អាមេរិក៖ កូន​ស្រី​ភ្លោះ​សម្លាប់​​ម្ដាយ​ខ្លួន​ឯង ព្រោះ​ប្រដៅ​កុំ​ឲ្យ​​ទៅ​រៀន​យឺត

បងប្អូនស្រីពីរនាក់ ត្រូវបានតុលាការកាត់ទោស ឲ្យជាប់ពន្ធនាគារ ៣០ឆ្នាំ ពីបទមនុស្សឃាត«សម្លាប់ម្ដាយខ្លួនឯង​បង្កើត» ដោយសារតែកើតចេញពីហេតុការណ៍ទាស់សម្ដីគ្នាបន្តិចបន្តួច ទាក់ទងនឹងការទៅសាលារៀនយឺត។ នៅក្នុង​វីដេអូ ដែលបានផ្សាយ នៅក្នុងសប្ដាហ៍កន្លងមកនេះ បងប្អូនស្រីទាំងពីរ បានរៀបរាប់ឡើងវិញ ពីហេតុការណ៍ដ៏​រន្ធត់​នេះ ថាបានកើតឡើងរបៀបម៉េច។
Loading...
  • ដោយ: សុបិន្ដ ដោយ សុបិន្ត (ទាក់ទងង៖ [email protected]) - ម៉ុងរ៉េអាល់ ថ្ងៃទី១៨ ឧសភា ២០១៤
  • កែប្រែចុងក្រោយ: May 18, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

បងប្អូនស្រីពីរនាក់ ត្រូវបានតុលាការកាត់ទោស ឲ្យជាប់ពន្ធនាគារ ៣០ឆ្នាំ ពីបទមនុស្សឃាត«សម្លាប់ម្ដាយខ្លួនឯង​បង្កើត» ដោយសារតែកើតចេញពីហេតុការណ៍ទាស់សម្ដីគ្នាបន្តិចបន្តួច ទាក់ទងនឹងការទៅសាលារៀនយឺត។ នៅក្នុង​វីដេអូ ដែលបានផ្សាយ នៅក្នុងសប្ដាហ៍កន្លងមកនេះ បងប្អូនស្រីទាំងពីរ បានរៀបរាប់ឡើងវិញ ពីហេតុការណ៍ដ៏​រន្ធត់​នេះ ថាបានកើតឡើងរបៀបម៉េច។


បងប្អូនភ្លោះត្រកូល វ៉ាយហៀដ ទាំងពីរនាក់។ (រូបថតនគរបាលអាមេរិក)

មោហ៍បាំង - នៅពេលដែលទំនាស់សំដីគ្នាបន្តិចបន្តួច បានក្លាយជាឃាតកម្ម ...។ បងប្អូនស្រីភ្លោះពីរនាក់ បាន​សម្លាប់​ម្ដាយបង្កើតខ្លួនឯង បន្ទាប់ពីស្ត្រីជាម្ដាយបានធ្វើការប្រៀនប្រដៅ កូនស្រីជំទង់របស់ខ្លួន ដែលតែងតែទៅ​សាលារៀន​យឺតពេល ដោយសារសឹងតែជារៀងរាល់ព្រឹកៗ យុវតីទាំងពីរនាក់បងប្អូន មានទម្លាប់​មួយមិនចង់​ងើប​ពីគ្រែ។

ហេតុការណ៍នេះបានកើតឡើង នៅក្នុងក្រុង ខនវ័រ (Conyers) ដែលជាទីប្រជុំជនតូចមួយ នៅក្នុងរដ្ឋ ជ័រចា (Georgia) ផ្នែកអាគ្នេយ៍នៃសហរដ្ឋអាមេរិក។ យុវតីវ័យ១៦ឆ្នាំទាំងពីរូប ត្រូវបានតុលការផ្ដន្ទាទោសកាលពីខែមករាកន្លងទៅ ឲ្យ​ជាប់ពន្ធនាគារក្នុងម្នាក់ៗ៣០ឆ្នាំ ពីបទមនុស្សឃាតដោយ«ចេតនា»។ ប៉ុន្តែព្រឹត្តិការណ៍ដ៏រន្ធត់នេះ បានវិលត្រឡប់​មក​លងសហរដ្ឋអាមេរិកសារជាថ្មីទៀត នៅក្នុងការចុះផ្សាយរបស់សារព័ត៌មានធំៗ បន្ទាប់ពីក្មេងស្រីទាំងពីរនាក់បងប្អូន កាលពីសប្ដាហ៍មុន បានសារភាពរៀបរាប់ពីដំណើររឿង ដែលនាំឲ្យបងប្អូនភ្លោះទាំងពីរនាក់ សម្រេចចិត្តសម្លាប់ម្ដាយ​របស់ខ្លួន។

នៅព្រឹកថ្ងៃមួយ ក្នុងខែមករាឆ្នាំ២០១០ បន្ទាប់ពីបាននៅតំអក់នៅលើគ្រែរបស់ខ្លួន សឹងតែដូចរាល់មួយដង បងប្អូនស្រី​ត្រកូល វ៉ាយហៀដ (Whitehead) ដែលមានឈ្មោះ ចាមីយ៉ាដ (Jasmiyah) និងតាមីយ៉ាដ (Tasmiyah) ទាំងពីរនាក់ បានភ្ញាក់ឡើង ហើយពួកនាងបានចុះទៅក្រោម ក៏ស្រាប់តែបានជួបសម្ដីជាមួយម្ដាយរបស់ខ្លួន អ្នកស្រី ចាមេកា (Jarmecca) អាយុ៣៤ឆ្នាំ ដែលបានបន្តឿនពួកនាងឲ្យរហ័សរហួនឡើង ព្រោះខ្លាចទៅសាលារៀនយឺតពេល។ រំពេច​នោះ ការតម្លើងសម្លេងបានកើតឡើង។

