«ខ្មែរយើង ថាកម្សត់ណាស់ ទៅនៅស្រុកគេ» នេះជាការរៀបរាប់ដ៏សំខាន់មួយ ស្ដីពីជីវិតដែលរស់នៅក្នុងប្រទេសគេ ក្នុងនាមជាកម្មករ របស់ពលករកម្ពុជា ដែលបានធ្វើចំណាកស្រុកទៅកនា់ប្រទេសថៃ បន្ទាប់ត្រូវបានអាជ្ញាធររបស់​ប្រទេសនេះ ចាប់​បញ្ជូនមកប្រទេសដើមកំណើតវិញ។

ក្រុមពលករ-កម្មករខ្មែរ ដែលត្រូវបានអាជ្ញាធរបញ្ជូនត្រឡប់មកវិញ។ (រូបថត MONOROOM.info/ S. Tith)

ជីវិត - លោក ចន្នី មានអាយុ៣៣ឆ្នាំ មកពីស្រុកអូររាំងឪ ខេត្តកំពង់ចាម ដែលធ្វើចំណាកស្រុក ទៅរកការងាររយៈ​ពេលមួយឆ្នាំ មុនគេចាប់បញ្ជូនមកវិញ បានរៀបរាប់ថា ក្នុងពេលធ្វើការនៅប្រទេសថៃ លោកជាកម្មករធ្វើការចម្រុះ មិនប្រាកដការងារអ្វីច្បាស់លាស់នោះទេ ដោយសារតែកម្មករដែលបានធ្វើចំណាកស្រុក ពីស្រុកខ្មែរទៅទោះ​មាន​ជំនាញអ្វីក៏ដោយ ក៏គេថាគ្មានជំនាញដែរ ហើយគេចេះតែចាត់ចែងទៅជំនាញដែលគេបានដាក់មក។

លោកបានបញ្ជាក់ ដោយសារតែរកការងារនៅស្រុកខ្មែរមិនបាន ទើបលោកសម្រេចចិត្តចំណាកស្រុកតាមមេខ្យល់ ទៅធ្វើកម្មករនៅស្រុកថៃ ព្រោះថាឃើញប្រជាជនរបស់គេ មានជីវភាពធូធារ តម្លៃទំនិញសមរម្យ​មិនឡើងថ្លៃ​ដូច​នៅ​ស្រុខ្មែរ។ ម្យ៉ាងមុននឹងត្រូវចំណាយលុយ ឱ្យមេខ្យល់២០០០បាតទៀត។ លោកបន្តថា៖ «ខ្មែរយើងទៅ គឺបាក់តាមគ្នា ដោយសារឃើញគេបាន ចេះតែទៅៗ បើការងារនៅខ្មែរយើងមាន ក៏គេមិនទៅដែរ»។

លោកអះអាងទៀតថា សម្រាប់លោក ការងារនៅទីនោះគ្មានអ្វីពិបាកទេ ប្រហាក់ប្រហែលនឹងស្រុកខ្មែរដែរ តែ​កន្លែង​ខ្លះ កម្មករពីខ្មែរទៅគេប្រើច្រើន ហត់ហើយ ត្រូវគេបោក។ សម្រាប់ការស់នៅរបស់លោកនៅទីនោះវិញ បានជួបនឹង​ការលំបាក​ជាច្រើន​ ដោយសារតែលោកគ្មានលិខិតឆ្លងដែន ហើយក្នុងកន្លះខែម្តង នៃពេលបើកប្រាក់ខែ ត្រូវតម្រួត​ថៃ​កាត់យក២០០បាត។

