អនុប្រធានគណបក្សសង្រ្គោះជាតិលោកកឹម សុខា បានព្រមានថាមហាបាតុកម្ម ដឹកនាំដោយគណបក្សសង្រ្គោះជាតិ អាចនឹងកើតឡើងជាថ្មី ប្រសិនបើគណបក្សប្រជាជនកម្ពុជា មិនសម្រួលឲ្យមានការកែទម្រង់ គណៈកម្មាធិការជាតិ​រៀបចំការបោះឆ្នោត ហៅកាត់ថា គ.ជ.ប ឲ្យមានភាពយុត្តិធម៌ត្រឹមត្រូវ។

លោក កឹម សុខា នៅលើវេទិកា ក្នុងបាតុកម្មថ្ងៃទី២៥ខែតុលាឆ្នាំ២០១៣។ (រូបថត MONOROOM.info/ O.Vary)

នយោបាយ - ក្នុងជំនួបជាមួយលោក ប្រសាទ សូរីយា សូបេឌី អ្នករាយការណ៍ពិសេស របស់អង្គការសហប្រជាជាតិ​ប្រចាំកម្ពុជា ស្តីពីបញ្ហាសិទិ្ធមនុស្ស លោក កឹម សុខា អនុប្រធានគណបក្សសង្រ្គោះជាតិ បានលើកឡើងថា ចំណុច​គន្លឹះ ដែលនាំឲ្យអូសបន្លាយ ដល់ការចរចានយោបាយ រវាងគណបក្សប្រជាជនកម្ពុជា និងគណបក្សសង្រ្គោះជាតិ គឺទាក់ទងនឹងការខ្វែងគំនិតគ្នា លើការកែទម្រង់ការបោះឆ្នោត។

បើតាមអនុប្រធានគណបក្សជំទាស់រូបនេះ បានលើកឡើងថា គណបក្សប្រជាជនកម្ពុជាចង់បានសំឡេង​ហាសិបបូក​មួយ រីឯគណបក្សសង្រ្គោះជាតិ ចង់បានសំឡេងពីរភាគបី នៃសមាជិកសភា ដើម្បីអនុម័តសមាសភាពសមាជិក គ.ជ.ប។ លោក កឹម សុខា បន្តថាការកែទម្រង់រដ្ឋាភិបាល រដ្ឋសភា ដីធ្លី តុលាការ និងវិស័យផ្សេងៗទៀត នឹងមិន​អាច​ទៅរួចនោះទេ ដរាបណាមិនទាន់មានការកែទម្រង់ គ.ជ.ប ឲ្យបានត្រឹមត្រូវ ដើម្បីធានាថា គ.ជ.ប អាចមានលទ្ធភាព​ពេញលេញ និងយុត្តិធម៌ ក្នុងការរៀបចំដំណើរការបោះឆ្នោត ជ្រើសរើសរដ្ឋាភិបាលស្របច្បាប់។

ឆ្លើយតបនឹងសំណួរអ្នកសារព័ត៌មាន ដែលសួរពាក់ព័ន្ធនឹងភាពទាល់ច្រក ក្នុងការចរចារវាងគណបក្សទាំងពីរ លោក កឹម សុខា អនុប្រធានគណបក្សសង្រ្គោះជាតិ បានឆ្លើយតប ដោយសង្កត់ធ្ងន់ប្រាប់អ្នកសារព័ត៌មាន ក្រោយជំនួប​ជា​មួយលោក ប្រាសាទ សូរីយា សូបេឌី នៅល្ងាចថ្ងៃទី២០ ខែមិថុនា ឆ្នាំ២០១៤ នេះថា៖ «គណបក្សសង្រ្គោះជាតិ​អត់​បិទ​ទេ តែបើគណបក្សប្រជាជនបិទ យើងរកច្រកផ្សេងទៀតធ្វើ។ បើមិនបិទ យើងនៅរកវិធីជជែកគ្នា ព្រោះយើងចង់រក​ច្រកដោះស្រាយ។ (...) បើបិទវាអាចទាំងអស់ យើងមិននៅដេកឲ្យងាប់ទេ បើគេខ្ទប់ច្រមុះ យើងនឹងដកដង្ហើម​តាម​មាត់។»

ហេតុផលដែលគណបក្សប្រជាជនកម្ពុជា ច្រានចោលសំឡេងពីរភាគបី របស់គណបក្សសង្រ្គោះជាតិ ត្រូវបាន​លើក​ឡើងដោយលោក ព្រំ សុខា ជាប្រធានក្រុមចរចាគណបក្សប្រជាជនកម្ពុជា ដោយលោកថាសំឡេងពីរភាគបី នឹងនាំ​ឲ្យមានការជាប់គាំងដល់ការបង្កើត គ.ជ.ប ដែលជាឧបសគ្គបង្កឲ្យរាំងស្ទះ ដល់ការបង្កើតរដ្ឋាភិបាល និងរដ្ឋសភា។ បន្ទរពីការអះអាងរបស់លោកព្រំ សុខា លោកនាយករដ្ឋមន្រ្តីហ៊ុន សែន និងជាអនុប្រធានគណបក្សប្រជាជនកម្ពុជា នៅគ្រាចុងក្រោយនេះ បានព្រមានថារដ្ឋាភិបាល នឹងមិនអនុញ្ញាតឲ្យគណបក្សសង្រ្គោះជាតិ ធ្វើមហាបាតុកម្ម​ជាថ្មី​ដាច់ខាត ហើយថារដ្ឋាភិបាលនឹងចាត់វិធានការម៉ឺងម៉ាត់ ចំពោះមហាបាតុកម្មណាក៏ដោយ ដែលរដ្ឋាភិបាលវាយ​តម្លៃ​ថា ធ្វើឡើងដោយខុសច្បាប់។

ប្រធានមជ្ឈមណ្ឌលពលរដ្ឋអភិវឌ្ឍន៍ និងសន្តិភាព លោក យ៉ង់ គឹមអេង បានលើកឡើងថាគណបក្សប្រជាជនកម្ពុជា និងគណបក្សសង្រ្គោះជាតិ គម្បីប្រឹងប្រែងថែមទៀត ដោយមិនត្រូវបណ្តោយស្ថានការណ៍ ឈានដល់ការចុះតវ៉ាតាម​ផ្លូវជាថ្មីទេ ខណៈលទ្ធភាពនៅមាន។ ថ្លែងប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី២១ ខែមិថុនា ឆ្នាំ២០១៤ នេះ​លោក យ៉ង់ គឹមអេង បញ្ជាក់ថា៖ «បាតុកម្មអហិង្សាជាដំណោះស្រាយល្អ ក្រោយការចរចាទាល់ច្រក នៅប្រទេស​ប្រជាធិបតេយ្យ និងសិទ្ធិមនុស្ស។ តែយ៉ាងណាយើងមិនគួរមានការគំរាមកំហែងណាមួយ ដល់ការបង្ក្រាប​ដោយ​ហិង្សា ក្នុងនាមជារដ្ឋាភិបាល៕»