យន្ដហោះប៊ូអីង ៧៧៧ របស់ក្រុមហ៊ុនអាកាសចរណ៍ ម៉ាឡេស៊ីអ៊ែឡាញ ដែលបានបាត់ខ្លួនតាំងពីដើម​ខែមីនា​មក​នោះ មិនបានហោះទៅធ្លាក់នៅតំបន់ ដែលគេបានរកឃើញរលកសម្លេង ក្នុងលំហសមុទ្រខាងត្បូង នៃមហាសមុទ្រ​ឥណ្ឌា​នោះឡើយ។ រលកសម្លេង ដែលបានធ្វើឲ្យគេគិតថា ជាសម្លេងផ្ដល់ដោយប្រអប់ខ្មៅនៃយន្ដហោះ នៅទីបំផុត​ត្រូវបានអ្នកស៊ើបអង្កេត រកឃើញនៅពេលនេះ ថាមិនមែនជារលកសម្លេង ចេញពីយន្ដហោះនោះឡើយ។ របក​គំហើញថ្មី ដែលតម្រូងឲ្យការរុករក ចាំបាច់ត្រូវចាប់ផ្ដើមធ្វើ ពីចំណុចសូន្យមកវិញ។

តំបន់នៃការរុករក ត្រូវបានពង្រីកនៅជុំវិញចំណុច ដែលយន្ដហោះបានបាត់ពីកញ្ចក់រ៉ាដា។

បាត់យន្ដហោះ - អាថ៌កំបាំងនៃការបាត់ខ្លួនរបស់យន្ដហោះ ដែលភ្ជាប់ជើងហោះហើរ MH370 ពីរដ្ឋធានីកូឡាឡំពួរ ឆ្ពោះទៅរដ្ឋធានីប៉េកាំង ដូចជាមានទំហំកាន់តែធំទៅៗ។ មជ្ឈមណ្ឌលដឹកនាំការរុករកយន្ដហោះនេះ (JACC) មាន​ទីតាំងនៅប្រទេសអូស្ត្រាលី បានប្រកាសនៅថ្ងៃព្រហស្បត្តិ៍នេះថា «គ្មានស្លាកស្នាម នៃបំណែកណាមួយ​របស់​យន្ដហោះ ត្រូវបានរកឃើញ ដោយយានជ្រមុជក្រោមទឹក នោះឡើយ»។ មជ្ឈមណ្ឌល បានស្រង់សេចក្ដីសន្និដ្ឋាន របស់ទីភ្នាក់ងាសុវត្ថិភាពគមនាគមន៍អូស្ត្រាលី មកបញ្ជាក់ទៀតថា៖ «តំបន់នោះលែងត្រូវបានគិតថា ជាកន្លែងដែល​យន្ដហោះបានធ្លាក់នោះទៀតហើយ»។

នាវារុករករបស់អូស្ត្រាលី អូសេន សៀហ្វ (Ocean Shield) ដែលមានផ្ទុកយានជ្រមុជទឹក របស់អាមេរិក ប្លូហ្វីន ២១ (Bluefin-21) បានចាកចេញពីតំបន់នោះហើយ បន្ទាប់ពីបានរុករាវនៅលើផ្ទៃក្រឡាប្រមាណជា ៨៥០គីឡូម៉ែត្រការ៉េ ក្នុងលំហសមុទ្រដ៏ធំល្វឹងល្វើយនោះរួចមក។

រលកសញ្ញា ផ្ដល់ដោយនាវា

សេចក្ដីប្រកាសនេះ បានអះអាងដូចទៅនឹងការថ្លែងឲ្យដឹង របស់នាយករងខាងការស៊ើបអង្កេតនាវាចរណ៍ របស់​កងទ័ពជើងទឹកអាមេរិកាំង លោក ម៉ៃឃើល ឌីន (Michael Dean) ដូច្នេះដែរ។ លោកបាននិយាយថា រលកសម្លេង​ដែលត្រូវបានចាប់បាន កាលពីដើមខែមេសា ទំនងមិនមកពីប្រអប់ខ្មៅ របស់យន្ដហោះប៊ូអីងនោះទេ។