ចាមីយ៉ាដ បាននិយាយថា៖ «គាត់បានកាន់ខ្ទះឆាមួយ ពីចង្ក្រានមក។ ខ្ញុំគិតថាគាត់ចង់យកវា មកវាយពួក​យើង។»

នៅពេលដែលម្ដាយខ្លួនបានបែរខ្លួន យកកាំបិតចុងស្រួចមួយទៀត ចេញទៅទុកដាក់នៅកន្លែងដើមរបស់វាវិញ ពួក​នាងបានកញ្ឆក់ខ្ទះឆាពីដៃម្ដាយ ហើយឈុតឆាកប្រតាយប្រតប់គ្នាបានផ្ទុះឡើង។ ចាមីយ៉ាដ បានកញ្ឆក់បានថូផ្កាមួយ​ពីក្នុងបន្ទប់ទទួលភ្ញៀវ ហើយបានវាយពេញមួយទំហឹងទៅលើក្បាល និងសំពងជាច្រើនដងទៅលើ​ដើមទ្រូងរបស់​ម្ដាយ។ នៅពេលដែលម្ដាយរូបនោះ ងើបឡើងមកវិញ ហើយព្យាយាមប្រតាយប្រតប់ជាថ្មីជាមួយនាង (ចាមីយ៉ាស) ប្អូនស្រីរបស់នាង តាមីយ៉ាស បានយកកាំបិត ចាក់ទៅលើស្ត្រីចំណាស់ជាច្រើនដង។

យកទៅបង្ហើយ ដោយជ្រមុជទឹក ...

ចាមីយ៉ាស បានរំលឹកឡើងវិញថា៖ «នៅពេលនោះ វាលែងជាការបោកចំបាប់ធម្មតាមួយហើយ តែវាបានក្លាយ​ទៅជា​រឿងស្លាប់រស់»។

បន្ទាប់មក ចាមីយ៉ាស បានយកច្រវាក់បន្តោងខ្សែកខ្លួន មករឹតក ម្ដាយរបស់ខ្លួន​ រហូតដល់ស្ត្រីរងគ្រោះលែង​កម្រើក។ ពួក​នាង​បាន​យករូបកាយរបស់ម្ដាយ ទៅជ្រមុជទឹកក្នុងចានងូតទឹករហូតទាល់តែដាច់ខ្យល់  មុននឹងយកសាក​សព​នេះ ទៅដាក់ចោល​នៅលើគ្រែក្នុងបន្ទប់គេងរបស់ម្ដាយ។ ចំណាក់ការបន្ធូរកំហឹង បានដល់ទីបញ្ចប់ រីឯពួកនាង​ទាំង​ពីរ​ក៏បានប្រញាប់ប្រញាលស្លៀកពាក់ ទៅសាលារៀនធ្វើដូចជាគ្មានរឿងអ្វីកើតឡើងទាំងអស់ រហូតលុះដល់ពេល​នាង​ត្រឡប់មកផ្ទះវិញ ទើបទូរស័ព្ទហៅនគរបាល រាយការណ៍ពីមរណភាពរបស់ម្ដាយរបស់ខ្លួន។

អស់រយៈពេលជាច្រើនខែ បងប្អូនស្រីទាំងពីរនាក់ នៅតែអះអាងថា ពួកនាងបានឃើញសពម្ដាយ តែនៅពេល​ដែល​ពួកនាងបានត្រឡប់មកពីសាលាវិញប៉ុណ្ណោះ ហើយថា ពួកនាងមិនជាប់ពាក់ព័ន្ធអ្វីឡើយទៅនឹងឃាតកម្ម ឬការស្លាប់​របស់ម្ដាយនេះឡើយ។ ប៉ុន្តែការអះអាងនេះ មិនត្រូវបានក្រុមអ្នកស៊ើបអង្កេតជឿនោះទេ។

បន្ទាប់ពីត្រូវបានឃាត់ខ្លួនពីបទមនុស្សឃាត និងដើម្បីគេចផុតពីការកាត់ទោសដោយតុលាការជាន់ខ្ពស់ ដែលពួក​នាងអាចប្រឈមនឹងទោសប្រហារជីវិតនោះ ពួកនាងបានសារភាពទោសកំហុសនៅពេលបន្ទាប់មក ហើយបាន​ទទួលយកទោស៣០ឆ្នាំ នៅក្នុងពន្ធនាគារ។

ចាមីយ៉ាស បាននិយាយនៅចុងបញ្ចប់ថា៖ «ខ្ញុំមិនបានស្អប់គាត់ទេ ហើយតាមីយ៉ាសក៏អញ្ចឹងដែរ។ តែហេតុការណ៍ បានកើតឡើងដោយមោហ៍បាំង បណ្ដាលមកពីកំហឹង ដែលកើតមានរវាងយើងទាំងបីនាក់។»៕

សូមទស្សនាវីដេអូ នៃសម្ដីសារភាពរបស់ពួកនាង ដែលត្រូវបានកាសែតធំៗ របស់អាមេរិកយកមកផ្សព្វផ្សាយ៖


រូបថតម្ដាយ អ្នកស្រី ចាមេកា។


រូបថតម្ដាយនិងកូន តាំងពីនៅតូចៗ។


កូនទាំងពីរ នៅពេលមានវ័យជំទង់

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...