បើទោះជាការទទួលខុសត្រូវ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ មិនមាននៅក្នុងហេតុការណ៍ ធ្លាក់​យន្ដហោះ MH17 នៅប្រទេសអ៊ុយក្រែននោះក៏ដោយ តែក្រុមហ៊ុនអាកាសចរណ៍ នៃប្រទេសអាស៊ានមួយនេះ មិន​អាចគេចផុតពីការរិះគន់បានឡើយ ជាពិសេសនៅក្នុងការគ្រប់គ្រងគ្រោះមហន្តរាយទាំងឡាយ របស់ខ្លួន។ បន្ថែមពី​លើនេះ នៅមានជម្រើសយុទ្ធសាស្ត្រ និងគម្រោងផ្លូវហោះហើរនោះទៀត ក៏មានចោទឡើងជាបញ្ហាដែរ។ បូករួម​នឹង​ហេតុការណ៍បាត់ខ្លួន នៃយន្ដហោះ MH370 និងវិបត្តិសេដ្ឋកិច្ចដែលកំពុងរួមរឹតក្រុមហ៊ុននេះស្រាប់ផង អ្នកវិភាគបាន​សម្ដែងការព្រួយបារម្ភថា ម៉ាឡេស៊ីអ៊ែរឡាញ អាចនឹងឈានដល់ទីបញ្ចប់របស់ខ្លួន។

សាច់ញាតិរបស់ជនរងគ្រោះ នៅជិតរូបយន្ដហោះរបស់ក្រុមហ៊ុនម៉ាឡេស៊ីអែឡាញ។ (រូបថត straitstimes.com)

ធ្លាក់យន្ដហោះ - ការទទួលខុសត្រូវរបស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ នៅក្នុងការធ្លាក់យន្ដហោះ MH17 ទំនងជាមិនមានអ្វីជាធំដុំនោះទេ មកទល់នឹងម៉ោងនេះ ដោយសារតែការស៊ើបអង្កេតលើកដំបូងៗ បាន​បង្ហាញ​ថា យន្ដហោះធុនប៊ូអីង ៧៧៧ ដែលហោះចេញពីរាជធានី អាមស្ទែដាម ប្រទេសហូឡង់ ឆ្ពោះទៅរដ្ឋធានី ម៉ាឡេស៊ី ប្រទេសម៉ាឡេស៊ី ជាមួយនឹងមនុស្ស២៩៨នាក់ ត្រូវបានបាញ់ទម្លាក់ដោយច្រឡំ។ ប៉ុន្តែក្រុមហ៊ុនដ៏អភ័ពមួយនេះ ដែល​ទើបនឹងបានបាត់យន្ដហោះមួយទាំងមូល កាលពី៤ខែមុន ទាំងមិនដឹងថានៅឯណាផងនោះ មិនអាច​គេច​ផុតពី​ការ​រិះគន់ជាច្រើន ទាក់ទងនឹងការគ្រប់គ្រង គ្រោះមហន្តរាយរបស់ខ្លួននោះឡើយ។

ខាងក្រោមនេះ ជាការវិភាគរបស់អ្នកជំនាញខាងអាកាសចរណ៍ ដែលនឹងបង្ហាញថា ក្រុមហ៊ុនម៉ាឡេស៊ីអ៊ែរឡាញ អាច​នឹងបិទទ្វា ប្រសិនបើមិនមានកំណែទម្រង់ឲ្យបានខ្លាំងក្លានោះទេ។

ជម្រើសយុទ្ធសាស្ត្រ ដ៏អាក្រក់

កាលពី៧ឆ្នាំមុន ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ ត្រូវបានអ្នកធ្វើដំណើរតាមយន្ដហោះ ស្រឡាញ់​ចូល​ចិត្ត​យ៉ាងខ្លាំង។ នៅថ្ងៃនេះ ក្រុមហ៊ុនមានយន្ដហោះចំនួនប្រមាណជា ៩០ ហើយត្រូវបានចាត់ទុកជាក្រុមហ៊ុនមួយ ក្នុង​ចំណោមក្រុមហ៊ុនអាកាសចរណ៍«ដ៏ល្អៗ»ផ្សេងទៀត នៅក្នុងពិភពលោក។

