គ្រាន់តែជាការ«ខាំ»មួយប៉ុណ្ណោះ ប៉ុន្តែកីឡាករ ល្វី ស្វារ៉េស (Luis Suárez) កំពុងតែក្លាយខ្លួនទៅជា«វីរៈបុរស»​ជាតិ នៃប្រទេសអ៊ុយរ៉ាហ្គាយ។ បន្ទាប់ពីទណ្ឌកម្ម របស់សហព័ន្ធបាល់ទាត់អន្តរជាតិ (Fifa) ប្រកាសដាក់ទៅលើ​កីឡាករ​រួចមក នៅពេលនេះ បណ្ដាញផ្សព្វផ្សាយ បូករួមទាំងថ្នាក់ដឹកនាំនយោបាយគ្រប់ជាន់ថ្នាក់ នៅក្នុងប្រទេសនេះ បាន​ប្រកាសគាំទ្រកីឡាករ ដោយពួកគេបានយល់ថា ហេតុការណ៍ជុំវិញការ«ខាំ»នេះ បានកើតឡើងនៅពីក្រោយ​«កល​ល្បិច»​មួយ។

ក្រុមអ្ន​កគាំទ្រ បានយករបាំងមុខ ស្វារ៉េស មកពាក់។ (រូបថត Reuters)

បាល់ទាត់ពិភពលោក - នៅនឹងទំព័រមុខនៃសារព័ត៌មានអ៊ុយរ៉ាហ្គាយ La República បានសង្ខេបឡើងវិញ នូវ​មនោសញ្ចេតនា ដែលកាសែតនានានៅក្នុងប្រទេសនេះ បានចុះផ្សាយ បន្ទាប់ពីការប្រកាសទណ្ឌកម្ម រប​ស់ហ្វីហ្វា ទៅ​លើកីឡាករ ល្វី ស្វារ៉េស។ កីឡាករខ្សែប្រយុទ្ធរូបនេះ ត្រូវបានហ្វីហ្វា ហាមឃាត់មិនឲ្យចូលប្រកួតចំនួន៩លើក និង​ហាមមិនឲ្យទាក់ទង ក្នុងសកម្មភាពបាល់ទាត់ចំនួន៤ខែ បន្ទាប់ពីស្ថាប័នបាល់ទាត់ដ៏កំពូលរបស់ពិភពលោក រក​ឃើញ​ថា កីឡាករពិតជាបានប្រើធ្មេញរបស់ខ្លួន ធ្វើការវាយប្រហារទៅលើកីឡាករគូប្រជែង ជ័រជ ឈៀលីនី (Giorgio Chiellini) នៅក្នុងជំនួបប្រកួតរវាងក្រុមជម្រើសជាតិអ៊ុយរ៉ាហ្គាយ និងក្រុមអ៊ីតាលី កាលពីថ្ងៃទី២៤ ខែ​មិថុនា​កន្លង​មក។

សារព័ត៌មាន Montevideo បានយករូបភាពរបស់កីឡាករមកដាក់នៅទំព័រមុខ ជាមួយនឹងចំណងជើងថា៖ «ពួក​អង់គ្លេស និងពួកអ៊ីតាលី បានឆ្កាងសម្លាប់ ស្វារ៉េស»។ មិនខុសប៉ុន្មានពីសារព័ត៌មានធំៗផ្សេងទៀត នៅក្នុងប្រទេស​ដែរ សារព័ត៌មានមួយនេះ បានចោទប្រកាន់ក្រុមបាល់ទាត់ប្រទេសទាំងពីរ ដែលជាគូរប្រជែងរបស់​ក្រុមអ៊ុយរ៉ាហ្គាយ​នោះ ថាបានគាបសង្កត់លើ ហ្វីហ្វា ដើម្បីឲ្យដាក់ទណ្ឌកម្មលើ ស្វារ៉េស។ «ជាទណ្ឌកម្ម ដែលមានសភាពធ្ងន់ធ្ងរ​ជាង​ពេលណាៗទាំងអស់ នៅក្នុងប្រវត្តិបាល់ទាត់ពិភពលោក»។

នៅក្នុងរបាយការណ៍លំអិតមួយ ស្ដីពីសំនុំរឿងនេះ សារព័ត៌មានដដែលបានស្រង់សម្ដីអគ្គលេខា សហព័ន្ធបាល់ទាត់​របស់ប្រទេសអ៊ុយរ៉ាហ្គាយ បានសរសេរថា៖ «មានចរន្ដឃុបឃិតគ្នា រវាងពួកអង់គ្លេស និងអ៊ីតាលី ដើម្បីប្រឆាំងនឹង ល្វី ស្វារ៉េស។ ហើយរឿងនេះ មិនមានការសង្ស័យទេ ដែលមានជាប់ទាក់ទងនឹងការជម្រុះក្រុមអ៊ីតាលី ចេញពីវគ្គ​ជម្រុះ​ដំបូងនោះ»។

