ប្រជាពលរដ្ឋបួនគ្រួសារ ក្នុងចំណោមជាងបីរយគ្រួសារ បានចោទអាជ្ញាធរឃុំបឹងប្រាំថា បាននាំកម្លាំង៦០នាក់ អាវុធ​មួយដើម និងគ្រឿងចក្រពីគ្រឿង កំពុងឈូសឆាយដីខ្លួន និងគម្រាមចាប់ខ្លួន បើសិនជាហ៊ានមករារាំង។ សកម្មភាព ឈូសឆាយ ដែលយ៉ាងហោចណាស់ធ្វើឲ្យ មានពលរដ្ឋមួយរូបត្រូវបានរត់គេសខ្លួន និងសមាជិកគ្រួសារផ្សេងទៀត រងនូវការវាយសំពង។

រនាំងដាក់ឃាំងផ្លូវលំ និងមានរោងទាហានយាម (ខាងឆ្វេងដៃ) នៅឃុំបឹងប្រាំ ស្រុក បវេល ខេត្តបាត់ដំបង។ (រូបថត ឯកសារ)

វិបត្តិដីធ្លី - បន្ទាប់ពីត្រូវបានប្រជាពលរដ្ឋ ចោទថាបានយកតុលាការ មកគម្រាមដើម្បីយកដីធ្លី ស្រែចំការរបស់​ពួក​គាត់​​នោះមក នៅពេលនេះ ទំនងជាក្រុមអាជ្ញាធរទាំងនោះ ចាប់ផ្ដើមអនុវត្តឲ្យចេញជាសកម្មភាពជាក់ស្ដែងហើយ។ ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ លោក ចាន់ ថន ដែលកំពុរត់គេចពីការចាប់ខ្លួន បានបញ្ជាក់ថា នាវេលាម៉ោងជាង១១ថ្ងៃត្រង់ ថ្ងៃទី១៣ ខែមិថុនានេះ លោកមេឃុំបឹងប្រាំ ឈា នី បានដឹកនាំកម្លាំងប្រដាប់ដោយ​ដំបង និងអាវុធ ជាមួយនឹងក្រុមបញ្ជាការពារភូមិ ដែលស្លៀកឯកសណ្ឋានឈុតខៀវ ប្រមាណជិត៦០នាក់ និង​គ្រឿង​ចក្រ២គ្រឿង ទៅឈូសឆាយដីស្រែ និងចំការដែលលោកបានកំពុងអាស្រ័យផលរាល់ឆ្នាំ។ «គាត់ (លោក ឈា នី មេឃុំបឹងប្រាំ) ជាអ្នកនាំកម្លាំងទៅ។ គាត់មិនធ្វើការដោះស្រាយឲ្យទេ ដោយជ្រុលជាធ្វើប្លង់ជាន់លើដីខ្ញុំហើយ។ ខាង​សោធិន គេសើរើខ្លាំងពេក អញ្ចឹងគាត់ក៏នាំទៅចង្អុល និងឲ្យកម្លាំងព្យួរាស់ និងឈូសឆាយដីនោះយកតែម្តង។»

លោកបានបន្ថែមថា លោកកំពុងគេចខ្លួន មិនហ៊ានចូលទេ ព្រោះលោកមេឃុំបឹងប្រាំកំពុងរង់ចាំចាប់ បើសិនជាលោក ហ៊ានមករ៉ារាំងការឈូសឆាយនេះ។ លោកបន្ថែមថា ឃើញហេតុការណ៍នេះមិនស្រួល លោកក៏មិនហានចេញ​មុខ​ដែរ ដោយទុកឲ្យប្រពន្ធ និងម្តាយទៅធ្វើការហាមឃាត់ តែមិនបានសម្រេចទេ ព្រោះមេឃុំនោះមិនបានស្តាប់ឡើយ។ «ខ្ញុំកំពុងរត់គេចខ្លួន។ ប្រពន្ធខ្ញុំក៏កំពុងព្យាយាមឃាត់ឃាំង។ (...) គេចង់ឲ្យខ្ញុំចេញមុខតតាំង ពេលធ្វើ​សកម្មភាព អាង​ចាប់ខ្ញុំតែម្តង។»

