ជន់ជោរដោយក្ដីប្រច័ណ្ឌ បុរសម្នាក់បានបំបាក់ខ្ទង់ច្រមុះ របស់នាងជាសង្សារស់នៅជាមួយគ្នា បន្ទាប់ពីនាងបាន​ដាក់​រូបថតដ៏ស្រស់ស្អាត នៅលើគណនីហ្វេសប៊ុករបស់ខ្លួន ហើយសម្បូរទៅដោយ អ្នកចុច«ចូលចិត្ត»ច្រើនពេក។

រូបថតជំនួស ស្ត្រីយកដៃខ្ទប់ច្រមុះ។ (រូបថត MONOROOM.info/ D. KEO)

ទស្សនាវដ្ដីមនោរម្យ.អាំងហ្វូ បានស្វែងរកព្រឹត្តិការណ៍ដ៏កម្រៗ កើតមានពីគ្រប់ទីកន្លែងក្នុងលោក មកជូន​ប្រិយ​មិត្ត​អ្នកអានរបស់ខ្លួន។

ប្រច័ណ្ឌ - ហេតុតែក្ដីប្រច័ណ្ឌ បានធ្វើឲ្យមនុស្សក្លាយជា មានមោហ៍បាំង លែងដឹងអ្វីទាំងអស់។ ប៉ុន្តែជំហាន​ដែល​ឈាន ទៅដល់បំបាក់ខ្ទង់ច្រមុះរបស់សង្សាខ្លួន ទំនងជាបណ្ដាលមកពីយោបល់ វាចា ដែលសរសេរឡើងដោយ បុរសអតីតសង្សាចាស់របស់នាង ទៅលើរូបថតនោះ។ នេះបើតាមសេចក្ដីរាយការណ៍ របស់សារព័ត៌មានអង់គ្លេស Daily Mirror។

បុរសឈ្មោះ ដេវិដ រីឆារដ៍ (David Richards) អាយុ៤១ឆ្នាំ រស់នៅជាមួយសង្សារបស់ខ្លួន នាង អាលីសុន វីល្លីយ៉ាម (Alison Williams) ក្នុងតំបន់ភាគខាងត្បូង នៃប្រទេសអង់គ្លេស បានខឹងក្រេវក្រោវ ផ្ទុះកំហឹងឡើង ដោយសារតែ​ទ្រាំ​មិនបាននឹង យោបល់វាចា ដែលប្រិយមិត្តរបស់នាង អាលីសុន សរសេរនៅលើរូបថតរបស់នាង។

រូបនៅលើជញ្ជាំង ប្រូហ្វាល់ (profil)  របស់នាង អាលីសុន អាយុ៣៩ឆ្នាំ មិនត្រឹមតែទទួលបានការចូលចិត្ត និង​យោបល់​វាចាសរសើរ ពីសំណាក់ប្រិយមិត្តរបស់នាងប៉ុណ្ណោះទេ តែថែមទាំងសង្សាចាស់របស់នាង ក៏បានចូល​មកសរសេរជាមួយគេឯងដែរថា៖ «អ្នកឯង ចំជាស្អាតអស្ចារ្យមែន»។ នាង អាលីសុន បានឆ្លើយតបទៅវិញថា៖ «អរគុណ»។

ប៉ុន្តែការឆ្លើយឆ្លងគ្នាខាងលើ ទំនងជាបានដុតបញ្ឆេះសង្សាថ្មី រហូតទ្រាំមិនបាន ក៏ស្ទុះមកវាយនាង បណ្ដាលឲ្យបាក់​ខ្ទង់ច្រមុះភ្លាមមួយរំពេច។ នៅក្នុងសវនាការកាត់ក្ដី លោក ដេវិដ រីឆារដ៍ បានទទួលស្គាល់កំហុស និងបានថ្លែងប្រាប់​ចៅក្រមថា ខ្លួនបានឲ្យក្រណាត់ទៅនាង អាលីសុន ដើម្បីជូតឈាមដែលហូរពីរបួស។ នៅទ្វីបអ៊ឺរ៉ុប អំពើហិង្សាក្នុង​គ្រួសារ បានជំរុញឲ្យច្បាប់ ដាក់កំហិតយ៉ាងតឹងតែងទៅលើជនបង្ក។ ប៉ុន្តែសាលក្រម ដាក់ទោសលើលោក រីឆារដ៍ នឹងត្រូវប្រកាសឲ្យដឹង នៅថ្ងៃខាងមុខ៕