ប៉ុន្តែថ្នាក់ដឹកនាំ ដែលមិនសូវមានអ្នកចូលចិត្ត និងជម្រើសយុទ្ធសាស្ត្រដ៏អាក្រក់ បានធ្វើឲ្យក្រុមហ៊ុនអាកាសចរណ៍នេះ ធ្លាក់ទៅក្នុងវិបត្តិហិរញ្ញវត្ថុមួយ ដែលមិនធ្លាប់មានតាំងពីក្រុមហ៊ុន បានចាប់កំណើតមក ជាពិសេសនៅ​ចំពោះ​ការមក​ដល់នៃក្រុមហ៊ុនអាកាសចរណ៍បំបាក់តម្លៃ (លក់សំបុត្រថោកៗ) ដែលទើបនឹងកើតថ្មី។ ម៉ាឡេស៊ីអ៊ែរឡាញ បានដឹង​ខ្លួនពីបញ្ហានេះ តែបានប្រតិកម្មយឺតពេល និងថែមទាំងរងគ្រោះនឹងទណ្ឌកម្មនោះថែមទៀត។

ក្រុមបុគ្គលិករបស់ ម៉ាឡេស៊ីអ៊ែឡាញ ដែលមិនចង់ឲ្យមានការផ្លាស់ប្ដូរ បានខាឃាំងគម្រោងការថ្មីៗ របស់ក្រុមហ៊ុន ដែលចង់ឲ្យសេវាកម្មបន្ថោកតម្លៃ មានគុណភាពជាងមុន និងរបៀបរបបធ្វើការបែបផ្សេងទៀត។ ពួកគេដែល​រួមគ្នា​ធ្វើ​ជាសហជីពធំៗនោះ បានប្រឆាំងនូវរាល់ការធ្វើកំណែទម្រង់ណាក៏ដោយ ដែលប៉ះពាល់ដល់ល័ក្ខខ័ណ្ឌ​ការងាររបស់​ពួកគេ។

មួយវិញទៀត ក្រុមហ៊ុនត្រូវប្រឈមនឹងការកំណត់របស់រដ្ឋ ដែលត្រូវបានមានជើងហោះហើរក្នុងស្រុក ហើយទាំង​នេះ​បានធ្វើឲ្យ ម៉ាឡេស៊ីអ៊ែឡាញ កាន់តែជួបផលវិបាកច្រើនឡើង។ បណ្ដាញទូរទស្សន៍ ប្លូមប៊ើន (Bloomberg) របស់​អាមេរិកបានរាយការណ៍ថា ចាប់ពីដើមឆ្នាំ២០១១មក ក្រុមហ៊ុន ម៉ាឡេស៊ីអ៊ែរឡាញ បានខាតបង់មិនតិចជាង ១,៥​ពាន់​លានដុល្លានោះទេ។

ការគ្រប់គ្រងគ្រោះថ្នាក់ ដែលមានលក្ខណៈស្ងាត់ស្ងៀម ដូចចោរលួចសេះ

ថ្នាក់ដឹកនាំរបស់ក្រុមហ៊ុន ម៉ាឡេស៊ីអ៊ែរឡាញ បានរងនូវការរិះគន់យ៉ាងខ្លាំងក្លា ជុំវិញការគ្រប់គ្រងគ្រោះមហន្តរាយ ដែលកើតមានទៅលើសេវាកម្មរបស់ខ្លួន។ បើគ្រាន់តែអត្តសញ្ញាណរបស់ជនរងគ្រោះ នៅលើយន្ដហោះ MH17 (ធ្លាក់​នៅជិតព្រំដែនអ៊ុយក្រែន-រ៉ូស្សី) គេនៅតែមិនយល់ថា ហេតុអ្វីបានជាម៉ាឡេស៊ីអ៊ែរឡាញ ត្រូវការពេលវេលា​រហូត​ដល់​ទៅជាង២០ម៉ោង ដើម្បីឲ្យដឹងថា នៅលើយន្ដហោះមានអ្នកដំណើរប៉ុន្មាននាក់ និងជាជនជាតិអ្វីខ្លះ។

