បក្សសង្រ្គោះជាតិ អំពាវនាវឲ្យជួយចិនដែលភៀសខ្លួនពីវៀតណាម
ក្រោមហេតុផលមនុស្សធម៌ គណបក្សសង្រ្គោះជាតិ ដែលជាគណបក្សជំទាស់ធំជាងគេនៅកម្ពុជា បានធ្វើការអំពាវនាវជាផ្លូវការ ដល់ពលរដ្ឋកម្ពុជា ឲ្យជួយជ្រោមជ្រែង តាមលទ្ធភាព ដល់ជនជាតិចិនដែលភៀសខ្លួន ពីអំពើហិង្សានៅប្រទេសវៀតណាម ចូលមកកម្ពុជា។
បណ្ដាជនវៀតណាមច្រើនពាន់នាក់ បានធ្វើបាតុកម្មប្រឆាំងចិនកាលពីថ្ងៃ១១ ខែឧសភា ឆ្នាំ២០១៤។ (រូបថត REUTERS/Kham)
---------------------
ដោយ អ៊ំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៦ ឧសភា ២០១៤
---------------------
ជនភៀសខ្លួន - «គណបក្សសង្រ្គោះជាតិ សង្ឃឹមលើសន្តានចិត្តសប្បុរសធម៌ និងមនុស្សធម៌របស់បងប្អូនជនរួមជាតិ ដែលតែងតែមានមេត្តាធម៌ ករុណាធម៌ និងចេះជួយសម្រាលទុក្ខធុរៈ និងយកអាសាគ្នា ក្នុងគ្រាមានអាសន្ន ដោយមិនប្រកាន់ជាតិសាសន៍អ្វីឡើយ»។ នេះជាការបញ្ជាក់ ក្នុងសេចក្តីអំពាវនាវ ដែលបានបង្ហោះឡើង នៅលើគេហទំព័រគណបក្ស និងនៅលើទំព័រហ្វេសប៊ុក ផ្លូវការរបស់លោកសម រង្ស៊ី ប្រធានគណបក្សសង្រ្គោះជាតិ នៅថ្ងៃទី១៦ ខែឧសភា ឆ្នាំ២០១៤ នេះ។
ក្នុងសេចក្តីអំពាវនាវដដែលនោះ បានពន្យល់ថា បងប្អូនជនរួមជាតិអាចជួយយកអាសាដល់ជនជាតិដើមកំណើតចិន ដែលកំពុងភៀសខ្លួនគេចចេញពីអំពើហិង្សា ដែលកើតឡើងដោយសារភាពតានតឹង បណ្តាលមកពីជម្លោះ លើដែនសមុទ្រ រវាងប្រទេសចិននិងវៀតណាម ទៅតាមលទ្ធភាព ដូចជាជួយផ្តល់ជម្រកស្នាក់នៅ ម្ហូបអាហារ ថ្នាំពេទ្យជាដើម សម្រាប់ជួយសម្រាលបន្ទុក ដែលជនភៀសខ្លួនទាំងនោះ មកជ្រកកោននៅក្នុងប្រទេសកម្ពុជា។
កំណត់ទូតចិនមកក្រសួងការបរទេសកម្ពុជា
សេចក្តីអំពាវនាវរបស់គណបសង្រ្គោះជាតិ ត្រូវបានគេកត់សម្គាល់ឃើញថា គឺបានធ្វើឡើងតែមួយថ្ងៃប៉ុណ្ណោះ ក្រោយក្រសួងការបរទេស របស់ប្រទេសចិន បានផ្ញើកំណត់ទូតមកក្រសួងការបរទេសកម្ពុជា ដោយស្នើ ឲ្យភាគីកម្ពុជា ជួយសម្រួល និងថែរក្សាសុវត្ថិជនជាតិចិន មានទាំងអ្នកទេសចរណ៍ និងពាណិជ្ជករជាដើម ដែលបានភៀសខ្លួនគេចពី អំពើហិង្សា មនោសញ្ចេតនាជាតិនិយម នៅប្រទេសវៀតណាម។
កុបកម្មតាំងពីថ្ងៃទី១៣ ខែឧសភា មក នៅក្នុងប្រទេសវៀតណាម ដែលកើតចេញពីមនោសញ្ចេតនាជាតិនិយម លើដែនអធិបតេយ្យភាព រវាងចិន និងវៀតណាម នៅតំបន់សមុទ្រចិនខាងត្បូង បានបង្កឲ្យមានការខូចខាតយ៉ាងធ្ងន់ធ្ងរ ទាំងអាយុជីវិតមនុស្ស និងទ្រព្យសម្បត្តិ។ ហេតុការណ៍នោះ បានធ្វើឲ្យអ្នកវិនិយោគ កម្មករនយោជិក និងអ្នកទេសចរណ៍ចិន ជាច្រើនរយនាក់ បានចាកចេញពីវៀតណាម ភៀសខ្លួនមកជ្រកកោន នៅក្នុងប្រទេសកម្ពុជា។
លោកកុយ គួង អ្នកនាំពាក្យក្រសួងការបរទេសកម្ពុជា នៅរសៀលថ្ងៃទី១៦ ខែឧសភាបានថ្លែងប្រាប់ សារព័ត៌មានក្នុងស្រុកមួយថា ស្ថានទូតចិនបានធ្វើកំណត់ទូត មកក្រសួងការបរទេសកម្ពុជា ដោយបានផ្តោតទៅលើ បញ្ហាសុវត្ថិភាពរបស់ជនជាតិចិនទាំងនោះ ក៏ប៉ុន្តែកម្ពុជាបានចាត់វិធានការនេះរួចហើយ មុននឹងកំណត់ស្ថានទូតចិនផ្ញើមកដល់កម្ពុជា កាលពីព្រឹកថ្ងៃទី១៦ ខែឧសភា។
លោកបានបន្តថា ភាគីកម្ពុជាបានជួយសម្រួលដល់ការឆ្លងកាត់ របស់ជនជាតិចិនពីវៀតណាមមកកម្ពុជា ដោយផ្អែកទៅលើមូលដ្ឋានមនុស្សធម៌។ មិនត្រឹមតែប៉ុណ្ណោះ សមត្ថកិច្ចកម្ពុជា ក៏នឹងខិតខំការពារសុវត្ថិភាព ដល់ស្ថានទូតចិនប្រចាំកម្ពុជាផងដែរ។
យ៉ាងណាក៏ដោយ អ្នកនាំពាក្យរដ្ឋាភិបាលកម្ពុជា និងជារដ្ឋលេខាធិការទីស្ដីការគណរដ្ឋមន្ត្រី លោក ផៃ ស៊ីផាន ក្នុងកិច្ចសម្ភាសជាមួយទស្សនាវដ្ដីមនោរម្យ.អាំងហ្វូ បានបញ្ជាក់ថា កម្ពុជាប្រកាន់ជំហរអព្យាក្រិត្យ ចំពោះជម្លោះរវាងប្រទេសចិន និងប្រទេសវៀតណាម និងជម្លោះផ្សេងៗទៀតនៅជុំវិញពិភពលោក៕