ទារកបងកើតនៅថ្ងៃទី២០ ខែមករា រីឯទារកប្អូន កើតនៅថ្ងៃទី២៦ ខែកុម្ភៈ។ ខុសពេលគ្នាដល់ទៅជាងមួយខែ ករណី​ដ៏ចម្លែកនេះបានបង្កការភ្ញាក់ផ្អើល បន្ទាប់ពីគ្រូពេទ្យអនុញ្ញាតក្រុមគ្រួសារម្ដាយកូន ឲ្យវិលត្រឡប់ទៅផ្ទះវិញ កាលពី​ប៉ុន្មាន​ថ្ងៃមុននេះ។

កូនភ្លោះទាំងពីរ។ (រូបថតផ្ដិតពីវីដេអូ)

ពីនេះពីនោះ - ជាករណីដ៏កម្រមិនគួរឲ្យជឿ សម្រាប់ក្រុមគ្រូពេទ្យ និងឆ្មបអ្នកបង្កើតទារក។ នៅទីក្រុង កានសាស (Kansas) នៃរដ្ឋមីស៊ូរី (Missouri) សហរដ្ឋអាមេរិក ស្ត្រីជាតិអាមេរិកាំងមួយរូប ទើបនឹងប្រសូតបានកូនភ្លោះមួយគូរ ដែលចាប់កំណើតខុសពេលគ្នា ដល់ទៅ៣៩ថ្ងៃ។ នាង អេឡែន កូវ៉ាន (Elene Cowan) ជាម្ដាយរូបនេះ បាន​និយាយ​ថា៖ «រឿងដែលអ្នកឯងស្កាប់លឺនេះ វាបានកើតឡើងមែន ប៉ុន្តែអ្នកច្បាស់ជាគិតថា វាមិនដែលមានរឿងបែប​នេះ​នោះ​ទេ ជាពិសេសខ្លួនអ្នកផ្ទាល់»។

ទារកភ្លោះដំបូង បានកើតនៅត្រឹមតែសប្ដាហ៍ទី២៤ បើប្រៀបធៀបទៅនឹងការពរពោះធម្មតា ដែលមានរយៈពេល​ដល់​ទៅ៩ខែ ហើយមានទម្ងន់ត្រឹមតែ ៦៣៥ក្រាមប៉ុណ្ណោះ។ ដោយហេតុនេះហើយ ទើបក្រុមគ្រូពេទ្យបានធ្វើការ​ពន្យា​ពេល សម្រាប់ទារកប្អូន ដើម្បីមានសង្ឃឹមថានឹងបានរស់។

នាង អេឡែន បាននិយាយទៀតថា៖ «ការពរពោះរបស់ខ្លួន នៅថ្ងៃដំបូង មិនមានអ្វីគួរឲ្យកត់សម្គាល់ទេ។ (...) ខ្ញុំក៏មិន​ដែលមានអារម្មណ៍ថា ឈឺផ្សា ឬមានបញ្ហាអ្វីនោះឡើយ»។ តែចាប់ពីសប្ដាហ៍ទី២៣មក សភាពជិតឆ្លងទន្លេ បានធ្វើ​ឲ្យ​នាងមានអារម្មណ៍ឡើង រហូតមកដល់ថ្ងៃទី២០ ខែមករា ថ្ងៃដែលទារកបង បានកើត។ នាងជាម្ដាយបានបន្តទៀតថា៖ «កូនបងមានទំហំតូចមែនទែន ... មានទម្ងន់ត្រឹមតែ៦៣៥ក្រាមប៉ុណ្ណោះ ... ក្ដីសង្ឃឹមថានៅរស់ សឹងតែមិនមានផង»។

ក្រុមគ្រូពេទ្យបានសម្រេចចិត្ត ពន្យាពេលទារកទីពីរ បើទោះជាទងសុក ត្រូវបានកាត់ផ្ដាច់ចេញ ពីទារកទីមួយរួច​ហើយ​ក៏ដោយ (ផ្ដាច់ទងសុក អាចបង្កហនិភ័យឲ្យទារកទីពីរ)។ ស្ត្រីជាម្ដាយត្រូវបានគ្រូពេទ្យចាក់ថ្នាំយ៉ាងច្រើន ដើម្បីឲ្យ​ទ្វា​ប្រសូតបានបិតវិញ ដើម្បីទុកទារកទីពីរនៅក្នុងពោះសិន។ នាង អេឡែន បាននិយាយថា៖ «ខ្ញុំបារម្ភខ្លាចបាត់​ពួកវា​ទាំងពីរ»។

ទីបំផុតទៅ នៅ៣៩ថ្ងៃក្រោយមក ទារកទីពីរបានកើតចេញ តែក៏មិនជាធំអីណាស់ណាដែរ ដោយមានទម្ងន់ត្រឹម​តែ​១,៣គីឡូក្រាមប៉ុណ្ណោះ។ ប៉ុន្តែទារកប្អូននេះ មានសុខភាពល្អប្រសើរណាស់។ ម្ដាយនិយាយរៀបរាប់បន្ថែម ដោយ​ក្ដី​អំណរថា៖ «ខុសពីកូនបង កូនប្អូននេះមិនចាំបាច់ជំនួយ ក្នុងការដកដង្ហើមនោះឡើយ»៕

សូមទស្សនាវីដេអូ ទាក់ទងនឹងគ្រួសារទាំងមូលដូចតទៅ៖