យុត្តិធម៌ - ក្នុងដីកាកោះដែលចុះហត្ថលេខា ដោយចៅក្រមស៊ើបសួរ សាលាដំបូងរាជធានីភ្នំពេញ លោក កែវ មុនី បានឲ្យដឹងថា អញ្ជើញឈ្មោះ កឹម សុខា ភេទប្រុស អាយុ៦១ ឆ្នាំ ជាតិខ្មែរ ជាអ្នកទទួលខុសត្រូវក្នុងនាមមេដឹកនាំ​គណបក្សសង្រ្គោះជាតិ មានទីលំនៅផ្ទះលេខ៩៧ ផ្លូវលេខ៣១៣ ក្រុម៣៨ ភូមិ៧ សង្កាត់បឹងកក់២ ខណ្ឌទួលគោក រាជធានីភ្នំពេញ។

ដីកាកោះហៅរបស់សាលាដំបូងរាជធានីភ្នំពេញ ដែលត្រូវបានប្រគល់ជូនដល់តំណាង​ របស់គណបក្សសង្រ្គោះ​ជាតិ​ នៅថ្ងៃទី១៧ ខែកក្កដា ឆ្នាំ២០១៤ នេះបានកំណត់ថា៖ «ឲ្យ (កឹម សុខា មេដឹកនាំគណបក្សសង្រ្គោះជាតិ) ចូលទៅកាន់​សាលាតំបូងរាជធានីភ្នំពេញ ជាន់ទី៣ បន្ទប់(គ) នៅថ្ងៃទី២៥ ខែកក្កដា ឆ្នាំ២០១៤ ត្រឹមវេលាម៉ោង៨ព្រឹក។»

ក្រោយការចេញដីកាកោះរបស់សាលាដំបូងរាជធានីភ្នំពេញ គណបក្សសង្រ្គោះជាតិ តាមរយៈសេចក្តីប្រកាស​ព័ត៌មានរបស់ខ្លួនមួយច្បាប់ ចុះថ្ងៃទី១៧ ខែកក្កដា ឆ្នាំ២០១៤ នេះបានធ្វើការស្នើជាសាធារណៈ ដល់សាធារណជន តំណាងទូត និងអ្នកសារព័ត៌មាន ជាតិ-អន្តរជាតិ គម្បីចូលរួមសង្កេតការណ៍ និងឃ្លាំមើលផងដែរ ជុំវិញបញ្ហាអស់​ទាំងនេះ។

សម្រាប់លោកកឹម សុខា ប្រធានស្តីទីគណបក្សសង្រ្គោះជាតិ មិនទាន់ប្រតិកម្មអ្វីទៅនឹងដីកាកោះ​របស់សាលាដំបូង​រាជធានីភ្នំពេញនៅឡើយទេ។ តែលោក កឹម សុខា ដោយសំអាងលើស្ថានការណ៍នយោបាយ នៅក្នុងប្រទេសកម្ពុជា​បច្ចុប្បន្ន និងសេចក្តីត្រូវការចាំបាច់បំផុតរបស់ប្រជាពលរដ្ឋខ្មែរ បានចុះសត្ថលេខាលើលិខិតអញ្ជើញមួយចុះថ្ងៃទី១៧ ខែកក្កដា ឆ្នាំ២០១៤ នេះ ដោយតម្រូវឲ្យបេក្ខជនតំណាងរាស្ត្រជាប់ឆ្នោត របស់គណបក្សសង្រ្គោះជាតិទាំងឡាយណា ដែលកំពុងស្នាក់នៅបរទេស ត្រូវត្រលប់ចូលប្រទេសកម្ពុជាវិញ លើកលែងអ្នកមានបញ្ហាសុខភាពធ្ងន់ធ្ងរ៕