សេសានក្រោម២ - ពលរដ្ឋ ១២គ្រួសារ ដែលរងផលប៉ះពាល់ ស្ថិតក្នុងភូមិផ្លូក ស្រុកផ្លូក ត្រូវបានជម្លៀស​ទៅកាន់​ទីតាំងថ្មី ដែលភាគច្រើនមិនពេញចិត្តទៅនឹងសំណង និងនីតិវិធី នៅក្នុងការរុះរើដោះដូរទីតាំងលំនៅថ្មីនេះ។ យ៉ាង​ណាក៏ដោយ ពលរដ្ឋទាំងនោះ ទាមទាឲ្យរដ្ឋាភិបាលបង្ហាញព័ត៌មាន ទាក់ទងទៅនឹងការសាងសង់​ទំនប់នេះជា​សាធារណៈ ជាមួយនឹងការបើកចំហរព័ត៌មាន ព្រមទាំងឲ្យមានការប្រឹក្សាជាសាធារណៈ ដោយរួមបញ្ចូលទាំងសម្លេង ក៏ដូចជាក្តីព្រួយបារម្ភ ទាក់ទងទៅនឹងការសាងសង់ទំនប់នេះ។

ដោយមូលហេតុនេះ លោក តឹក វណ្ណារ៉ា នាយកប្រតិបត្តិ នៃវេទិកានៃអង្គការមិនមែនរដ្ឋាភិបាលស្តីពីកម្ពុជា អ្នក​តំណាងមកពីសម្ព័ន្ធទន្លេកម្ពុជា ប្រជាជនតំណាងសហគមន៍ ពីតំបន់សាងសង់ទំនប់វារីអគ្គីសនីសេសានក្រោម២ បាន​សហការរៀបចំឡើងនូវ វេទិកា​សន្និសិទ្ធសារព័ត៌មាន ដើម្បីផ្តល់ឱកាសទៅដល់សហគមន៍ធ្វើការចែករំលែក នូវ​ក្តី​ព្រួយបារម្ភ និងមតិ​យោបល់​របស់ពួកគាត់ជូនទៅដល់ភ្នាក់ងាររដ្ឋាភិបាល ក៏ដូចជាសាធារណៈជន​ទាំងអស់​បាន​ដឹងលឺ។

វេទិកាសន្និសិទ្ធសារព័ត៌មាននេះ និងត្រូវបានធ្វើឡើងក្នុងថ្ងៃទី១ ខែកក្កដា ឆ្នាំ២០១៤ វេលាម៉ោង០៩.០០ ដល់ ១០.០០នាទីព្រឹក នៅវេទិកានៃអង្គការមិនមែនរដ្ឋាភិបាល ស្តីពីកម្ពុជាអាស័យដ្ឋានផ្ទះលេខ៩-១១ ផ្លូវលេខ​៤៧៦ សង្កាត់ទួលទំពូងទីមួយ ភ្នំពេញ។

លោក តឹក វណ្ណារ៉ា នាយកប្រតិបត្តិនៃវេទិកា នៃអង្គការមិនមែនរដ្ឋាភិបាល ស្ដីពីកម្ពុជា ធ្លាប់បានលើកឡើងថា «អ្នកភូមិរាប់ពាន់នាក់ នៅក្នុងតំបន់ប្រឈមផលប៉ះពាល់ បានទទូចស្នើសុំឲ្យ អគ្គរដ្ឋទូតនិងរដ្ឋាភិបាលចិន ពិនិត្យ​លើកង្វល់របស់ពួកគាត់ ប៉ុន្តែរហូតមកដល់ពេលនេះ ពួកគាត់នៅមិនទាន់ទទួលបានលទ្ធផល ឬចម្លើយនៅឡើយ។ ដោយសារតែការប្រឈមខ្លាំងបែបនេះ វាជាករណីដែលមិនអាចទទួលយកបាន ឬជាការទទួលខុសត្រូវទេ។»

