អនុប្រធានគណបក្សសង្រ្គោះជាតិ លោក កឹម សុខា បានអះអាងថារូបលោក នឹងមិនបណ្តោយឲ្យជនណាម្នាក់ ឬ គណបក្សណាមួយ បង្កអំពើហិង្សា និងជាន់ឈ្លីលិទ្ធិប្រជាជិបតេយ្យ នៅកម្ពុជាបានទេ។

លោក កឹម សុខា ក្នុងមហាបាតុកម្មរបស់គណបក្សសង្គ្រោះជាតិរបស់លោក ថ្ងៃទី១៥ខែធ្នូឆ្នាំ២០១៣។ (រូបថត គណបក្ស)

នយោបាយ - អនុប្រធានគណបក្សជំទាស់រូបនេះ បានលើកឡើងថា គោលនយោបាយរបស់ខ្លួន និងគណបក្ស​សង្រ្គោះជាតិ គឺព្យាយាមដោះស្រាយជម្លោះ នយោបាយ ដោយសន្តិវិធីឲ្យអស់លទ្ធភាព។

លោកនាយករដ្ឋមន្រ្តី ហ៊ុន សែន កាលពីអំឡុងខែមេសា ឆ្នាំ២០១៤ បានបង្ហើបឲ្យដឹងជាសាធារណៈ ក្រោយការ​ចរចា​តាមខ្សែទូរស័ព្ទ ជាមួយលោកសម រង្ស៊ី ប្រធានគណបក្សសង្រ្គោះជាតិថា គណបក្សសង្រ្គោះជាតិ និងគណបក្ស​ប្រជាជនកម្ពុជា បានជជែកត្រូវគ្នាច្រើនហើយ ហើយទំនងជាអាចឈាន ទៅចុះកិច្ចព្រមព្រៀងជាផ្លូវការ ដើម្បីបិទ​បញ្ចប់​វិបត្តិនយោបាយ ឲ្យបានឆាប់។

តែលោក ហ៊ុន សែន ដែលមានមុខតំណែង ជាអនុប្រធានគណបក្សប្រជាជនកម្ពុជាផងនោះ បានសង្កត់ធ្ងន់ថា បើ​គណបក្ស​ទាំងពីរ (បក្សប្រជាជន និងបក្សសង្រ្គោះជាតិ) ចរចាបរាជ័យ ម្តងហើយម្តងទៀត នោះមិនមែន​ជាកំហុស​របស់លោក (ហ៊ុន សែន) និងលោក សម រង្ស៊ី នោះទេ តែវាជាកំហុសរបស់លោក កឹម សុខា អនុប្រធានគណបក្ស​ង្រ្គោះជាតិ ដែលបង្ហាញឥរិយាបថរឹងត្អឹង ក្នុងការចរចានយោបាយ។

តែបញ្ហានេះ ត្រូវបានលោក កឹម សុខា បំភ្លឺឲ្យដឹងថា លោកមិនមែនជាឧបសគ្គ ដល់ការដោះស្រាយបញ្ហា​ប្រទេស​ជាតិនោះទេ។ បើតាមអនុប្រធានគណបក្សជំទាស់រូបនេះ បានបញ្ជាក់ក្នុងកិច្ចសម្ភាស ជាមួយវិទ្យុអាស៊ីសេរី ផ្សាយ​ជាខេមរភាសា នៅយប់ថ្ងៃទី២៦ ខែមិថុនា ឆ្នាំ២០១៤ នេះថា៖ «ខ្ញុំម្នាក់ឯងមិនអាចមានឥទ្ធិពល ធ្វើឲ្យជាប់គាំង​នយោបាយបានទេ។ (...)តែខ្ញុំជាឧបសគ្គដល់អ្នកបំផ្លាញជាតិ។»

គួរកត់សម្គាល់ថា រហូតមកដល់ពេលនេះ ចំណុចគន្លឹះដែលរាំងស្ទះ ដល់ការឯកភាពគ្នារវាងគណបក្សទាំងពីរ ត្រូវ​គេមើលឃើញ គឺបណ្តាលមកពីគណបក្សសង្រ្គោះជាតិ ចង់បានសំឡេងពីរភាគបី រីឯគណបក្សប្រជាជនកម្ពុជា ចង់​បានសំឡេងហាសិបបូកមួយ នៃសំឡេងសមាជិកសភា ដើម្បីអនុម័តសមាសភាពនៃសមាជិក គណៈកម្មាធិការជាតិ​រៀបចំការបោះឆ្នោត គ.ជ.ប៕