ក្រុមកាមើរូន បានធ្លាក់ខ្លួនទៅក្នុងសភាពដ៏ហួសចិត្តមួយ បន្ទាប់ពីខ្លួនប្រកួតចាញ់ក្រុមក្រូអាស៊ី ក្នុងពិន្ទុ០ទល់នឹង៤។ រូបភាពនៃការយកក្បាលរបស់កីឡាករ ប៊ើន័រ អាស៊ូ អេកូតូ (Benoît Assou-Ekotto) ទៅបុកកីឡាកររួមក្រុម ប៊េនចាមីន មូកាន់ចូ (Benjamin Moukandjo) បានបង្កឲ្យយកមកជជែកគ្នា យ៉ាងកក្រើកប្រព័ន្ធអ៊ិនធើណែត។

ជម្លោះនៅលើកន្លែងប្រកួត រវាងកីឡាករកាមើរូន។ (រូបថត AFP)

បាល់ទាត់ពិភពលោក - បើទោះជាប្រកួតចាញ់ដល់ទៅពីរលើក លើកទីមួយទល់នឹងម៉ិកស៊ិក (០១) និងលើកទីពីរ ទល់នឹងក្រូអាស៊ី (០៤) ធ្វើឲ្យហាលអាវជាស្ថាពរ នៅក្នុងវគ្គទាត់ជម្រុះ ក្នុងពូល A ក៏ដោយ តែក្រុមបាល់ទាត់​ជម្រើស​ជាតិ កាមេរូន នៅតែធ្វើឲ្យគេនិយាយពីខ្លួន នៅឡើយ។

នោះគឺកីឡាករ ប៊ើន័រ អាស៊ូ អេកូតូ បានយកក្បាល ទៅបុកកីឡាកររួមក្រុម ប៊េនចាមីន មូកាន់ចូ នៅពេលក្រុមកាមើរូន ជួបប្រកួតលើកទីពីរ ជាមួយនឹងក្រុមក្រូអាស៊ី កាលពីថ្ងៃពុធមុន។

កីឡាករ ប៊េនចាមីន មូកាន់ចូ ដែលជាខ្សែបម្រើខាងឆ្វេង របស់ក្រុមកាមើរូន បានចោទប្រកាន់ កីឡាកររួមក្រុម ថានៅ​តែបន្តលេងបាល់ ខណៈកីឡាករកាមើរូន ម្នាក់ទៀត បានដេកដួលនៅលើដី។ ប៉ុន្តែការចោទប្រកាន់នេះ មិនត្រូវបាន​កីឡាករ ប៊ើន័រ អាស៊ូ អេកូតូ សប្បាយចិត្តជាមួយឡើយ ហើយបានបង្កើតឲ្យទៅជាជម្លោះមួយ រហូតដល់កីឡាករ អាស៊ូ​ អេកូតូ (Assou-Ekotto) ចូលមកបំបែក។

ប្រភពមួយចំនួន បានបង្ហើបទៀតថា ជម្លោះនេះបានបន្តការជជែកតឹងសរសៃករ ជាទៅទៀត នៅពេលដែលការ​ប្រកួត​បានបញ្ចប់ និងបើទោះជាកីឡាកររួមក្រុម សុំឲ្យបញ្ឈប់ក៏ដោយ។

យើងនឹងរងចាំមើល ការប្រកួតរវាងក្រុមកាមើរូន និងប្រេស៊ីល អាចនឹងបង្កើតឲ្យមានឈុតឆាកអ្វីខ្លះទៀត? តែយ៉ាង​ណាក៏សង្ឃឹមដែរ ថានឹងមិនមានរឿងបែបនេះកើតឡើងឡើយ៕

សូមទស្សនាវីដេអូ នៃជម្លោះដូចតទៅ៖