ក្រោយពីលេចលឺដំណឹងថា តារាសាច់សខ្ចី កញ្ញា វ៉ាឌី ភាលីង ត្រៀមវិលរកអាជីពដើម ជាអ្នកចម្រៀងវិញនោះ  ឥលូវ​នេះ​ដំណឺងនោះ បានក្លាយជាការពិតមែន។ បើសូម្បីរូបកញ្ញាផ្ទាល់ ក៏ទទួលស្គាល់យ៉ាងពេញទំហឹង គឺកញ្ញា​បាន​ចូល​ចាប់ផ្តើមអាជីពនេះជាថ្មី ក្នុងផលិតកម្មចម្រៀង ដាយអ៊ឺមេន ញូសិក (Diamond Music)។

កញ្ញា វ៉ាឌី ភាលីង (រូបកណ្ដាល)។ (រូបថតហ្វេសប៊ុក)

តារា - អតីតតារាចម្រៀងស្រី និងជាសមាជិកក្រុមចម្រៀងរៃមាស តោមាស កញ្ញា វ៉ាឌី ភាលីង ថ្មីៗនេះ លេចឮ​ដំណឹង​មកថា វ៉ាឌី ភាលីង បានវិលមកប្រកបអាជីពចាស់ជាអ្នកចម្រៀង ក្រោយពីដកខ្លួនពីសង្វៀនសិល្បៈចម្រៀង​ជិត៣ឆ្នាំ មកហើយនោះ។

ដំណើរវិលរកឆ្នាំងចាស់នេះ ត្រូវបានគេដឹងថា តារាចម្រៀងសាច់សខ្ចី ដែលទទួលបានប្រជាប្រិយភាព ផ្តើម​ល្បីគួរ​សមនៅអំឡុងឆ្នាំ២០១០រូបនេះ បានចូលទៅជ្រកក្រោមដំបូលផលិតកម្មតែមួយ ជាមួយប្អូនប្រុសបង្កើត គឺផលិតកម្ម ដាយអ៊ឺមេន ញូសិក ហើយនៅចាំតែថ្ងៃចេញបទចម្រៀងមកលក់ តែប៉ុណ្ណោះ។

ក្រោយពីស្រូបបាន នូវប្រជាប្រិយភាពល្បីឈ្មោះគួរសម ក្នុងឆ្នាំ២០១០ កញ្ញា វ៉ាឌី ភាលីង បានបាត់មុខចេញពី​សង្វៀន​សិល្បៈ ព្រមជាមួយនឹងដំណឹងចរចាមអារាមថា កញ្ញាបានជួបស្នេហាជាអ្នកមានទ្រព្យស្តុកស្តមម្នាក់ ខណៈ​អតីតសង្សារដែលល្បី ក្នុងវិថីសិល្បៈជាមួយគ្នា លោក អ៊ិន សុផាណូ ទៅរៀបការជាមួយ តារាចម្រៀង និងកំប្លែង អ្នកនាង ខាត់ សុឃីម។ ហើយការលេចមុខ ចូលពិភពសិល្បៈជាថ្មីនេះ ត្រូវបានគរសង្ស័យប្រហែលជា វ៉ាឌី ភាលីង ទំនងជាបែកបាក់ជាមួយបុរស អ្នកមានទ្រព្យសម្បត្តិម្នាក់នោះហើយ ទើបកញ្ញាត្រឡប់មករកឆ្នាំងបាយចាស់វិញ។

ជាមួយនឹងការទទួលស្គាល់ថា ខ្លួនពិតជាចូលច្រៀងក្នុងផលិតកម្ម ដាយអ៊ឺមេន ញូសិក កញ្ញា វ៉ាឌី ភាលីង បាន​ច្រាន​ចោលព័ត៌មានទាំងអស់ ដែលបានលើកឡើងថា ការដកខ្លួនពីវិថីសិល្បៈកាលពីប៉ុន្មានឆ្នាំមុននោះ ព្រោះតែខ្លួនជួប​ស្នេហ៍ជាមួយបុរសអ្នកមានទ្រព្យ។ នេះបើតាម ការលើកឡើងរបស់តារារូបនេះ ជាមួយសារព័ត៌មានក្នុងស្រុកមួយ។ កញ្ញាបានអះអាងថា៖ «គ្មានទាក់ទងស្នេហាបែកបាក់ប្រេះឆាអីទេ ការចូលសិល្បៈវិញ ជាការពេញចិត្តរបស់ខ្ញុំ ព្រោះ​ថាមុននោះ ក៏ខ្ញុំដកខ្លួនពីសិល្បៈនោះក៏មិនមែនហេតុផលដូចគេ លើកឡើងថា ខ្ញុំមានស្នេហាជាមួយឧកញ៉ា ឱ្យខ្ញុំ​ដក​ខ្លួនពីសិល្បៈដែរ។ ការដកឃ្លាមុននោះ គឺដោយសារបញ្ហាសុខភាពមែន តែពេលនេះសុខភាពខ្ញុំល្អប្រសើរវិញហើយ រឿងអីខ្ញុំមិនចូលសិល្បៈវិញ?»៕