធានី អាហ្សេ ទៅរដ្ឋធានី បាម៉ាកូ (Bamako) ប្រទេសម៉ាលី»។

ប្រភពនោះ បានបញ្ជាក់ទៀតថា៖ «សញ្ញាទំនាក់ទំនង បានបាត់បន្ទាប់ពីផ្លូវហោះហើរ បានផ្លាស់ប្ដូរ»។

បើទោះជាមានអន្តរាគមន៍ ពីកងទ័ពអន្តរជាតិ ក្នុងការកំចាត់ក្រុមអ៊ីស្លាមនិយមជ្រុល ពីផ្នែកខាងជើងនៃ​ប្រទេស​ម៉ាលី​ក៏ដោយ តែគេនៅតែចាត់ទុកថា តំបន់ខាងជើង មានហនិភ័យច្រើននៅឡើយ។ ជនអ៊ីស្លាមនិយមជ្រុល ដែលសុទ្ធ​សឹង​ជាក្រុមស្ម័គ្រស្លាប់ដើម្បីព្រះជាម្ចាស់ (djihad) បានកាន់កាប់តំបន់នោះ តាំងពីឆ្នាំ២០១២មក ហើយមានបណ្ដាញចាក់​ឬស នៅជុំវិញតំបន់ បង្កឲ្យមានភាពស្មុគ្រស្មាញ សម្រាប់កងទ័ពម៉ាលី និងកងទ័ពអន្តរជាតិ ក្នុងការចូលទៅគ្រប់គ្រង់​ទីនោះ៕