កាលពីថ្ងៃទី១៩ ខែមិថុនា ឆ្នាំ២០១៤ នេះ រដ្ឋសភាជាតិបានកោះហៅលោក រដ្ឋមន្រ្តីក្រសួងរ៉ែ និង​ថាមពល ដើម្បី​ធ្វើ​ការ​បំភ្លឺពាក់ព័ន្ធនឹងផលប៉ះពាល់ និងដំណោះស្រាយលើគម្រោងអគ្គីសនីសេសានក្រោមពីរនេះ។ លោក ស៊ុយ សែម រដ្ឋមន្រ្តីក្រសួងរ៉ែ និងថាមពល បានលើកឡើងថា ក្រសួងនិងភាគគីពាក់ព័ន្ធ ពិសេសខាងក្រុមហ៊ុន​ក៏កំពុងស្វែងរក​ដំណោះស្រាយជូនប្រជាពលរដ្ឋ ជាបន្តបន្ទាប់។

យ៉ាងណាក៏ដោយថ្មីៗនេះ លោកនាយករដ្ឋមន្ត្រី ហ៊ុន សែន ក្នុងជំនួបជាមួយលោក Cao Peixi ប្រធានក្រុមហ៊ុន Huaneng Group ក្នុងប្រទេសចិន លោកក៏ធ្លាប់បានជំរុញឲ្យក្រុមហ៊ុនកាត់បន្ថយផលប៉ះពាល់បរិស្ថាន និងសង្គម។ ហើយត្រូវធ្វើការដោះស្រាយបញ្ហាប្រឈមនានាជាមួយប្រជាពលរដ្ឋ ដែលបណ្ដាលមកពីគម្រោងសាងសង់នោះ។

ទំនប់វារីអគ្គីសនីសេសានក្រោម២ ដែលអាចផលិតថាមពលអគ្គិសនី បានចំនួន៤០០ មេហ្គាវ៉ាត់នេះ មានការចូលរួម​វិនិយោគពីក្រុមហ៊ុនរ៉ូយ៉ាល់គ្រុប ក្រុមហ៊ុនចិន Hydrolancang International Energy Co.Ltd និង ក្រុមហ៊ុន Huaneng Group។ បច្ចុប្បន្ន ទំនប់នេះកំពុងស្ថិតនៅក្នុងការសាងសង់ ដោយភាគច្រើន ធ្វើទៅលើការលាង​សំអាត​បាត​អាង និងការផ្លាស់ប្តូរទីលំនៅ បន្ទាប់ពីការរបាយការណ៍វិភាគ លើការប៉ះពាល់បរិស្ថាន ត្រូវបានអនុម័តនៅឆ្នាំ២០០៩។

បើតាមសេចក្ដីថ្លែងការណ៍ របស់ក្រុមអង្គការសង្គមស៊ីវិលចំនួន១៥ កាលពីថ្ងៃទី២៧ ខែឧសភា ឆ្នាំ២០១៤ បានធ្វើ​ការ​កត់សំគាល់ដែរថា «ទំនប់វារីអគ្គិសនីសេសានក្រោម២ នឹងបង្កឲ្យមានផលប៉ះពាល់យ៉ាងធ្ងន់ធ្ងរ ដល់ប្រភពស្បៀង​អាហារ និងប្រូតេអ៊ីន ដែលយើងពឹងផ្អែកទាំងស្រុងសម្រាប់ចិញ្ចឹមកូនចៅ និងគ្រួសារ។ ទំនប់នេះនឹងធ្វើឲ្យប៉ះពាល់​ដល់ការប្រកបរបរចិញ្ចឹមជីវិត ការរស់នៅតាមបែបប្រពៃណី ដីកសិកម្ម និងបំផ្លាញតំបន់ព្រៃធំៗ ព្រមទាំងធនធាន​ធម្មជាតិ ដែលពឹងផ្អែកសម្រាប់ចិញ្ចឹមជីវិត។»