វន់ ពៅ និងជន២០នាក់ ត្រូវបានបញ្ជូនមកដល់ភ្នំពេញ
ប្រធានសមាគមប្រជាធិតេយ្យឯករាជ្យ នៃសេដ្ឋកិច្ចក្រៅប្រព័ន្ធលោកវន់ ពៅ និងជន២០នាក់ផ្សេងទៀត បានបញ្ជូនមកដល់រាជធានីភ្នំពេញហើយ ដើម្បីរង់ចាំងការបើកសវនាការថ្ងៃទី២៥ ខែមេសា ឆ្នាំ២០១៤។
អាគារសាលាដំបូងរាជធានីភ្នំពេញ ក្នុងទីតាំងថ្មី។ (រូបថត ឯកសារ)
សិទ្ធិ - «ជាការពិតហើយអ្នកទាំង២១នាក់នោះ បានបញ្ជូនពីពន្ធនាគារទៅភ្នំពេញ តាំងពីម៉ោងប្រាំមួយព្រឹក ហើយឥឡូវទៅដល់ភ្នំពេញហើយ។ ហើយការបញ្ជូននេះ ដើម្បីរង់ចាំសវនាការតុលាការរាជធានីភ្នំពេញថ្ងៃទី២៥ មេសា»។ នេះជាការថ្លែងរបស់លោក គា សុវណ្ណ ប្រធានពន្ធនាគារត្រពាំងផ្លុងខេត្តកំពង់ចាម ដល់ទស្សនាវដ្តីមនោរម្យ.អាំងហ្វូ នៅថ្ងៃទី២៣ ខែមេសា ឆ្នាំ២០១៤ នេះ។
ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធលោក វន់ ពៅ និងកម្មករ២០នាក់ផ្សេងទៀត ត្រូវបានកម្លាំងសមត្ថកិច្ចចម្រុះចាប់ខ្លួន ក្នុងហេតុការណ៍ប៉ះទង្គិចគ្នារវាងកម្មករ និងកម្លាំងសមត្ថកិច្ចចម្រុះ នៅពេលដែលកម្មករធ្វើបាតុកម្មទាមទារដំឡើងប្រាក់ឈ្នួលគោលដល់កម្មករ ១៦០ដុល្លារ ក្នុងមួយខែ កាលពីថ្ងៃទី០២ និងទី០៣ ខែមករា ឆ្នាំ២០១៤ នៅមុខរោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង។
គិតពីពេលចាប់ខ្លួននោះ រហូតមកដល់ពេលនេះលោកវន់ ពៅ និងមនុស្ស២០នាក់ទៀត ត្រូវបានឃុំខ្លួននៅពន្ធនាគារត្រពាំងផ្លុង អស់រយៈពេលជាង៣ខែមកហើយ។ បើទោះជាមានគណបក្សជំទាស់ អង្គការសង្គមស៊ីវិលជាតិ និងអន្តរជាតិ និងមេធាវីលោកវន់ ពៅ ស្នើដល់តុលាការឲ្យដោះលែងលោកវន់ ពៅ ឬអនុញ្ញាតឲ្យនៅក្រៅឃុំ ជាបណ្ណោះអាសន្នក៏ដោយ ក៏តុលាការដែលផ្អែកលើសំអាងច្បាប់នៅតែបន្តឃុំលោកវន់ ពៅ និងជនទាំង២០នាក់រហូតដល់ពេលនេះ។
ចំពោះសវនាការរបស់សាលាតំបូងរាជធានីភ្នំពេញ នៅថ្ងៃទី២៥ មេសា ខាងមុខនេះភរិយាលោកវន់ ពៅ លោកស្រីប្រាក់ សុវណ្ណារី បានលើកឡើងថា៖ «ជាក់ស្តែងស្វាមីខ្ញុំគ្រាន់តែជួយសម្របស្រួលដល់កម្មករ ដើម្បីទាមទារប្រាក់ឈ្នួល តែគេបែជាចាប់គាត់ដាក់ក្នុងពន្ធនាគារ។ នោះមានន័យថា តុលាការខែ្មរស្ថិតនៅក្រោមគំនាបនរណាម្នាក់។ មនុស្សមានទោសធ្ងន់ធ្ងរប៉ុណ្ណា ក៏គេឲ្យព្យាបាលសិនដែរ តែស្វាមីខ្ញុំអត់ខុសអីសោះ គេអត់ឲ្យព្យាបាល៕»
-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៣ មេសា ២០១៤