អ្នក​រាំ​៦៦០​នាក់ បើក​ការ​ប្រកួត​បាល់​ទាត់​ពិភព​លោក ឆ្នាំ​២០១៤ (vdo)

ការប្រកួតបាល់ទាត់ ដណ្ដើមពានរង្វាន់ពិភពលោក ឆ្នាំ២០១៤ លើកទី២០ បានបើកធ្វើហើយនៅទីក្រុង សៅ ប៉ូឡូ (Sao Paulo) ប្រទេសប្រេស៊ីល ជាមួយនឹងការប្រគុំតន្ត្រីយ៉ាងកក្រើកដី ពោរពេញដោយភ្លើងពណ៌ចម្រុះ នៅពីមុខ​ទស្សនិកជនជាង៦ម៉ឺននាក់។ ពិធីបើកការប្រកួតនេះ បានឧទ្ទិសទៅឲ្យប្រទេសប្រេស៊ីល ដែលជាម្ចាស់ផ្ទះផង និង​រតនសម្បត្តិ៍របស់ប្រទេសនេះផង។
Loading...
  • ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី១៣ ខែមិថុនា ២០១៤
  • កែប្រែចុងក្រោយ: June 13, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ការប្រកួតបាល់ទាត់ ដណ្ដើមពានរង្វាន់ពិភពលោក ឆ្នាំ២០១៤ លើកទី២០ បានបើកធ្វើហើយនៅទីក្រុង សៅ ប៉ូឡូ (Sao Paulo) ប្រទេសប្រេស៊ីល ជាមួយនឹងការប្រគុំតន្ត្រីយ៉ាងកក្រើកដី ពោរពេញដោយភ្លើងពណ៌ចម្រុះ នៅពីមុខ​ទស្សនិកជនជាង៦ម៉ឺននាក់។ ពិធីបើកការប្រកួតនេះ បានឧទ្ទិសទៅឲ្យប្រទេសប្រេស៊ីល ដែលជាម្ចាស់ផ្ទះផង និង​រតនសម្បត្តិ៍របស់ប្រទេសនេះផង។


កំពូលអ្នកចម្រៀងដ៏ល្បីទាំងបីរូប នៅក្នុងពិធីបើកប្រកួតបាល់ទាត់ពិភពលោក ឆ្នាំ២០១៤។ (រូបថត twitter)

បាល់ទាត់ពិភពលោក - នៅវេលាម៉ោងប្រមាណជា ៣រសៀល និង១៤នាទី ម៉ោងក្នុងប្រទេសប្រេស៊ីល នៅក្រោម​ផ្ទៃមេឃខៀវខ្ចី ការរៀបចំការប្រគុំតន្ត្រីដ៏ធំមួយ បានកើតឡើងនៅកណ្ដាលវាលស្មៅ ដើម្បីសម្ពោធបើកជាផ្លូវការ នូវ​ការប្រកួតបាល់ទាត់ ដណ្ដើមពានរង្វាន់ពិភពលោក ឆ្នាំ២០១៤ លើកទី២០។ ឆ្នាំ២០១៤នេះ ប្រទេសប្រេស៊ីល បាន​ទទួលធ្វើជាម្ចាស់ផ្ទះរៀបចំការប្រកួត ជាលើកទីពីរ បន្ទាប់ពីលើកទីមួយរបស់ខ្លួន កាលពីឆ្នាំ១៩៥០។

ទស្សនិកជនជាង៦ម៉ឺននាក់ បានរីករាយកំសាន្ដផ្ទាល់ ជាមួយនឹងការបង្ហាញនូវផ្ទាំងទស្សនីយភាព ប្រមាណជា​២៥​នាទី រួមសម្ដែងដោយអ្នករាំ៦៦០នាក់ ក្រោមវត្តមានរបស់ប្រធានាធិបតីប្រេស៊ីល លោកស្រី ឌីលម៉ា រូស៊ែហ្វ (Dilma Rousseff) និងមេដឹកនាំមកពីប្រទេសប្រមាណជាង១០ផ្សេងទៀត បូករួមទាំងលោកអគ្គលេខាធិការ​អង្គការ​សហ​ប្រជាជាតិ បាន គី-មូន (Ban Ki-moon) និងមនុស្សម្នាក់ទៀតដ៏សំខាន់ គឺនាយកសហព័ន្ធកីឡាបាល់ទាត់អន្តរជាតិ (FIFA) លោក ជូសេហ្វ ផ្លាស្ទ័រ (Joseph Blatter) នោះផង។

អ្នកដឹកនាំឈុតឆាកជនជាតិប៊ែលហ្សិក លោក ដាហ្វនេ ក័ណេ (Daphné Cornez) បានថ្លែងនៅក្រោយពិធីនោះថា៖ «ផ្ទាំងទស្សនីយភាព នៃការបើកប្រកួតបាល់ទាត់ពិភពលោក បានឧទ្ទិសទៅប្រទេសប្រេស៊ីល និងរតនៈសម្បត្តិ៍​របស់​ប្រទេសនេះ ដែលទាំងអស់គ្នាដឹងថា ជាធម្មជាតិអ្នកស្រឡាញ់បាល់ទាត់»។

លោកបានថ្លែងទៀតថា ក្នុងនាទីនីមួយៗ ត្រូវបានចំណាយពេលជាង២០ម៉ោង ដើម្បីរៀបចំតម្លើងឈុតឆាក និង​តម្រូវឲ្យមានការ​ហាត់​សមជាមួយនឹងសិល្បករ និងអ្នករាំ ប្រមាណជា៨៤ម៉ោង។

ការរៀបចំឈុតឆាក មានការចូលរួមពីតារាបីរូប៖ តារាចម្រៀងប្រេស៊ីល នាង ឡេតេ (Leitte)  តារាចម្រៀង​រ៉ាប់ដ៏ល្បី លោក ភីតប៊ូល (Pitbull) និងតារាចម្រៀងអន្តរជាតិដ៏ល្បី នាង ជេនីហ្វើរ ឡូប៉េស (Jennifer Lopez)។ អ្នកទាំងបី​បាន​បកស្រាយ ចម្រៀងផ្លូវការ របស់ការប្រកួតបាល់ទាត់ពិភពលោកលើកនេះ ដែលមានចំណងជើងថា «យើងជា​ពិភព​លោកតែមួយ (We are one)»។

អ្វីដែលខុសប្លែកបន្ដិច ពីការបើកប្រកួតបាល់ទាត់ពិភពលោក លើកមុនៗ គឺនៅឆ្នាំនេះ ប្រធានាធិបតីប្រេស៊ីល លោក​ស្រី ឌីលម៉ា រូស៊ែហ្វ ដែលតំណាងឲ្យម្ចាស់ផ្ទះរៀបចំការប្រកួត មិនបានថ្លែងសុន្ទរកថា​ដើម្បីដាក់ឲ្យសម្ពោធពិធី​ដ៏​សម្បើមនេះទេ។ នេះអាចទំនងមកពីបញ្ហារំជើបរំជួល និងបាតុកម្មនៅក្នុងសង្គម បានក់ើតឡើងជាញឹកញាប់ នា​រយៈ​ពេល​ចុង​ក្រោយ​ នៅក្នុងប្រទេសម្ចាស់ផ្ទះមួយនេះ៕

ចម្រៀង «យើងជាពិភពលោកតែមួយ (We are one)»៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...