មន្រ្តីសង្គមស៊ីវិលបានលើកឡើងថា ជារឿយៗមន្រ្តីក្នុងជួររដ្ឋាភិបាលតែងតែសន្យា នឹងថែក្សាធនធានព្រៃមិនឱ្យ​បាត់បង់នោះទេ រហូតដល់ភ្នាល់ហ៊ានដាក់ជីវិត ប៉ុន្តែផ្ទុយទៅវិញគេឃើញថា «កាន់តែសន្យា ព្រៃឈើកាន់តែ​វិនាស​ហិនហោច»។

ក្រុមយុវជនប្រារព្ធទិវាបរិស្ថានពិភពលោក ថ្ងៃទី០៥ ខែមិថុនា ឆ្នាំ២០១៤។ (រូបថត MONOROOM.info/ C. Nita)

បរិស្ថាន - ជាសកម្មជនការពារសិទ្ធិមនុស្ស មកពីជម្ឈមណ្ឌលអប់រំច្បាប់ សម្រាប់សហគមន៍ លោក បូ ពៅ បាន​ថ្លែង​រិះគន់រដ្ឋាភិបាល ចំពោះចំណាត់ការនៃការ​ថែរក្សា​ធន​ធានព្រៃឈើថា និយាយបានតែនិយាយ តែមិនដែល​ចាត់​វិធានការ​តឹងរ៉ឹងណាមួយ ទៅលើជនល្មើសដែលបំផ្លាញ​ធន​ធានព្រៃឈើ និងសត្វព្រៃនោះទេ។ ការកាប់បំផ្លាញ​ព្រៃ​ឈើ និងសត្វព្រៃនៅក្នុងប្រទេសកម្ពុជាបច្ចុប្បន្ន កាន់តែហិន​ហោចទៅៗ ពីមួយថ្ងៃទៅមួយថ្ងៃ ដីក៏កាន់តែបាត់បង់។

ក គាត់នៅតែ ក គាត់ដដែល ...

មន្ត្រីដែលជាអ្នកផ្តួចឱ្យ​មាន​កម្មវិធី ក្នុងថ្ងៃប្រារព្ធទិវាបរិស្ថានពិភពលោក ថ្ងៃទី៥ ខែមិថុនាផងនោះ បានថ្លែង​បញ្ជាក់​ទៀតថា៖ «យើងមិនដែលជឿសម្តីរបស់រដ្ឋាភិបាលទេ ពីព្រោះពីមួយឆ្នាំទៅឆ្នាំ ពីមួយអាណត្តិ​ទៅមួយ​អាណត្តិគាត់​នៅតែ​និយាយ តែព្រៃនៅតែហិនហោច ជាពិសេសសម្តីនាយករដ្ឋមន្រ្តី ដែលនិយាយថាបើគាត់​ការពារ​ព្រៃឈើ​មិន​បាន គាត់នឹងកាត់កគាត់ ហើយឥលូវព្រៃឈើវិនាសអស់ហើយ ក គាត់នៅតែ ក គាត់ដដែល។ អញ្ចឹង​យើង​អត់ជឿទេ មាន​តែពួកយើងទេដែលក្រោកឈឡើង ធ្វើការទប់ស្កាត់ទាំងអស់គ្នា។»

លោក សី ពៅ មន្រ្តីទទួលបន្ទុកផ្នែកប្រែប្រួសអាកាសធាតុ នៃអង្គការកម្មវិធីអភិវឌ្ឍធនធានយុវជន ក៏បានថ្លែង​ប្រហាក់ប្រហែលនេះដែរ។ លោកនិយាយថា ភាគច្រើនរដ្ឋាភិបាលបានធ្វើ និងបានសន្យាពីការថែរក្សាបរិស្ថាន ប៉ុន្តែ​ការអនុវត្តភាគច្រើន ពីមន្រ្តីក្រោមឱវ៉ាទរបស់ក្រសួង មិនបានអនុវត្តតាមអ្វី ដែលបានប្រកាសឱ្យមាន​ប្រសិទ្ធិភាព​នោះទេ ។ យ៉ាងណាម៉ិញ ការមិនអើពើរបស់ប្រជាពលរដ្ឋមួយចំនួន ដែលមិនយកចិត្តទុកដាក់ក្នុងការថែរក្សាបរិស្ថាន ក៏ជាការបង្កឱកាសមួយដល់ក្រសួង ឬក៏អ្នកពាក់ព័ន្ធ មិនចាត់វិធានការ ដល់អ្នកកាប់បំផ្លាញព្រៃឈើនេះផងដែរ។

លោកថ្លែងបន្តថា ព្រៃមានសារៈសំខាន់ណាស់ ដោយសារតែព្រៃឈើកាន់អស់ទៅៗនេះហើយ ទើបបណ្តាល​ឱ្យ​មានគ្រោះមហន្តរាយកាន់តែច្រើនឡើង។ ហើយព្រៃឈើមានតួនាទីសំខាន់ ក្នុងការកាត់បន្ថយ ការបំភាយឧស្ម័នពុល ដែលបញ្ចេញទៅក្នុងបរិយាកាស បើព្រៃឈើអត់មានការប្រែប្រួលអាកាសធាតុ កាន់តែមានទំហំធំទៅៗ។

នៅក្នុងសេចក្តីថ្លែងការណ៍រួម របស់ក្រុមអង្គការសង្គមស៊ីវិល និងយុវជននៅថ្ងៃទី០៥ ខែមិថុនា ឆ្នាំ២០១៤នេះ បាន​បញ្ជាក់ថា បើទោះបីជារាជរដ្ឋាភិបាល បានអនុម័តច្បាប់ស្តីពីព្រៃឈើ ច្បាប់ស្តីពីកិច្ចការពារបរិស្ថាន និងការគ្រប់គ្រង់​ធនធានធម៌ជាតិ ច្បាប់ស្រីពីតំបន់ធម៌ជាតិ និងលិខិតបទដ្ឋានផ្សេងក្នុងគោលបំណងការពារបរិស្ថាន និងព្រៃឈើ​យ៉ាងណាក៏ដោយ ប៉ុន្តែសកម្មភាពកាប់បំផ្លាញព្រៃឈើខុសច្បាប់ នៅតែមានដដែល ក្រោមរូបភាពដី​សម្បទាន​សេដ្ឋកិច្ច សម្បទានព្រៃឈើ រ៉ែ និងទំនប់វារីអគ្គីសនី ដែលកំពុងតែគម្រាមដល់បរិស្ថានយ៉ាងធ្ងន់ធ្ងរ។

មិនអាចទាក់ទងមន្ត្រីទទួលខុសត្រូវ របស់ក្រសួងបរិស្ថាន ដើម្បីបកស្រាយទៅនឹងការលើកឡើងខាងលើ បាននៅ​ឡើយនៅល្ងាចថ្ងៃទី៥ ខែមិថុនានេះ៕