ជាធម្មតា អ្នកដំណើរណាក៏ដោយ ត្រូវតែបង្ហាញលិខិតឆ្លងដែន ទៅឲ្យតំណាងក្រុមហ៊ុន​អាកាសចរណ ដែលមាន​តួនាទី​ធ្វើការត្រួតពិនិត្យ មុននឹងអនុញ្ញតឲ្យអ្នដំណើរនោះ ឡើងលើយន្ដហោះ។ ហើយក្រុមហ៊ុន ត្រូវមាន​ឧបករណ៍​មួយសម្រាប់ធ្វើការកត់ត្រាទុក ពីអ្នកដំណើរនោះ ជានរណា មកពីណា ជនជាតិអ្វី។ល។ តែម៉ាឡេស៊ីអ៊ែរឡាញ មិន​ធ្វើដូច្នេះទេ ព្រោះបានទុកឲ្យក្រុមគ្រួសារជនរងគ្រោះ ត្រូវរងចាំក្នុងរយៈពេលមួយយ៉ាងយូរ ទាំងមិនដឹងថា​តើញាតិ​មិត្តរបស់ខ្លួនស្លាប់ឬរស់។

ដោយឡែក នៅក្នុងការបាត់ខ្លួនយន្ដហោះ MH370 គ្រួសារជនរងគ្រោះ មិនដែលយល់ទាល់តែសោះថា ហេតុអ្វី​បាន​ជាក្រុមហ៊ុនអាកាសចរណ៍ ត្រូវរងចាំ១៧ថ្ងៃ មុននឹងប្រកាសតាម SMS ពីមរណភាពរបស់អ្នកដំណើរទាំង​២៣៩នាក់។ មិនត្រឹមតែប៉ុណ្ណោះ ក្រុមគ្រួសារជនរងគ្រោះ កាន់តែក្ដៅក្រហាយខ្លាំងជាងនេះនោះ គឺក្រុមហ៊ុនអាកាសចរណ៍​មួយ​នេះ មិនសូវជាបានប្រកាសពីដំណឹងអ្វីឲ្យបានលំអិត ជុំវិញការបាត់ខ្លួនរបស់យន្ដហោះមួយនេះទេ។

គម្រោងផ្លូវហោះហើរ ដែលបង្កមន្ទិល

នាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក (Najib Razak) បាននិយាយថា៖ «ផ្លូវដែលយន្ដហោះ MH17 បាន​ហោះហើរ ត្រូវ​បានប្រកាសថាមាន សុវត្ថិភាព ដោយអង្គការអាកាសចរណ៍អន្តរជាតិ ហើយអង្គការនេះបានបញ្ជាក់​ទៀតថា លំហអាកាស​ដែលយន្ដហោះបានឆ្លងកាត់ មិនត្រូវបានធ្វើការហាមឃាត់អ្វីនោះទេ»។

ការប្រកាសនេះ បានបង្កឲ្យមានមន្ទិលពីលំហរអាកាស ដែលក្រុមហ៊ុនអាកាសចរណ៍ នៃប្រទេសអាស៊ី​ភាគអាគ្នេយ៍​មួយនេះ ត្រូវកំណត់ឲ្យហោះហើរ។ ក្រុមហ៊ុនអាកាសចរណ៍ ក្នុងពិភពលោកជាច្រើន បានសម្រេចចិត្តឈប់​ធ្វើការ​ឆ្លង​កាត់ពីលើលំហអាកាសខាងកើត នៃប្រទេសអ៊ុយក្រែននោះទៀត តាំងពីជម្លោះប្រដាប់អាវុធ បានកើតឡើង រវាង​កង​ទ័ពអ៊ុយក្រែន និងក្រុមអ្នកបំបែកទឹកដី ស្និតនឹងប្រទេសរ៉ូស្សី។ មិនត្រឹមតែប៉ុណ្ណឹង ព័ត៌មានពីការបាញ់ធ្លាក់​យន្ដហោះ​យោធាអ៊ុយក្រែន ដោយក្រុមអ្នកបំបែកទឹកដី ទើបតែបានប្រកាសនៅមុនហេតុការណ៍ MH17 តែប៉ុន្មានថ្ងៃប៉ុណ្ណោះ។ តែផ្ទុយទៅវិញ ម៉ាឡេស៊ីអ៊ែរឡាញ ជាក្រុមហ៊ុនមួយ ក្នុងចំណោមក្រុមហ៊ុនអាកាសចរណ៍ដ៏តិចតួចបំផុត ក្នុងលោក ដែលបានសម្រេចចិត្តធ្វើការហោះហើរ នៅពីលើតំបន់សង្គ្រាមដ៏គ្រោះថ្នាក់នេះ៕