ផ្អែកលើមូលដ្ឋានការពារកុំមានសកម្មភាពញុះញង់ អុចអាលបង្កឲ្យមានអំពើហិង្សា ក្រោមរូបភាពនៃការធ្វើបាតុកម្ម កូដកម្ម និងការទាមទារតវ៉ានានា រដ្ឋមន្រ្តីក្រសួងមហាផ្ទៃលោកស ខេង បានដាក់កំហិត ដល់បណ្តាខេត្តទាំងអស់ ត្រូវទប់ស្កាត់ សកម្មភាពទាំងនោះ។ ការចេញបទបញ្ជារបស់ក្រសួងមហាផ្ទៃ ធ្វើឡើងភ្លាមៗ បន្ទាប់ពីការចាប់ឃាត់​ខ្លួនបេក្ខជនតំណាងរាស្រ្ត របស់គណបក្សសង្រ្គោះជាតិ ដែលនាំឲ្យមានប្រតិកម្មទាមទារឲ្យដោះលែងជាបន្ទាន់។

លោក សរ ខេង ថ្លែងនៅថ្ងៃ​ទី០៩ ខែមេសា ឆ្នាំ២០១៤។ (រូបថត MONOROOM.info/ S. Tith)

សិទ្ធិ - ក្នុងលិខិតមួយច្បាប់ ចុះហត្ថលេខាដោយរដ្ឋមន្រ្តីក្រសួងមហាផ្ទៃលោក ស ខេង នៅគ្រាចុងក្រោយនេះ បាន​បញ្ជាក់ថា៖ «ក្រសួងមហាផ្ទៃស្នើឧត្តមអភិបាលរាជធានីខេត្ត ណែនាំដល់អាជ្ញាធរ និងកម្លាំងមានសមត្ថកិច្ច គ្រប់​លំដាប់ថ្នាក់ឲ្យស្រាវជ្រាវ និងចាត់វិធានការណ៍ស្របច្បាប់ ក្នុងករណីមានសកម្មភាពញុះញង់ អុចអាលបង្កឲ្យមាន​អំពើហិង្សា ក្នុងសង្គម តាមគ្រប់រូបភាព»។

បទបញ្ជានេះ បានធ្វើឡើងបន្ទាប់ពីការប៉ះទង្គិចដ៏ហិង្សាមួយ បានកើតឡើងនៅទីលាន​ប្រជាធិបតេយ្យ ​កាល​ពី​ថ្ងៃទី​១៥ ខែកក្កដា ម្សិលម៉ិញនេះ រវាង​ក្រុមបាតុករដឹកនាំដោយក្រុមបេក្ខជនតំណាងរាស្ត្រជាប់ឆ្នោត របស់គណបក្ស​សង្គ្រោះជាតិ និងក្រុមសន្តិសុខឯកជន ដែលជួលដោយសាលាខណ្ឌ និងសាលារាជធានី។ ការប៉ះទង្គិចនោះ បានធ្វើ​មនុស្សមិនតិចជាង៤០នាក់ បាន​រង​របួសទាំងសងខាង។ ប៉ុន្តែមកទល់នឹងថ្ងៃទី១៦ ខែកក្កដានេះ បេក្ខជនតំណាង​រាស្ត្រជាប់ឆ្នោត គណបក្សសង្គ្រោះជាតិចំនួនប្រាំរូប និងយុវជនជាសកម្មជនមួយរូប ត្រូវបាន​ចាប់​ខ្លួន និងបញ្ជូនទៅ​ឃុំខ្លួន នៅ​ពន្ធនាគារព្រៃសរ។

ដោយមិនបញ្ជាក់ចំឈ្មោះ លិខិតដដែលរបស់លោក ស ខេង នោះបានពន្យល់ថា កន្លងមកក្រុមអនាធិបតេយ្យនានា បានដើរធ្វើ​សកម្មភាព​ញុះញង់ អុចអាលប្រឌិតបញ្ហានានាក្នុងសង្គម បំផុសប្រជាពលរដ្ឋឲ្យប្រើអំពើហិង្សា និង​សកម្មភាពរំលោភ​ច្បាប់ក្រោមរូបភាព នៃការប្រមូលផ្តុំធ្វើបាតុកម្ម កូដកម្ម និងការទាមទារតវ៉ានានា ប៉ុនប៉ងឲ្យមាន​អស្ថិរភាព​នយោបាយ និងប៉ះពាល់ដល់សន្តិសុខ សណ្តាប់ធ្នាប់ របៀបរៀបរយសង្គម។

