តារា - តារាចម្រៀងប្រចាំផលិតកម្មថោន លោក ករុណា ពេជ្រ ត្រូវបានគេដឹងថា ជាតារាចម្រៀង​ដែល​បាន​ចេញ​មុខចេញមាត់ខ្លាំងក្នុងការឃោសនា រកសម្លេងឆ្នោតឱ្យគណបក្សប្រជាជនកម្ពុជា កាលពីឆ្នាំ២០១៣។ ការប្រឹងប្រែង​របស់ តារាចម្រៀង ករុណា ពេជ្រ ត្រូវបានគេមើលឃើញថា មិនអត់ប្រយោជន៍នោះទេ ព្រោះពេលនេះ តារាចម្រៀង​ដែលតែងតែឡើងច្រៀង លើឆាកតន្រ្តីបំរើអារម្មណ៍ទស្សនិកជនរូបនេះ កំពុងទទួលបានការ​ជ្រោមជ្រែង​យ៉ាងខ្លាំង​ពី​លោក ហ៊ុន ម៉ានី កូនប្រុសរបស់លោក ហ៊ុន សែន និងជាតំណាងរាស្រ្តមណ្ឌលកំពង់ស្ពឺ ហើយគេក៏បានដឹងដែរថា នៅ​ពេលនេះ ករុណា ពេជ្រ បានក្លាយជាជំនួយការផ្ទាល់ដ៏ជំនិតម្នាក់ របស់លោក ហ៊ុន ម៉ានី ផងដែរ។

ជាញឹកញាប់ គេតែងឃើញវត្តមានរបស់ ករុណា ពេជ្រ ទៅណាមកណា ជាមួយនឹងលោក ហ៊ុន ម៉ានី ក្នុងភាព​ស្និទ្ធ​ស្នាល ដូចកាលពីថ្ងៃទី១៣ កក្កដា កន្លងមកនេះ នៅពេលដែលលោក ហ៊ុន ម៉ានី បានចុះទៅចែកអំណោយ ក្នុងខេត្ត​កោះកុង និងព្រះសីហនុ គេក៏បានឃើញវត្តមានរបស់តារាចម្រៀង ករុណា ពេជ្រ ដើរតួជាជំនួយការផ្ទាល់ដែរ។

ចំពោះសកម្មភាពដែលស្និទស្នាលជាញឹកញាប់នេះ នេះត្រូវបានទស្សនិកជន ដែលតាមដានសកម្មភាព​របស់​តារា​ចម្រៀង​​រូបនេះ លើកឡើងថា គឺដើម្បីឆក់យកឱកាស ឬក៏សម្លឹងឃើញតំណែងណាមួយ នៅក្នុងជួររដ្ឋាភិបាល​ជាក់​ជាមិនខាន។

ប៉ុន្តែតាមរយៈសារព័ត៌មានក្នុងស្រុកមួយ តារាចម្រៀងជួរមុខរបស់ថោនរូបនេះ បានបដិសេធភ្លាមៗតែម្តង ចំពោះ​ការលើកឡើងខាងលើនេះ។

លោក ករុណា ពេជ្រ បានពន្យល់យ៉ាងដូច្នេះថា៖ «ខ្ញុំបានឮច្រើន ពីការលើកឡើងដោយចំៗនេះ តែខ្ញុំសុំបញ្ជាក់ថា ខ្ញុំមិនសម្លឹង ឬចង់បានតំណែងអ្វីមួយទេ។ នៅពេលនេះ ខ្ញុំគ្មានតួនាទីនៅក្នុងស្ថាប័នរដ្ឋណាមួយនោះទេ តែអ្វីដែល​ខ្ញុំធ្វើ ជាឆន្ទះ និងទឹកចិត្តផ្ទាល់។ មានគេថា ថ្ងៃណាមួយ នៅពេលយើងអស់ប្រយោជន៍ឱ្យគេ គេនឹងទាត់យើងចោល តែសម្រាប់ខ្ញុំ អ្នកណាទាត់ចោល ឬមិនទាត់ចោលស្អី បើយើងគ្រាន់តែធ្វើអ្វីជាការងារសង្គមប៉ុណ្ណឹងនោះ។»៕