លោក ម៉ៃឃើល ឌីន ធ្លាប់បានបញ្ជាក់ប្រាប់បណ្ដាលទូរទស្សន៍ ស៊ីអីនអីន ថា «យើងឈានមកដល់គំនិតមួយ ដែល​គិតថា រលកសម្លេងដែលទទួលបាននោះ អាចត្រូវបានផ្ដល់ដោយនាវា ដែលនាំយានជ្រមុជទឹក ឬដោយប្រព័ន្ធ​អេឡិចត្រូនិក នៃឧបករណ៍រុករក»។ លោកបានសម្ដែងក្ដីបារម្ភទៀតថា នៅពេលយើងជ្រមុជ សម្ភារៈអេឡិចត្រូវនិក ចូលទៅក្នុងទឹក គឺទឹកនេះហើយ ដែលបានជ្រាបចូលទៅក្នុងប្រព័ន្ធទាំងនោះ ហើយបង្កើតជារលកសម្លេងនេះឡើង។

តែលោក ឌីន មិនបានបដិសេធទាំងស្រុងថា រលកសម្លេង មិនបានចេញពីប្រអប់ខ្មៅនោះទេ។ យ៉ាងណាក៏ដោយ ក៏​រហូតមកដល់ពេលនេះ គ្មានអ្វីដែលបានបញ្ជាក់ឲ្យច្បាស់ ពីរលកសម្លេងនេះឡើយ។

ហើយអ្វីដែលគេគិតថា រលកសម្លេង​ទាំងនេះ មិនមែនជារលកសម្លេង ចេញពីប្រអប់ខ្មៅនោះទៀត ដោយសារ​តែ​រហូតមកដល់ពេលនេះ នាវារុករក​ នៅ​តែទទួលបាននូវរលកសម្លេង ដែលដូចគ្នាទៅនឹងរលកសម្លេងមុនៗ ខណៈ​ពេលដែលអាគុយភ្លើងរបស់ប្រអប់ខ្មៅ បានស្លាប់ទៅហើយ។ អាគុយភ្លើងរបស់ប្រអប់ខ្មៅ មានអាយុត្រឹមតែ​១ខែ​ប៉ុណ្ណោះ បន្ទាប់ពីប្រអប់ខ្មៅបានធ្លាក់ចូលក្នុងទឹក ហើយរលកសម្លេងបញ្ជាក់ពីវត្តមានរបស់ប្រអប់ខ្មៅ ក៏ផុតរលត់​ទៅ​ជាមួយអាគុយនោះដែរ។

គ្មានអ្វី ដែលត្រូវបានរកឃើញទាល់តែសោះ

យុទ្ធនាការរុករក ពីពេលនេះទៅ នឹងចូលដំណាក់កាលថ្មីទៀត ជាមួយនឹងការរិភាគយ៉ាងម៉ត់ចត់បន្ថែម ពី​ទិន្នន័យ​ទាំងឡាយ ដើម្បីកំណត់ពីតំបន់រុករក ដែលមានផ្ទៃក្រឡារហូងទៅដល់ទៅ ៦០ ពាន់គីឡូម៉ែត្រការ៉េ។ ដំណាក់​កាល​ថ្មីនេះ នឹងចាប់ផ្ដើមពីខែសីហាខាងមុខនេះទៀត ជាមួយនឹងយានជ្រមុជទឹកស្វ័យប្រវត្តិ ដែលមានបច្ចេកវិទ្យា​ និង​វិទ្យាសាស្ត្រខ្លាំងក្លាជាងមុន របស់ក្រុមហ៊ុនមួយ ជំនាញខាងគូរផែនទីនៅបាតសមុទ្រ។

ប៉ុន្តែនៅពេលនេះ នាវាមួយរបស់ប្រទេសចិន ហ្សូ កេសេន (Zhu Kezhen) ទំនងជាបានចាប់ផ្ដើមការងារនេះខ្លះ ជា​មុនរួចទៅហើយ នៅក្នុងតំបន់សង្ស័យដ៏ទូលាយ ក្នុងមហាសមុទ្រឥណ្ឌាខាងត្បូងនេះ៕