ផ្ទុយពីបទបញ្ជារបស់រដ្ឋមន្ត្រីក្រសួងមហាផ្ទៃ​ខាងលើ លោក ស៊ូរិយ៉ា ស៊ូប៊ែឌី អ្នករាយការណ៍ពិសេស អង្គការ​សហ​ប្រជាជាតិ ស្តីពីស្ថានភាពសិទ្ធិមនុស្សនៅកម្ពុជា បាន​ស្នើ​ដល់​រដ្ឋាភិបាល​កម្ពុជា គម្បីទម្លាក់ចោលភ្លាមនូវការរឹតបន្តឹង ដែលកំពុងដាក់ទៅលើការជួបប្រជុំគ្នារបស់ពលរដ្ឋកម្ពុជា។

ក្នុងសេចក្ដីអំពាវនាវមួយ ដែលទស្សនាវដ្ដីមនោរម្យ.អាំងហ្វូ ទទួលបានកាលពីថ្ងៃទី១៦ ខែកក្កដាម្សិលម៉ិញនេះ អ្នក​រាយការណ៍ពិសេសរបស់អង្គការសហប្រជាជាតិ បានសង្កត់ធ្ងន់​ថា៖ «ខ្ញុំសូមអំពាវនាវដល់រដ្ឋាភិបាល ឲ្យធានា​នូវ​សិទ្ធិដែលមានចែងនៅក្នុងរដ្ឋធម្មនុញ្ញ ស្ដីពីការជួបប្រជុំដោយ​សន្តិវិធី សម្រាប់ប្រជាជនកម្ពុជាទាំងអស់។»

លោក ស៊ូរិយ៉ា ស៊ូប៊ែឌី ក្នុងអំឡុងពេលមកបំពេញបេសកម្មនៅកម្ពុជា នៅប៉ុន្មានខែមុននេះ បានព្រមានថាប្រទេស​កម្ពុជា​អាចនឹងជួបវិបត្តិជ្រាលជ្រៅមួយ ដែលនាំឲ្យមានផលលំបាកក្នុងការដោះស្រាយ ប្រសិនបើរដ្ឋាភិបាល​ប្រទេសកម្ពុជា គ្មានឆន្ទៈពិតប្រាកដក្នុងការធ្វើកំណែទម្រង់។

ប្រធានស្តីទីរបស់គណបក្សសង្រ្គោះជាតិលោក កឹម សុខា ក្នុងសន្និសីទការសែតនៅថ្ងៃម្សិលមិញ​បានពន្យល់​ថា​ ការប៉ះទង្គិចគ្នា ក្នុងការធ្វើបាតុកម្មកន្លងមក ភាគច្រើនផ្តើមចេញពីសមត្ថកិច្ចរដ្ឋាភិបាល ហើយថាការការចាប់ខ្លួន បេក្ខជនតំណាងរាស្រ្តរបស់គណបក្សសង្រ្គោះជាតិ បានធ្វើឲ្យប៉ពាល់យ៉ាងធ្ងន់ធ្ងរដល់សិទ្ធិសេរីភាពបញ្ចេញមតិ និងលិទ្ធិប្រជាធិបតេយ្យនៅកម្ពុជា។

លោកកឹម សុខា ក៏បានបង្ហើបពីលទ្ធភាពនៃការធ្វើបាតុកម្មអហិង្សាដែលផ្តើមចេញពីពលរដ្ឋស្នេហាយុត្តិធម៌ និង​មធ្យោបាយស្របច្បាប់ផ្សេងទៀត ជាចំណាត់ការរបស់គណបក្សសង្រ្គោះជាតិ ប្រសិនបើមិនមានការដោះលែង​បេក្ខជនតំណាងរាស្រ្តរបស់គណបក្សសង្រ្គោះជាតិ៕