កម្ពុជា ក្នុងជំហានឆ្ពោះទៅទទួលយកជនភៀសខ្លួន ពីអូស្ត្រាលី
ប្រទេសកម្ពជា អាចនឹងក្លាយខ្លួនជាប្រទេសទីបី ដែលយល់ព្រមទទួលយក ឲ្យមករស់នៅលើទឹកដីរបស់ខ្លួន នូវជនភៀសខ្លួន ដែលធ្វើដំណើរចូលក្នុងប្រទេសអូស្ត្រាលី ដោយខុសច្បាប់។ រដ្ឋាភិបាលកម្ពុជាបានលើកឡើង ពីការឆ្លើយទទួលយល់ព្រម តបទៅនឹងការស្នើសុំរបស់ប្រទេសអូស្ត្រាលី បើទោះជាសង្គ្រាមពាក្យសម្ដីនៅសប្ដាហ៍ចុងក្រោយ រិះគន់យ៉ាងខ្លាំងក្លាពីគម្រោងការនេះ ដោយគេបានចាត់ទុកថា ប្រទេសកម្ពុជានៅតែស្ថិតក្នុងចំណោមប្រទេស ដែលក្រីក្រជាងគេក្នុងពិភពលោកនៅឡើយ។
រូបថតផ្តិតពីវីដេអូទូរទស្សន៍អូស្ត្រាលី ដែលបង្ហាញពីនាវាដឹកជនភៀសខ្លួន បែកធ្លាយនៅជិតឆ្នេររបស់ប្រទសនេះ។
ជនភៀសខ្លួន - រដ្ឋលេខាធិការក្រសួងការបរទេសរបស់ប្រទេសកម្ពុជា លោក អ៊ុច បូររិទ្ធ បានប្រកាសប្រាប់អ្នកសារព័ត៌មានកាលពីថ្ងៃអង្គារ ទី២៩ ថា ជាគោលការណ៍ រដ្ឋាភិបាលកម្ពុជា ទទួលយកសំណើរបស់អូស្ត្រាលី យោងទៅតាមលក្ខខណ្ឌអន្តរជាតិ។ លោកបានពន្យល់ទៀតថា រដ្ឋាភិបាលកម្ពុជា បានយល់ព្រមតាមសំណើរបស់រដ្ឋមន្ត្រីការបរទេសអូស្ត្រាលី អ្នកស្រី ជូលី ប៊ីហ្សប (Julie Bishop) កាលពីខែកុម្ភៈ ទទួលយកជនភៀសខ្លួន ដែលត្រូវបានចាប់ខ្លួនឃុំឃាំងនៅពេលពួកគេព្យាយាម ទៅសុំសិទ្ធិជ្រកកោននៅប្រទេសអូស្ត្រាលី។
ប៉ុន្តែយ៉ាងណាក៏ដោយ ភ្លើងខៀវនៅមិនទាន់ឲ្យសញ្ញា ពីសំណាក់រដ្ឋាភិបាលក្រុងភ្នំពេញនៅឡើយ ដោយគណៈកម្មការសិក្សាសំនុំរឿងមួយ កំពុងធ្វើការពិនិត្យមើលលំអិត អំពីកិច្ចសន្យាទទួលយកជនភៀសខ្លួនទាំងនោះ។ មន្ត្រីរដ្ឋាភិបាល បានអះអាងពី កាយវិការ«មនុស្សធម៌»របស់ខ្លួន នៅក្នុងបញ្ហានេះ ដោយមិនមានជាប់ពាក់ព័ន្ធទៅនឹងការដោះដូរ ណាមួយឡើយ។
គោលជំហររបស់រដ្ឋាភិបាលកម្ពុជា បានបង្កឲ្យមានមន្ទិលខ្លាំងក្លា ពីសំណាក់ក្រុមមន្ត្រីសង្គមស៊ីវិល ដែលធ្វើការស្និតនឹងវិស័យសិទ្ធិមនុស្ស។ លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌសិទ្ធិមនុស្សកម្ពុជា ធ្លាប់បានពន្យល់ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១១ មេសា កន្លងមកនេះថា អូស្រ្តាលីមិនគួរពិចារណាយកប្រទេសកម្ពុជា ជាគោលដៅជនភៀសខ្លួននោះទេ។ លោកស្រីនិយាយថា៖ «បើមើលបទពិសោធន៍ និងស្ថានភាពសិទ្ធិមនុស្ស អូស្រ្តាលីល្អជាងកម្ពុជា ហើយនៅពេលដែលមានជនភៀសខ្លួនឆ្លងកាត់ប្រទេសកម្ពុជា ដើម្បីទៅរកប្រទេសទីបី រដ្ឋាភិបាលកម្ពុជាតែងតែបញ្ជូនពួកគេទៅវិញ ដោយមិនគោរពសិទ្ធិពួកគេ។ មានដូចជនជាតិម៉ុងតាញ្ញ៉ា ទៅវៀតណាម និងអុយហ្គើរបញ្ជូនត្រលប់ទៅចិន ហើយរបៀបជាថ្នូរត្រលប់មកវិញ។»
មន្ត្រីម្នាក់ទៀត លោក អ៊ូ វីរះ ដែលបច្ចុប្បន្នជាប្រធានក្រុមប្រឹក្សាភិបាល នៃមជ្ឈមណ្ឌលសិទ្ធិមនុស្សកម្ពុជា ក៏បានសម្ដែងភាពមិនពេញចិត្ត ក្នុងសំនុំរឿងនេះដែរ ដោយលោកបានដាក់ការទទួលខុសត្រូវ ទៅលើរដ្ឋាភិបាលនៃប្រទេសអូស្ត្រាលីច្រើនជាង។ លោកថា៖ «នៅពេលដែលទម្លាក់ ការទទួលខុសត្រូវនេះ មកលើប្រទេសកម្ពុជា ប្រទេសអូស្ត្រាលីដែលជាប្រទេសអ្នកមានជាងនោះ កំពុងក្លាយខ្លួនទៅជាប្រទេស ដែលមិនបានបំពេញភារកិច្ចរបស់ខ្លួន ឲ្យបានត្រឹមត្រូវ»។
អ្វីដែលគេលើកជាសំណួរ មកចោទសួរជាបន្តមកទៀតនោះ ថាតើជនភៀសខ្លួនណាខ្លះ ដែលត្រូវទទួលឲ្យមករស់នៅក្នុងប្រទេសកម្ពុជា? តើជនភៀសខ្លួនទាំងនោះ ត្រូវរស់នៅក្នុងជំរុំមួយបិទជិត ឬត្រូវរស់នៅដោយសេរីនៅពេញផ្ទៃប្រទេស? តើជនទាំងនោះនឹងមានសិទ្ធរស់នៅ ប៉ុន្មានឆ្នាំ? ហើយសំណួរដែលសំខាន់នោះ សួរថា តើតម្លៃនៃការដោះដូរ បញ្ជូនមកនេះ នឹងអាចមានដល់កម្រិតណា?
-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី០១ ឧសភា ២០១៤