គណបក្សសង្គ្រោះជាតិ បានចោទប្រកាន់ថា យ៉ាងហោចណាស់ មានទូរស័ព្ទដៃ៨គ្រឿង និងអាយផេត៨គ្រឿង​របស់ ក្រុមបេក្ខជនជាប់ឆ្នោតតំណាងរាស្រ្ត គណបក្សសង្រ្គោះជាតិ ត្រូវបានមនុស្សមួយក្រុមរឹបអូសយក​ និង​មិនទាន់សង​ត្រឡប់មកវិញនៅឡើយ។ មនុស្សទាំងនោះ ត្រូវបានគណបក្សសង្រ្គោះជាតិ ចោទថា ជាយោធាស្លៀក​ពាក់​ស៊ីវិល បញ្ជាដោយរដ្ឋាភិបាលគណបក្សប្រជាជនកម្ពុជា ឲ្យមកបំភិតបំភ័យ គណបក្សសង្រ្គោះជាតិឲ្យចូលប្រជុំសភា និងប្លន់​យកយុទ្ធសាស្រ្តនយោបាយ របស់គណបក្សសង្រ្គោះជាតិ។

លោក សម រង្ស៊ី (កណ្ដាល) និងលោកប៉ុល ហំម (ខាងស្តាំ)។ (រូបថត MONOROOM.info/ U. Bory)

នយោបាយ - ប្រធានគណៈកម្មាធិការនាយក នៃគណបក្សសង្រ្គោះជាតិ លោក ប៉ុល ហំម បានថ្លែងបញ្ជាក់ នៅក្នុង​សន្និសីទសារព័ត៌មាន នៅថ្ងៃទី០៩ ខែមិថុនា ឆ្នាំ២០១៤ ចាត់ទុកវត្តមានក្រុមយោធាស្លៀកពាក់ស៊ីវិល នៅក្នុងឱកាស​នៃការចុះជួបសកម្មជនរបស់ខ្លួន នៅស្រុកអន្លង់វែង ខេត្តឧត្តរមានជ័យ ថាជាការគំរាមកំហែងខាងផ្នែក​នយោបាយ​មួយ​ ពីសំណាក់រដ្ឋាភិបាល ដែលដឹកនាដោយគណបក្សប្រជាជនកម្ពុជា។ មន្ត្រីជាន់ខ្ពស់គណបក្សរូបនេះ បានចោទ​ប្រកាន់ សកម្មភាពនោះថា មានបំណងបង្ខំឲ្យក្រុមតំណាងរាស្ត្រជាប់ឆ្នោត របស់គណបក្សប្រឆាំងឲ្យចូលរដ្ឋសភា ដោយមិន​បាច់ចរចា។ លោក បាននិយាយថា៖ «គោលដៅរបស់គេសំខាន់ គឺចង់ឲ្យយើងចូលសភា»។ ។

ការប្រឈមមុខគ្នា រវាងមន្ត្រីរបស់គណបក្សសង្រ្គោះជាតិ និងក្រុមមនុស្សស្និតនឹងគណបក្សប្រជាជនកម្ពុជា បាន​កើត​ឡើងនៅថ្ងៃទី០៨ ខែមិថុនា ម្សិលម៉ិញ ក្នុងស្រុកអន្លង់វែង ខេត្តឧត្តរមានជ័យ រហូតជំរុញឲ្យគណបក្សសង្គ្រោះជាតិ សម្រេចលុបចោលវេទិការសាធារណៈរបស់ខ្លួន នៅទីនោះ ភ្លាមៗយ៉ាងតក់ក្រហល់។ គណបក្សនេះ ថែមទាំង​បាន​អះអាង​ទៀតថា ទ្រព្យសម្បត្តិមានតម្លៃរបស់មន្ត្រីគណបក្សជាន់ខ្ពស់មួយចំនួនមក ត្រូវបានដកហូតយក ដោយ​ក្រុម​មនុស្សដែលគណបក្សប្រឆាំងនិយាយថា ជាទាហានស្លៀកពាក់ស៊ីវិល។

លោក ប៉ុល ហំម បាននិយាយឲ្យដឹងទៀតថា ទ្រព្យសម្បត្តិដែលត្រូវកំហែងយកដោយខុសច្បាប់ ជាករណីមួយ តែ​សំខាន់វាជារូបភាពអាក្រក់ ខាងផ្នែកនយោបាយ។ លោកបានសង្កត់ធ្ងន់ថា៖ «ក្នុងអាយផេត មានអាថ៌កំបាំង​របស់​គណបក្សសង្រ្គោះជាតិ (មាន) យុទ្ធសាស្រ្ត។ (...) មកប្លន់យកឯកសាររបស់យើង នេះជាការជ្រៀតជ្រែក ខាង​ផ្នែក​នយោបាយមួយធ្ងន់ធ្ងរណាស់ មកលើគណបក្សសង្រ្គោះជាតិ។»

រហូតមកដល់ពេលនេះ ទស្សនាវដ្ដីមនោរម្យ.អាំងហ្វូ មិនទាន់ទទួលប្រតិកម្មបំភ្លឺ​ជាផ្លូវការ ពីសំណាក់​សមត្ថកិច្ច​ខេត្ត​ឧត្តរមានជ័យ និងមន្រ្តីជាន់ខ្ពស់របស់​រដ្ឋាភិបាល​កម្ពុជា  ទៅនឹងការចោទប្រកាន់របស់គណបក្សសង្រ្គោះ​ជាតិ​នៅ​ឡើយ។

យ៉ាងណាក៏ដោយ ទាក់ទងនឹងការបង្ខំគណបក្ស​សង្រ្គោះ​ជាតិ ឲ្យត្រឡប់ចូលប្រជុំ នៅក្នុងរដ្ឋសភានោះ ត្រូវបាន​លោក ជាម យៀប ប្រធាន​គណៈកម្មការ​ហិរញ្ញវត្ថុ និង​សវនកម្ម​ជាតិ​នៃ​រដ្ឋសភា និង​ជា​តំណាងរាស្ត្រ​គណបក្ស​ប្រជាជន​កម្ពុជា ថ្លែង​ចំអកឲ្យថា៖ «បើគណបក្សសង្រ្គោះជាតិ ធ្វើពហិការមិនចូលប្រជុំរដ្ឋសភា មិនចូលទៀតទៅ ដល់ឆ្នាំ២០១៨ តែ​ម្តងទៅ។ »៕