លោក ចាន់ ថន បានរៀបរាប់បន្តទៀត ថានៅពេលដែលប្រពន្ធរបស់លោក បាននិយាយទៅកាន់លោកមេឃុំនោះ ស្រាប់តែលោកមេឃុំ បានច្រានប្រពន្ធរបស់លោកឈ្មោះ លឿត ឡាង អាយុ៤៥ឆ្នាំ ឲ្យដួល និងបញ្ជាក្រុម​សន្តិសុខ​ឲ្យ​វាយថែមទៀត។ ឃើញដូចនោះលោកយាយ គឹម ហេង អាយុ៦៥ឆ្នាំ ត្រូវជាម្តាយ ដែលកំពុងពរ​ចៅអាយុ៦ខែ​ក្នុង​ដៃ បានចូលទៅឃាត់មិនឲ្យមានការវាយតប់ តែក៏ត្រូវបានក្រុមសន្តិសុខទាំងនោះវាយដែរ បណ្តាលឲ្យរបូតចៅ​ដែលមានអាយុទើបតែ៦ខែពីដៃធ្លាក់ដីតែម្តង។

ទស្សនាវដ្តីមនោរម្យ.អាំងហ្វូ មិនអាចទំនាក់ទំនងជាមួយមេឃុំបឹងប្រាំ លោក ឈា នី ទាក់ទងនឹងការចោទប្រកាន់​ ខាងលើនេះបានទេ ដោយទូរស័ព្ទរបស់លោកមិនអាចភ្ជាប់ទំនាក់ទំនងបាន។

សកម្មភាពឈូសឆាយនេះ ត្រូវបានថ្កោលទោស ដោយមន្ត្រីសំរបសំរួលនៃសមាគមសិទ្ធិមនុស្សអាដហុក ប្រចាំខេត្ត​បាត់ដំបង លោក យិន ម៉េងលី ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូក្នុងល្ងាចថ្ងៃទី១៣ ខែមិថុនានេះ។ លោកបានចោទប្រកាន់ទៅលើមន្រ្តីអនុវត្តច្បាប់ ដែលជាអាជ្ញាធរមូលដ្ឋានទាងនោះថា មិនយកចិត្តទុកដាក់ដោះ​ស្រាយបញ្ហា ជូនប្រជាពលរដ្ឋដែលរងគ្រោះពិតប្រាកដ តែបែរជានាំកម្លាំងទៅឈូសឆាយដី ដែលកំពុងរង់ចាំការ​ដោះស្រាយពីខេត្តទៅវិញ។

មន្រ្តីសិទ្ធិមនុស្សរូបនេះបានបញ្ជាក់ថា៖ «យើងបានដាក់របាយការណ៍ ទៅអភិបាលខេត្តតាំងពីថ្ងៃទី២១ ខែឧសភា ឆ្នាំ២០១៤ ដើម្បីធ្វើការពិចារណា និងដោះស្រាយ។ មកដល់ខាងខេត្តនៅតែស្ងៀមស្ងាត់ និងមិនទាន់មានការដោះ​ស្រាយ​អ្វីនៅឡើយទេ។»

លោក បាននិយាយទៀតថា៖ «ខ្ញុំគិតថា សូមឲ្យភាគីពាក់ព័ន្ធនៅរក្សាភាពស្ងៀមស្ងាត់សិន។ (...) ប្រជាពលរដ្ឋដែល​ធ្លាប់ធ្វើក្នុងឆ្នាំកន្លងមក លោកធ្វើកន្លែងណា នៅកន្លែងហ្នឹងសិនទៅ ជៀសវាងមានហិង្សាកើតឡើង។»

មន្ត្រីសិទ្ធិមនុស្សរូបនេះ បានបន្តថា ក្នុងតំបន់ដែលមានភាពចម្រូង​ចម្រាស​នេះ មានមនុស្សតែពីរ ទៅបីនាក់ប៉ុណ្ណោះ ដែលបានកាន់កាប់ដីពីរពាន់ ទៅបីពាន់ហិកតា។ លោកចង់ឲ្យធ្វើការស៊ើប​អង្កេតរឿងនេះ ព្រោះថា ដីទំនាស់មាន​ប្រមាណតែជាង៨០០ហិកតាទេ។ «អាជ្ញាធរខេត្តត្រូវចាត់វិធានការអង្កេត លើអ្នកបី-បួននាក់នោះ ដែលមានដីរហូត​ដល់ពីបីពាន់ហិកតា ដើម្បីដាក់មកឲ្យប្រចាពលរដ្ឋរងគ្រោះទាំងនោះវិញ។ (...) សកម្មភាពរពស់ប្រជាពលរដ្ឋ ដែល​កំពុងត្រូវបានអាជ្ញាធរចោទប្រកាន់នេះ គឺជាសកម្មភាពស្របច្បាប់។»