សារព័ត៌មានមួយទៀត ឈ្មោះ El País ក៏បានបញ្ជាក់ប្រហាក់ប្រហែលគ្នានេះដែរថា ប្រព័ន្ធផ្សព្វផ្សាយអង់គ្លេស និង​អ៊ីតាលី សុទ្ធតែបានបាញ់សំដៅលើ ស្វារ៉េស ហើយគឺពួកគេទាំងនេះហើយ ដែលបានធ្វើសេចក្ដីសម្រេចចិត្តដាក់​ទណ្ឌកម្ម និង​មិនមែន ហ្វីហ្វា នោះទេ។ សម្រាប់សារព័ត៌មាននេះ កីឡាករខ្សែប្រយុទ្ធរបស់ខ្លួន បានរងគ្រោះ​នឹង​យុទ្ធនាការរបស់ក្រុមជនបរទេស ដែលពោរពេញទៅដោយគំនិតឈ្នានីស និងភាពស្អប់ខ្ពើម ដើម្បីគោល​បំណងតែ​មួយគត់ នោះគឺប្រមាញ់ ស្វារ៉េស ចេញឲ្យបាត់។

ចំណែកសារព័ត៌មាន La República បានផ្ដល់វេទិការទៅឲ្យក្រុមគណបក្សនយោបាយ នៅក្នុងប្រទេសអ៊ុយរ៉ាហ្គាយ ដើម្បីបកស្រាយការគាំទ្ររបស់ពួកគេ ទៅកាន់កីឡាករ ស្វារ៉េស។ ជាពិសេសប្រធានាធិបតីនៃប្រទេសនេះ ដែល​ជំនួសមុខឲ្យពលរដ្ឋ អ៊ុយរ៉ាហ្គាយ រាប់សិបពាន់នាក់ផ្សេងទៀត ដែលចង់មកទទួល ស្វារ៉េស ដល់ព្រលាន​យន្ដហោះ នៅពេលដែលកីឡាកររូបនេះ ត្រឡប់មកដល់ប្រទេសវិញ។ ប្រធានាធិបតី លោក ចូហ្សេ មូជីកា (José Mujica) ដែល​អះអាងថា មិនបានឃើញ ស្វារ៉េស ខាំនរណាម្នាក់នោះ ក៏បានជឿជាក់ដែរថា ពិតជាមាននូវយុទ្ធនាការប្រឆាំង នឹង​កីឡាករដ៏ល្បីរបស់ខ្លួន។ លោកបានថ្លែងថា៖ «យើងបានទម្លាក់ក្រុមអ៊ីតាលី និងក្រុមអង់គ្លេស។ ពួកគេខាតបង់ ប្រាក់​កាសសម្បើមណាស់»។

អ្នកវិភាគល្បីៗមួយចំនួន ប្រចាំឲ្យសារព័ត៌មានទាំងនោះ ថែមទាំងបាននិយាយចូលជ្រៅបន្ថែមទៀត ដូចជាបាន​រំលឹកថា ពួកអង់គ្លេស បានឈ្នះពានរង្វាន់បាល់ទាត់ពិភពលោក ទាំងគួរឲ្យខ្មាសអៀន កាលពីឆ្នាំ១៩៦៦ជាដើម។ ប្រតិកម្មប្រឆាំងអ៊ីតាលី និងអង់គ្លេស ក៏មានយ៉ាងសន្ធឹកសន្ធាប់ដែរ នៅតាមបណ្ដាញសង្គម។ អ្នកគាំទ្រ​កីឡាករជា​ច្រើន បានអំពាវនាវឲ្យធ្វើបាតុកម្ម ... ដែលហេតុការណ៍ទាំងនេះបង្កើតឲ្យមានការព្រួយបារម្ភ ដល់អាជ្ញាធរ​រដ្ឋាភិបាល​ក្រុង ម៉ុងតេវីដេអូ រហូតដល់បានបញ្ជូនកងកម្លាំងរក្សាសន្ដិសុខជាច្រើននាក់ នៅឈរយាមប្រចាំការ នៅខាង​មុខ​ស្ថានទូតនៃប្រទេសទាំងពីរទៀតផង៕