ជីវិត និងធម្មជាតិ - «អារ៉ែង»ជាតំបន់មួយពោរពេញដោយព្រៃឈើធំៗ សត្វដ៏កម្រដូចជាក្រពើភ្នំ ត្រីនាគ ជិតផុត​ពូជរហូតដល់៣១ប្រភេទ និងអាចចាត់ទុកថា ជាតំបន់លេខមួយនៅទូទាំងប្រទេស ជាពិសេសសឹងតែនៅលើតំបន់ ទូទាំងអាស៊ីអាគ្នេយ៍ថែមទៀត។ លោក អេឡិច ដាវីដសុន ជាតិអាឡឺម៉ង់និងជាប្រធាននៃ​ក្រុម​មាតា​ធម្មជាតិ បាន​គិតថាតំបន់អារ៉ែង ជាបេះដូងខ្មែរ លើផ្នែកធម្មជាតិ ហើយលោកបានស្នើ ឲ្យរដ្ឋាភិបាលធ្វើការអភិវឌ្ឍ៍​ផ្នែក​ទេសចរណ៍ ជាជំនួសលើការអភិវឌ្ឍន៍ផ្នែកវ៉ារីអគ្គីសនីវិញ។

ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ លោក អាឡិច បានថ្លែងលើកឡើង ពីការព្រួយបារម្ភថា កាល​ពី​ថ្ងៃទី២៥ ខែមិថុនាកន្លងមក អភិបាលរងខេត្តកោះកុង​ បានចុះទៅបំភិតបំភ័យប្រជាពលរដ្ឋ និងបោកប្រជាជន តាម​រយៈការចែកប៊ីចេងម្នាក់១កញ្ចប់ ដើម្បីឲ្យ​ប្រជាពលរដ្ឋ​ទាំងនោះឯកភាព និងគាំទ្រការលើកឡើងរបស់ខ្លួន (អភិបាល​រងខេត្ត) ក្នុងការជម្រុញឲ្យមាន​ការសាងសង់​ទំនប់​វារីអគ្គីសនី និងការចាកចេញដោយស្ម័គ្រចិត្តរបស់​ប្រជា​ពលរដ្ឋ។

ប្រធាននៃ​ក្រុម​មាតា​ធម្មជាតិរូបនេះ ដែលបានចាត់ទុកតំបន់«អារ៉ែង»ស្ថិតនៅស្រុកថ្មបាំង ខេត្តកោះកុង ជា«ស្ថាន​សួគ៍អារ៉ែង»នោះ បានលើកឡើងទៀតថា មានការបង្កើតក្រុមទាហានថ្មីៗ ចំនួនប្រមាណជាជាង៣០នាក់ ដែល​ទំនងជាមកការពារក្រុមហ៊ុន ហ៊ូណូហាយត្រូ និងមិនមែនមកការពារ និងធានាសុវត្ថិភាពប្រជាពលរដ្ឋ​ដូច​ការលើក​ឡើង របស់មេបញ្ជាការខេត្តកោះកុងនោះទេ។ ក្រុមហ៊ុនចិន ហ៊ីណូហាយត្រូ ដែលមានលទ្ធភាពគ្រប់គ្រាន់ ទាំង​ប្រាក់​ទាំង​អាជ្ញាប័ណ្ណ ក្នុងការចូលទៅឈូសឆាយ និងកាប់បំផ្លាញឈើ នៅក្នុងតំបន់អារ៉ែងនោះ។

ស្ថាបនិកអង្គការចលនាមាតាធម្មជាតិលោក អេឡិច ដាវីដសុន។ (រូបថត MONOROOM.info/ O. Vary)

លោកបានបន្តទៀតថា ក្រុម​ការងារមាតាធម្មជាតិ ក្រុមយុវជន និងដោយមានកិច្ចសហការ ពីសំណាក់​ប្រជា​ពលរដ្ឋ​មូលដ្ឋាននោះផង បារម្ភខ្លាចមានសកម្មភាខុសច្បាប់ណាមួយកើតឡើង។

ប៉ុន្តែសកម្មភាពរបស់លោក និងក្រុមរបស់លោក ជារឿយៗត្រូវបានចោទប្រកាន់ ពីអាជ្ញាធរមូលដ្ឋាន រដ្ឋាភិបាល ថាជាក្រុមបក្សប្រឆាំង ឬជាក្រុមដែលត្រៀមយកដីប្រជាពលរដ្ឋ មកជាកម្មសិទ្ធិរបស់ខ្លួនជាដើម។ ប្រឈម​នឹង​ការ​ចោទប្រកាន់ខាងលើ លោក អាឡិច បានអះអាងថា៖ «ឧបសគ្គ ជាចំណុចមួយវិជ្ជមានសម្រាប់ពួកខ្ញុំ។ ខ្ញុំគ្មានអ្វី ដែលត្រូវខ្លាចនោះទេ។»៕