ភ្លាមៗ បន្ទាប់ពីកងទ័ពថៃប្រកាសពីការធ្វើរដ្ឋប្រហា ផ្ដួលរំលំរដ្ឋាភិបាលចាំផ្ទះនោះមក ប្រទេស និងមេដឹកនាំ​នានា​នៅក្នុង​ពិភពេលោក បានចាប់ផ្ដើមប្រតិកម្មជាបណ្ដើរៗ។ ប្រទេសបារាំងតាមរយៈប្រធានាធិបតីរបស់ខ្លួន លោក ហ្វ្រង់ស័រ ហូឡង់ (François Hollande) បានថ្កោលទោសរដ្ឋប្រហារនេះ ហើយបានអំពាវនាវឲ្យមានការ​ត្រឡប់​មក​វិញជាបន្ទាន់ នូវ​ច្បាប់​រដ្ឋធម្មនុញ្ញ និងរៀបចំនូវការបោះឆ្នោតមួយ នៅក្នុងប្រទេសថៃ។

ប្រធានាធិបតីបារាំង ហ្វ្រង់ស៊័រ ហូឡង់ ក្នុងពេលធ្វើសេចក្ដីថ្លែងការណ៍ ថ្ងៃទី៨មិថុនា / រូបថត : m.ocdn.eu

នយោបាយថៃ - អំពើរដ្ឋប្រហារយោធានៅក្នុងប្រទេសថៃ នៅរសៀលថ្ងៃទី២២ ខែឧសភានេះ ត្រូវបានថ្កោលទោស​យ៉ាង​ម៉ឺងម៉ាត់ ដោយប្រទេសបារាំង។ នៅក្នុងសេចក្ដីប្រកាសព័ត៌មានមួយ ចេញផ្សាយពីវិមានប្រធានាធិបតី អេលីហ្សេ (Élysée) លោកប្រធានាធិបតីបារាំង ហ្វ្រង់ស៊័រ ហូឡង់ បានអំពាវនាវឲ្យ មានការវិលត្រឡប់​មកវិញ​ជា​បន្ទាន់ នូវការដឹកនាំតាមរដ្ឋធម្មនុញ្ញ និងរៀបចំនូវការបោះឆ្នោត នៅក្នុងប្រទេសដែលសម្បូរទៅដោយរដ្ឋប្រហារ​មួយនេះ។

រដ្ឋប្រហារយោធា ត្រូវបានសម្រេចធ្វើនៅថ្ងៃព្រហស្បត្តិ៍ទី២២ ខែឧសភានេះ បន្ទាប់ពីកងទ័ពបានប្រកាសដាក់​ប្រទេស​ថៃ ទៅក្នុងច្បាប់អាជ្ញាសិកមួយ កាលពីថ្ងៃអង្គារ និងបន្ទាប់ពីប្រទេសថៃ បានញ៉ាំញ៉ី​ដោយវិបត្តិនយោបាយ​ដ៏រ៉ាំរ៉ៃ អស់​រយៈពេលជាង៧ខែមកហើយ។ នៅយប់ថ្ងៃព្រហស្បត្តិ៍នេះដដែល កងទ័ពបានប្រកាសក្ដាប់ក្ដាប់​អំណាច​រដ្ឋសឹងតែ​ទាំងអស់ ហើយបានធ្វើការហាមឃាត់ នូវសិទ្ធិសេរីភាពជាច្រើន នៅក្នុងប្រទេស។

សូមអានអត្ថបទមុន ដែលទាក់ទងនឹងប្រធានបទ «យោធាព្យួររដ្ឋធម្មនុញ្ញ»។

លោក ហ្វ្រង់ស៊័រ ហូឡង់ បានបញ្ជាក់ទៀតថា «សិទ្ធិ និងសេរីភាព ដែលជាមូលដ្ឋានគ្រឹះរបស់ប្រជាជនថៃ គួរតែត្រូវ​បាន​គោរព»។

នាយករដ្ឋមន្ត្រីចាំផ្ទះ លោក នីវ៉ាទំរង់ ប៊ុនសុងផាយសន (Niwattumrong Boonsongpaisan) និងរដ្ឋាភិបាលរបស់​លោក ត្រូវបានបញ្ជាឲ្យនៅក្រោមកងទ័ព និងត្រូវបង្ហាញខ្លួន នៅយប់ថ្ងៃដដែល នៅចំពោះមុខរបបដឹកនាំថ្មី ដែល​បានឈ្មោះខ្លួនឯងថា ជា«ក្រុមប្រឹក្សាជាតិដើម្បីថែរក្សាសន្តិភាព និងសណ្ដាប់ធ្នាប់»។ កងទ័ពក៏បានបញ្ជា​ឲ្យ​បាតុករទាំងសងខាង ដែលមានវត្តមាននៅក្នុងរាជធានីបាងកក តាំងពីច្រើនសប្ដាហ៍មកហើយ ឲ្យវិលត្រឡប់​ទៅ​ផ្ទះវិញ។ ពួកគេត្រូវបានហាមឃាត់ ពីរាល់ការជួបជុំនយោបាយ ដែលមានចំនួនលើសពីប្រាំនាក់។

របបដឹកនាំថ្មី ក្រោមឈ្មោះហៅថា «ក្រុមប្រឹក្សាជាតិដើម្បីថែរក្សាសន្តិភាព និងសណ្ដាប់ធ្នាប់» ដែលចេញពីកងទ័ព​នេះ បានប្រកាសព្យួររដ្ឋធម្មនុញ្ញថៃ តែបានសម្រេចទុកនូវព្រឹទ្ធសភាថៃ ក្រោមហេតុផលដើម្បីដឹកនាំប្រទេស តាម«សម្រួល»៕