«ឥលូវនេះ គេនិយមតែការបង្រ្កាបអញ្ចឹង មិនពូកែខាងពន្យល់ទេ!» នេះជាការយល់ឃើញ របស់លោកបណ្ឌិត ឡៅ ម៉ុងហៃ បង្ហាញពីការកត់សម្គាល់របស់លោក ក្នុងពេលកន្លងមក ដែលតែងតែមានការបង្រ្កាប ទៅលើប្រជាពលរដ្ឋ​ ពេលមានការជួបជុំ​សម្តែងមតិម្ដងៗ។

ក្រុមសន្តិសុខបិទមុខ ត្រូវបានយកមកពង្រាយ នៅក្បែរទីលានប្រជាធិបតេយ្យ ថ្ងៃទី០១ ខែឧសភា ឆ្នាំ២០១៤។ (រូបថត MONOROOM.info/ C. Nita)

ការបង្រាប - លោក ឡៅ ម៉ុងហៃ អ្នកឃ្លាំងមើលស្ថានការ និងវិភាគសង្គម-នយោបាយឯករាជ្យ បានរិះគន់ទៅលើ​ក្រុមសមត្ថកិច្ចចម្រុះ ដែលមានតួនាទីរក្សាសន្តិសុខសណ្តាប់ធ្នាប់សង្គមថា មិនបានប្រើមូលហេតុសមរម្យ និងសម​ហេតុ​ផលពន្យល់ ប្រាប់ដល់ក្រុមអ្នកតវ៉ានោះទេ។ ផ្ទុយទៅវិញ ក្រុមអាជ្ញាធរទាំងនោះ មិនមានឆន្ទះនឹង​ការដោះ​ស្រាយ​ដោយសន្តិវិធី តែគិតតែរកវិធីក្នុងការបង្រ្កាប។

ការថ្លែងខាងលើ បានធ្វើឡើងបន្ទាប់ពីអ្នកវិភាគឯករាជ្យល្បីឈ្មោះរូបនេះ បានទៅមើលស្ថានភាពផ្ទាល់ នៅក្រៅរបង​សាលាដំបូងរាជធានីភ្នំពេញ កាលពីថ្ងៃទី២០ ខែឧសភានេះ ជាពិសេសនៅពេលកំពុងមានការប៉ះទង្គិចគ្នា រវាងក្រុម​សមត្ថកិច្ចចម្រុះ ជាមួយប្រជាពលរដ្ឋ។

ការប្រើប្រាស់កម្លាំងបង្រ្កាបលើប្រជាពលរដ្ឋ ពីសំណាក់កងកម្លាំងអាជ្ញាធរ អ្នកវិភាគបញ្ហាសង្គមរូបនេះ ពន្យល់ថា៖ «មានន័យថា ខ្លួនឯងហ្នឹងអត់មានការទុកចិត្តលើខ្លួនឯង ឬក៏អត់មានមូលហេតុអ្វីត្រឹមត្រូវ ដើម្បីពន្យល់ឱ្យយល់ ឱ្យ​ស្របតាម ហើយមានការស្ងៀមស្ងាត់ ទុកឱ្យតុលាការធ្វើការកាត់ក្តី។ ហើយមួយវិញ ឆ្លុះបញ្ចាំងថាតុលាការខ្លួនឯង ធ្វើឱ្យប្រជាពលរដ្ឋមិនទុកចិត្ត។»

ខណៈពេល ដែលតុលាការកំពុងបើកសវនាកាទៅលើជនជាប់ចោទ២៣ ក្រុមអ្នកតវ៉ាបានប៉ះទង្គិចគ្នា ជាក្រុម​សមត្ថកិច្ច​ចម្រុះ ក្នុងពេលហាមឃាត់មិនឱ្យចូល ទៅក្នុងរបងហាមឃាត់។ ក្នុងការប៉ះគ្នានេះដែរ បានបណ្តាលឱ្យ​មនុស្សយ៉ាងហោចណាស់៦នាក់ បានរងរបួស ទាំងខាងក្រុមសន្តិសុខ និងប្រជាពលរដ្ឋរួមទាំងព្រះសង្ឃ។

ចំណែកក្រុមអ្នកគាំទ្រ ដែលរួមមានប្រជាពលរដ្ឋមកពីបឹងកក់ និងមជ្ឈដ្ឋានមួយចំនួនទៀត បាននាំគ្នាធ្វើពិធីបន់ស្រន់ តាមបែបព្រហ្មញ្ញសាសនា ដោយមានរៀបចំជាបាយសី កញ្ច្រែងមានដាក់ផ្កាជាច្រើនគូរ និងមាន់ងាប់មួយគូរ ដាក់​តំរៀនៅមុខសាលាដំបូងរាជធានីភ្នំពេញ ដើម្បីឲ្យវត្ថុស័ក្កិសិទ្ធិជួយបន្ទន់ចិត្តឱ្យតុលាការ និងបន់ស្រន់សុំឱ្យ​តុលាការ​ជំនុំជម្រះដោយឯករាជ្យ និងដោះលែងជនជាប់ចោទទាំង២៣នាក់ដោយគ្មានលក្ខខណ្ឌ។ ក្រុមអ្នកគាំទ្រខ្លះបាន​ស្លៀក​ក្បិន សៀតផ្កាចំប៉ីនៅត្រចៀក ដែលមានចងក្រណាត់ក្រមមនៅលើក្បាល សរសេរអក្សរដោះលែង២៣នាក់ ឬដាក់រូបជញ្ជីងយុត្តិធម៌ ដើម្បីធ្វើយ៉ាងណាទាមទារឲ្យតុលាការផ្តល់ភាពយុត្តិធម៌ ដល់ជនត្រូវចោទទាំងនោះ៕