«ពាក្យបណ្តឹងមានជាហូរហែរ ឯការដោះស្រាយបានត្រឹមតែម៉ាដោះស្រាយ!» នេះជាកិច្ចសម្ភាសរបស់លោកតា ឡោ ឈាន ជាមួយអ្នកសារព័ត៌មាននៅមុខ អង្គភាពប្រឆាំងអំពើពុករលួយ កាលពីថ្ងៃទី២៩ ខែឧសភា ២០១៤ បង្ហាញ​ពី​«ទុក្ខ» ព្រោះអំពើពុករលួយ នាំឲ្យមានការបំផ្លាញធនធានធម្មជាតិ និងសម្បត្តិរដ្ឋនាពេលកន្លងមក រហូត​បច្ចុប្បន្ន។ សូមតាមដាននូវកិច្ចសម្ភាសជាមួយលោកតា ជាមួយទស្សនាវដ្តីមនោរម្យ.អាំងហ្វូដូចតទៅ។

លោកតា ឡោ ឈាន អាយុ ៦៦ឆ្នាំ មកពីខេត្តកំពត។ (រូបថត MONOROOM.info/ O. Vary)

សិទ្ធិពលរដ្ឋ - ក្នុងវ័យចំណាស់ លោកតា ឡោ ឈាន អាយុ ៦៦ឆ្នាំ មកពីខេត្តកំពត បានធ្វើការប្រមូលផ្តុំប្រជា​ពលរដ្ឋ​ជាច្រើនខេត្ត ដើម្បីធ្វើការតស៊ូមតិ និងចូលរួមក្នុងការការពារធនធានធម្មជាតិ និងសម្បត្តិរដ្ឋនានា ដែលបាននឹងកំពុង​ប្រឈមជាមួយភាព«ហិនហោច» ដោយគ្មានវិធានការទប់ស្កាត់ពីអាជ្ញាធរ ឬរដ្ឋាភិបាលនោះ។

នាព្រឹកថ្ងៃតី២៩ ខែឧសភា ម្សិលម៉ិញនេះ លោកតាបានបន្តថា ប្រជាពលរដ្ឋមកពីសហគមនេសាទទាំងប្រៃ ទឹកសាប និងសហគមន៍ដីធ្លីជាច្រើនទៀត បានមកប្រមូលផ្តុំគ្នា ដើម្បីជូនជាការជូនដំណឹងទៅកាន់រដ្ឋាភិបាល ក៏ដូចជាអង្គភាព​ប្រឆាំងអំពើពុករលួយបានដឹង និងជួយដោះស្រាយឲ្យមាន«យុត្តិធម៌»ទៅតាមផ្លូវច្បាប់។

ជាមួយគ្នានេះ លោកតាបានធ្វើការរំលឹកថា ទាំងពាក្យបណ្តឹង ទាំងញាតិរបស់ប្រជាពលរដ្ឋ បានធ្វើជាហូហែរយូ​មក​ហើយ តែរាល់ពាក្យបណ្តឹងនិងញត្តិទាំងនោះ បានត្រឹមតែដោះស្រាយទេ តែហាក់ដូចជាគ្មានប្រសិទ្ធិភាព ឬ​លទ្ធផល​ឡើយ។

ពលរដ្ឋវ័យចំណាស់ បានបន្តថា ការជួបជុំគ្នារបស់សហគមន៍នានា របស់ប្រជាពលរដ្ឋនាពេលនេះ ព្រោះតែ​មិន​ទាន់​អស់នូវទុក្ខកង្វល់ ដោយកន្លងមកបានតាំងចិត្តថា ថ្ងៃណាមួយ នឹងមកជួមជុំគ្នាដល់កន្លែង ដើម្បីបង្ហាញពីទុក្ខកង្វល់​រៀងៗខ្លួន។ «យើងធ្វើនេះមិនមានគោលបំណង បំរើឲ្យគណបក្សនយោបាយណាមួយទេ។ យើងធ្វើនេះ ដើម្បី​ប្រយោជន៍ប្រជាជន ដើម្បីប្រយោជន៍រួមទាំងអស់គ្នា។»

លោកតា ឡោ ឈាន បានពន្យល់ទៀតថា៖ «បាត់បង់ដែននេសាទទឹកសាប ក៏ដូចជាទឹកប្រៃ បាត់បង់ធនធាន​ធម្មជាតិ បាត់បង់ព្រៃឈើ និងការបណ្តេញចេញជាដើម។ (...) ឥឡូវ(ប្រជាពលរដ្ឋ)ដឹងស្ទើរទូទាំងប្រទេសហើយ ការបំផ្លាញព្រៃឈើ ដូចជាព្រៃឡង់ និងមានច្រើនទៀតដែលមិនអាចបញ្ជាក់ជូនបាន។ (...) អ្វីដែលយើងចង់បានគឺ មុននឹងធ្វើការចាប់ចងប្រជាជនណាដែលប្រព្រឹត្តិអ្វីខុស ឲ្យតាមដានឲ្យពិតប្រាកដសិន។ (...) កុំដែលចាប់គ្នាមក​សួរ​ចំលើយ និងឃុំឃាំងគ្នាមួយខែ ពីរខែ ហើយបានលែងវិញនោះ។»

ក្នុងក្តីសង្ឃឹមថា រដ្ឋាភិបាល ក៏ដូចជាអង្គភាពប្រឆាំងអំពើពុករលួយ នឹងធ្វើការដោះស្រាយសម្រាប់​ប្រជាពលរដ្ឋ​ទាំង​អស់ បុរសវ័យចំណាស់ បានបញ្ចប់កិច្ចសម្ភាស ដោយឃ្លាព្រមានថា៖ «បើសិនណាយើងធ្វើប៉ុននឹងហើយ គាត់នៅ​តែមិនដោះស្រាយឲ្យ ថ្ងៃក្រោយយើងនឹងធ្វើទៀត អានឹងសូមជំរាបជូនអញ្ចឹង។ ថ្ងៃនេះ យើងធ្វើសុំសន្តិភាព​ទាំងអស់​គ្នា យើងធ្វើមិនមែនចង់ឈ្នះចង់ចាញ់ទេ។»៕

សូមទស្សនាវីដេអូ ពីកិច្ចសម្ភាសនេះ ដូចតទៅ៖