នៅថ្ងៃទី២៣ ខែឧសភា អាជ្ញាធរខេត្តក្រចេះ និងសាលារាជធានីភ្នំពេញ បានមកចរចាជាថ្មីជាមួយប្រជាពលរដ្ឋ ដោយក្នុងនោះប្រជាពលរដ្ឋ បានដាក់នូវសំណើរ៧ចំនុច ប៉ុន្តែ ៣ចំនុចសំខាន់ដែលប្រជាពលរដ្ឋចង់បានបំផុត និងជាលក្ខខណ្ឌដើម្បីវិលត្រឡប់ ទៅខេត្តក្រចេះវិញនោះ ត្រូវបានអាជ្ញាបដិសេធ។

ក្រុមប្រជាពលរដ្ឋ អ្នកតវ៉ាដីធ្លី មកពីខេត្តក្រចេះ លើកបដាតវ៉ា។ (រូបថត MONOROOM.info/ C. Nita)

ដីធ្លី - ប្រជាពលរដ្ឋនៅចំនុចពាមប៉ោអូបី ភូមិស្រែថ្មី ឃុំឃ្សឹម ស្រុស្នួល ខេត្តក្រចេះ បានដាក់សំណើរជាថ្មី ទៅកាន់​អភិបាលខេត្តក្រចេះ ក្រោយពីអាជ្ញាធរខេត្ត ក៏ដូចជាសាលារាជធានីភ្នំពេញ បានសន្យាថានឹងដោះស្រាយ​បញ្ហា​ជូន​ពួកគាត់។

បញ្ហា៧ដែលប្រជាពលរដ្ឋចង់បាន រួមមាន
១. ត្រូវការជិះឡានដោយខ្លួនឯង។
២. សូមឱ្យមានអង្គការសង្គមស៊ីវិល និងសារព័ត៌មានជាតិ និងអន្តរជាតិចូលរួម។
៣. ត្រូវការចូលទៅរស់នៅលើដីធ្លីនោះវិញ ដោយមិនមែនជាកន្លែងដោះដូរ។
៤. សូមឱ្យមានការយល់ព្រមពីអភិបាលខេត្ត អភិបាលស្រុក និងសមត្ថកិច្ចដែលពាក់ព័ន្ធជាលាយលក្ខអក្សរ។
៥. ស្នើរសុំឱ្យសមត្ថកិច្ចការពារសុវត្តិភាព១០០% ពីសំណាក់រាជរដ្ឋាភិបាលកម្ពុជា គ្រប់លំដាប់ថ្នាក់។
៦. ពេលដែលពួកយើងខ្ញុំចង្អុលបង្ហាញដីកន្លែងណា ដែលយើងខ្ញុំធ្លាប់រស់នៅនោះ សូមឱ្យអាជ្ញាធរ អភិបាលខេត្ត អភិបាលស្រុក ទទួលស្គាល់តាមច្បាប់។
៧. នៅពេលដែរពួកយើងខ្ញុំចូលទៅរស់នៅហើយ ប្រសិនបើមានករណីណាមួយកើតឡើង ដោយការបាត់បង់ជីវិត និងរងរបួស ឬគម្រាមកំហែងដោយបញ្ហាណាមួយនោះ អាជ្ញាធរត្រូវទទួលខុសត្រូវចំពោះមុខច្បាប់។

ក្រោយពីការចរចារវាងប្រជាពលរដ្ឋ និងអាជ្ញាធរនៅថ្ងៃទី២៣ ខែឧសភានេះ ខាងអាជ្ញាធរបានព្រមឯកភាព លើ​សំណើរ៤ចំនុច គឺនៅចំនុចទី១ ទី២ ទី៤ និងទី៥។ ប៉ុន្តែចំនុចទី៣ ទី៦ និងទី៧ ជាចំនុចចំបងដែលប្រជាពលរដ្ឋត្រូវ​ការ និងកំពុងស្វែងរកអន្តរាគមន៍ ពីស្ថាប័នជាតិ និងអន្តរជាតិនោះ ត្រូវបានអាជ្ញាធរបដិសេធ ដោយលើកឡើងថា នឹងបន្តស្វែងរកដំណោះស្រាយពេលក្រោយទៀត។

តំណាងប្រជាពលរដ្ឋម្នាក់ លោក ងួន វិបុល បានបញ្ជាក់ថា ប្រជាពលរដ្ឋរងគ្រោះចំនួន៤០៥ ដែលគាត់បានមក​ទាម​ទារ​រកយុត្តិធម៌ និងទាមទាររកដំណោះស្រាយ ដល់ទីក្រុងភ្នំពេញ។ លោកបន្តថា ប្រសិនបើមិនមានដំណោះស្រាយ ទៅលើលក្ខខណ្ឌ៧ចំនុចនេះ ពួកគាត់នឹងមិនត្រលប់ទៅវិញនោះទេ ហើយគាត់នឹងតស៊ូលុះត្រាដល់ទីបញ្ចប់ ទាល់​តែទទួលបានលទ្ធផលថា តើគាត់ទទួលបានការរស់នៅ ដោយសមស្របបែបណា?

អ្នកតំណាងរូបនេះ បានឱ្យដឹងទៀតថា៖ «ប្រជាពលរដ្ឋបានទៅរស់ តាំងពីឆ្នាំ២០០៨ តែអ្វីដែលធ្វើឱ្យខ្ញុំមាន​ភាព​ងឿងឆ្ងល់ នៅពេលប្រជាពលរដ្ឋចូលទៅរស់នៅដំបូង គ្មានអាជ្ញាធរខេត្តគ្រប់មូលដ្ឋានគ្រប់លំដាប់ ដែលពាក់ព័ន្ធ​នឹងបញ្ហាដីធ្លីនេះ ទៅចូលអន្តរាគមន៍ទប់ស្កាត់ និងបណ្តេញពួកខ្ញុំ និងឱ្យពួកខ្ញុំចាកចេញពីទីលំនៅទាល់តែសោះ។ លុះបច្ចុប្បន្នឆ្នាំ២០១៤នេះ បែរមានការធ្វើអន្តរាគមន៍ មានសមត្ថកិច្ចចម្រុះ មានកងកម្លាំងវៀតណាម ដែលប្រដាប់​ទៅដោយគ្រឿងចក្រ គ្រឿងឈូសទៅបំផ្លិចបំផ្លាញផ្ទះពួកខ្ញុំ។»

អភិបាលខេត្តក្រចេះលោក ខាន់ ចំណាន និង អភិបាលស្រុករង លោកគី ណាល់ មិនអាចសុំការអធិប្បាយ ទៅលើ​បញ្ហានេះបានទេ៕