ស្រ្តីជាពលករម្នាក់ទៀត ឈ្មោះ ឈឹម រស់នៅក្រាំងលាវ ស្រុកកំពុងត្របែកខេត្តព្រៃវែង ដែលបានធ្វើចំណាកស្រុក​ តាមរយៈមេខ្យល់បាន២ឆ្នាំហើយនោះ បានឱ្យដឹងថា ព្រោះតែខ្លាចគេវាយធ្វើបាប ត្រូវបង្ខំចិត្តមកជាមួយ​ពលករ​ដទៃ​ទៀត ចោលលុយប្រាក់ខែជិតកន្លះខែ ដោយសារតែលឺពាក្យចចាមអារាមគេប្រាប់មកថា បើមិនទៅគេនឹងចាប់បង្ខំ​វាយដំ ច្រំធាក់ ឬសម្លាប់ជាដើម អញ្ចឹងទើបព្រមមកតាមសម្រួល ដោយចំណាយលុយអស់១៨០០បាត។

ស្រ្តីជាកម្មករសំណង់ ដែលរកបានកម្រៃមួយថ្ងៃ២៤០បាតរូបនេះ បានឱ្យដឹងថា ការរស់នៅទីនោះ មានការលំបាក​ខ្លាំង ព្រោះត្រូវរត់គេចពីតម្រួតគ្រប់ពេលវេលា នៅពេលណាដែលគេចុះពិនិត្យម្តងៗ។ ប្រសិនបើតម្រួតថៃចាប់បាន គេនឹងចាប់បញ្ជូនមកស្រុកខ្មែរវិញ។ ។ ពលករចំណាកស្រុកខុសច្បាប់ដដែល បានប្រាប់ទៀតថា នឹងវិលត្រលប់ទៅ​ស្រុកមួយរយៈវិញសិន បន្ទាប់មកចាំរកការងារនៅភ្នំពេញធ្វើបន្តទៀត។

យ៉ាងណាម៉ិញ បើទោះបីជាកម្មករភាគច្រើន មានការលំបាកខ្លាំងក្នុងការរស់នៅ ក្នុងស្រុកថៃ តែក៏មានកម្មករ​មួយ​ចំនួន​ទៀតមានជីវភាព ប្រសើរជាងរស់កម្ពុជាផងដែរ។ លោក បាន ខុន ជាកម្មករសំណង់ ដែលធ្វើការងារនៅទីនោះ​បាន​រយៈពេល៤ឆ្នាំ បានរៀបរាប់ថា ដោយសារលោកធ្វើការយូរហើយ ដូច្នេះការរស់នៅក្នុប្រទេសថៃ មិនដែលបញ្ហា​លំបាក​អ្វីនោះទេ។ មួយថ្ងៃបានលោកធ្វើការ បាន៣៥០បាត ទៅ៤៥០បាត ដែលធ្វើឱ្យជីវភាពលោកកាន់តែប្រសើរ​ជាងនៅ​ក្នុងស្រុក ដែលលោករកការងារធ្វើមិនបាន។

លោកចៅសង្កាត់រងប៉ោយប៉ែត មកពីគណបក្សសង្គ្រោះជាតិ លោក ចៅ វាសនា បានឱ្យបញ្ជាក់ថា លោកមិនអាច​ក្តាប់​ទិន្នន័យ ពីពលករដែលគេបញ្ជូនមកបានទាំងអស់ទេ តែត្រឹមតែដឹងថាក្នុងមួយឡាន គេដាក់ពី៥០នាក់ ទៅ៦០​នាក់។ បើតាមការប៉ាន់ប្រមាណរបស់លោក រហូតមកដល់ពេលនេះ ប្រជាជនខ្មែរដែលថៃបញ្ជូនមកវិញ មិនតិច​ជាង​៥ម៉ឺននាក់នោះទេ។ លោកបានអះអាងថា ឡានដែលគេដឹកកម្មករមកវិញនោះ ប្រៀបដូចជាឡាន ដែលគេ​ដាក់​សត្វ​ត្រូវញាត់ពេញឡាន ហើយឡានគ្មានគម្របទៀត ពលករដែលធ្វើដំណើររមក ត្រូវថ្ងៃ ត្រូវភ្លៀង និងមានការ​លំបាក​ច្រើន។ ឥលូវនេះ ដោយតែមានជំនួយពីអាជីវករផ្សារប៉ោយប៉ែត ជួយជាខោអាវ ម្ហូបអាហារផ្សេង ពួកគាត់មិនសូវ​ជាលំបាកដូចមុនទេ៕