ជនជាតិបរទេសបីនាក់ ដែលជាប់ចោទពីបទព្យាយាម រត់ម្សៅកូកាអ៊ីន ទម្ងន់២,២គីឡូក្រាម ទៅកាន់ប្រទេស​អូស្ត្រាលី​នោះ ត្រូវបានកាត់ទោសឲ្យជាប់ពន្ធនាគារ ពី២៣ឆ្នាំ ទៅដល់២៧ឆ្នាំ ដោយតុលាការសាលា​ដំបូងរាជធានី​ភ្នំពេញ នៅព្រឹកថ្ងៃពុធទី២៨ ខែឧសភានេះ។

សាលាដំបូងរាជធានីភ្នំពេញ មើលពីក្រៅ។ (រូបថត MONOROOM.info/ S.Tith)

ប្រព័ន្ធច្បាប់ - ជនជាតិបរទេសទាំងបីនាក់ មានស្ត្រីវ័យក្មេងម្នាក់ជាជនជាតិបារាំង អាយុ១៩ឆ្នាំ ស្ត្រីម្នាក់ជនជាតិ​អូស្ត្រាលី អាយុ៤១ឆ្នាំ និងយុវជនម្នាក់ទៀតជាជនជាតិនីហ្សេរីយ៉ា។ ស្ត្រីជាប់ចោទ​ត្រូវបានឃាត់ខ្លួន កាលពីខែកញ្ញា​ឆ្នាំ២០១៣កន្លងទៅ នៅក្នុងព្រលានយន្ដហោះភ្នំពេញ ជាមួយនឹងកាបូបស្ពាយនឹងខ្នង ដែលមានដាក់គ្រឿងញៀន។

សាលាដំបូងរាជធានីភ្នំពេញ បានរកឃើញថាអ្នកទាំងបីមានទោស ពីបទរត់«គ្រឿងញៀងអន្តរជាតិ» ហើយ​បង្គាប់​ឲ្យទទួលទោស កាលពីព្រឹកថ្ងៃពុធទី២៨ ខែឧសភានេះ ឲ្យស្ត្រីជនជាតិបារាំងជាប់ទោស ២៥ឆ្នាំ ស្រីជនជាតិអូស្ត្រាលី ជាប់ទោស២៣ឆ្នាំ។ រីឯយុវជនជនជាតិនីហ្សេរីយ៉ា ដែលត្រូវបានឃាត់ខ្លួនក្នុងខែតែមួយ តែនៅពេលក្រោយមក ក្នុង​ទីលំនៅដ្ឋានរបស់ខ្លួន នៅភ្នំពេញនោះ ត្រូវបានតុលាការកាត់ទោសឲ្យជាប់ពន្ធនាគា ២៧ឆ្នាំ។

នៅក្នុងសវនាការដែលបានធ្វើឡើង កាលពីខែកន្លងទៅ ស្ត្រីទាំងពីរបានប្រកែកថា ខ្លួនមិនមែនជាម្ចាស់​នៃកាបូប​ស្ពាយនៅនឹងខ្នង ទាំងនោះទេ ដោយបានទម្លាក់ការទទួលខុសត្រូវ ទៅលើយុវជនជនជាតិនីហ្សរីយ៉ា ដែលត្រូវជា​សង្សា​របស់ស្ត្រីវ័យក្មេងជាជនជាតិបារាំង។ ម្សៅកូកាអ៊ីនទាំងនោះ ត្រូវបានគេដឹងថា នឹងត្រូវបញ្ជូនទៅឲ្យបុរសម្នាក់ មិនស្គាល់អត្តសញ្ញាណ នៅក្នុងប្រទេសអូស្ត្រាលី។

បន្ទាប់ពីបានស្ដាប់ការប្រកាសសាលដីការរួច ជនទាំងបី មិនមានធ្វើអត្ថាធិប្បាយអ្វីឡើយ។ តុលាការក៏បានកាត់​ទោសកំបាំងមុខ ទៅលើជនជាតិនីហ្សេរីយ៉ាពីរនាក់ទៀត ឲ្យជាប់ពន្ធនាគារក្នុងម្នាក់ៗ ២៧ឆ្នាំដូចគ្នា។

ប្រទេសកម្ពុជាបានបង្កើតសកម្មភាព បង្ក្រាបការជួញដូរគ្រឿងញៀន នៅក្នុងរយៈពេលចុងក្រោយនេះ ហើយ​បាន​ធ្វើការឃាត់ខ្លួនមនុស្សច្រើនរយនាក់ ក្នុងនោះមានទាំងមនុស្សដែលមានថានៈខ្ពស់ៗ ក្នុងជួររដ្ឋាភិបាលនោះផង។ ប្រទេសនេះ បានក្លាយជាតំបន់ឆ្លងកាត់យ៉ាងសំខាន់មួយ នៃក្រុមអ្នករត់គ្រឿងញៀន បន្ទាប់ពីមានការបង្ក្រាប​យ៉ាង​ខ្លាំងក្លា ទៅលើចលនាជួញដូរគ្រឿងញៀន នៅក្នុងប្រទេសថៃ តាំងពីដើមឆ្នាំ២០០០មកនោះ៕