បេក្ខជនតំណាងរាស្រ្តជាប់ឆ្នោតខេត្តស្វាយរៀង របស់គណបក្សសង្រ្គោះជាតិ លោក រៀល ខេមរិន្រ្ទ ថ្ងៃទី០៧ ខែ​មិថុនា ឆ្នាំ២០១៤ នេះបានអះអាងថា រដ្ឋធម្មនុញ្ញដែលកំណត់ឲ្យពលរដ្ឋកម្ពុជាគ្រប់រូប មានសិទ្ធិសេរីភាពបញ្ចេញមតិ គឺមានចែងតែនៅក្នុងច្បាប់ប៉ុណ្ណោះ ព្រោះភាពជាក់ស្តែង រដ្ឋាភិបាលគណបក្សប្រជាជនកម្ពុជា កំពុងបិទសិទ្ធិ​សេរីភាពបញ្ចេញមតិរបស់ពលរដ្ឋ។

លោក រៀល ខេមរិន្ទ្រ បេក្ខជនតំណាងរាស្រ្តជាប់ឆ្នោត គណបក្សសង្គ្រោះជាតិ។ (រូបថត MONOROOM.info/ O. Vary)

សិទ្ធិ - ក្នុងឱកាសយកផ្កាឈូក ទៅដាក់លើរបងលួសបន្លា ដែលព័ន្ធជុំវិញទីលានប្រជាធិបតេយ្យ ជាមួយក្រុមយុវជន​គណបក្សសង្រ្គោះជាតិ លោក រៀល ខេមរិន្រ្ទ បេក្ខជនតំណាងរាស្រ្តជាប់ឆ្នោតខេត្តស្វាយរៀង របស់គណបក្ស​សង្រ្គោះ​ជាតិ បានបញ្ជាក់ប្រាប់ក្រុមអ្នកសារព័ត៌មានថា៖ «យើងមានច្បាប់រដ្ឋធម្មនុញ្ញ ដែលចែងអំពីការជួបជុំ ការ​បញ្ចេញមតិ ការធ្វើបាតុកម្ម តែអ្វីគ្រប់យ៉ាងវាមានតែនៅក្នុងក្រដាស ទីលានប្រជាធិបតេយ្យត្រូវបានបិទ គេមិន​ឲ្យ​យើងធ្វើ»។

លោកអភិបាលរាជធានីភ្នំពេញ ប៉ា សុជាតិវង្ស អំឡុងខែមីនា ឆ្នាំ២០១៤ បានថ្លែងថា ទីតំាងទីលានប្រជាធិបតេយ្យ នឹងត្រូវបិទមិនឲ្យមានការប្រមូលផ្តុំ ជួបជុំគ្នាធ្វើបាតុកម្ម រហូតដល់ការស៊ើបអង្កេតករណីហិង្សានៅផ្លូវវេងស្រេង និង​ករណីពាក់ព័ន្ធផ្សេងទៀតត្រូវបានបិទបញ្ចប់។

តែសម្រាប់អ្នកតាមដានស្ថានការណ៍នយោបាយ និងសង្គមកម្ពុជា ឯករាជ្យ បានលើកឡើងថា ស្ថានភាព​សន្តិសុខ​នៅរាជធានីភ្នំពេញ ក៏ដូចជានៅទូទាំងប្រទេសកម្ពុជាបច្ចុប្បន្ន មិនមានភាពចាំបាច់ ឈានដល់ការបិទទីលាន​ប្រជា​ធិបតេយ្យនោះទេ ហើយរដ្ឋាភិបាល និងសាលារាជធានីភ្នំពេញ មិនគម្បីយកករណីផ្លូវវ៉េងស្រេង និងទីលាន​ប្រជាធិបតេយ្យដែលជាករណីពីរ និងទីកន្លែងពីរដាច់ពីគ្នា មកសំអាងក្នុងការបិទទីលានប្រជាធិបតេយ្យ នោះទេ។

នៅពេលសួរថា តើពេលទីលានប្រជាធិបតេយ្យ នឹងបើកឲ្យដំណើរការឡើងវិញ លោក ឡុង ឌីម៉ង់ មន្រ្តីអ្នក​នាំពាក្យ​សាលារាជធានីភ្នំពេញ បានបញ្ជាក់ខ្លីប្រាប់ទស្សវាវដ្តីមនោរម្យ.អាំងហ្វូ កាលពីពេលថ្មីៗនេះថា៖ «ពេលនេះ ខ្ញុំនៅ​មិនទាន់ទទួលបានគោលការណ៍ថ្មីពីថ្នាក់លើ»។

សម្រាប់ក្រុមយុវជនរបស់គណបក្សសង្រ្គោះជាតិ ជាគណបក្សជំទាស់ ដែលបានអមដំណើរលោក រៀល ខេមរិន្រ្ទ ទៅកាន់ទីលានប្រជាធិបតេយ្យ បានអះអាងថាពួកគេ នឹងបន្តមកកាន់ទីលានប្រជាធិបតេយ្យជារៀងរហូត ដរាប​ណាវិបត្តិនយោបាយកម្ពុជា មិនទាន់ដោះស្រាយរួច និងទីលានប្រជាធិបតេយ្យមិនត្រូវបាន បើកឲ្យដំណើរការ​បញ្ចេញមតិជាប្រក្រតី៕