អតីតមន្ត្រីសហជីពដែលត្រូវគេបណ្ដេញចេញ លោក អ៊ុំ វិសាល បានប្រតិកម្មឆ្លើយតបទៅនឹងការលើកឡើង ដែលថា​លោក និងអ្នកស្រី រឿន ចាន់ថន បានប្តឹងចង់ឲ្យបិទសហជីពស៊ីខៅឌូ ដោយបានហៅការលើកឡើងទាំងនោះ ថាជា​ការចោទប្រកាន់ ដើម្បីបំពុលបរិយាកាសអារម្មណ៍របស់កម្មករ។ ប៉ុន្តែអតីតស្ថាបនិកសហជីពស៊ីខៅឌូរូបនេះ បាន​អះអាងថា លោកចង់បង្កើតគណកម្មការមួយ ដើម្បីដឹកនាំសហជីពនេះជាបណ្ដោះអាសន្នសិន។

លោក អ៊ុំ វិសាល អតីតមន្ត្រីស្ថាបនិកសហជីព ដែលត្រូវបានសហជីពបណ្ដេញចេញ នៅមុខសាលាដំបូងរាជធានី ថ្ងៃទី២១ ខែមេសា ឆ្នាំ២០១៤។ (រូបថត MONOROOM.info/ C. Nita)

ជម្លោះផ្ទៃក្នុង - សេចក្តីប្រកាសពត៌មាន របស់សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខៅឌូ ក៏ដូចជាលោក សៀង យ៉ូត មន្រ្តីច្បាប់ទទួលបន្ទុកផ្នែកដោះស្រាយវិវាទរបស់សហជីព បានអោយដឹងថា ដីការរបស់តុលាការសាលាដំបូង កោះហៅលោក អាត់ ធន់ លោក ឯក សុភក្តី និងលោក គង់ អាទិត្យ នៅព្រឹក​ថ្ងៃ​ទី២១ ខែមេសានេះ គឺដើម្បីបំភ្លឺរឿងទាក់ទងការប្តឹងរក្សា សុំដីការពីតុលាការដើម្បីផ្អាក (បិទអង្គភាព) សកម្មភាព​សម្ព័នសហជីពប្រជាធិបតេយ្យកម្មករកាត់ដេរកម្ពុជា និងឱ្យលោក អ៊ុំ វិសាល និងអ្នកស្រី រឿន ចាន់ថន ធ្វើជា​ថ្នាក់​ដឹកនាំជំនួស។

ការអះអាងនេះ ត្រូវបានលោក អ៊ុំ វិសាល និងអ្នកស្រី រឿន ចាន់ថន បដិសេធថា ពួកគេមិនប្តឹងបិទសហជីព​ស៊ីខៅឌូ​នោះ នោះគ្រាន់តែជាការចោទប្រកាន់របស់លោក អាត់ ធន់ ដើម្បីទាកទាញការចាប់អារម្មណ៍ និងទទួលការ​គាំទ្រពី​កម្មករតែប៉ុណ្ណោះ។

ថ្លែងនៅមុខសាលាដំបូងរាជធានីភ្នំពេញនៅព្រឹកថ្ងៃទី២១ ខែមេសា ឆ្នាំ២០១៤ នេះ អ្នកស្រី រឿន ចាន់ថន អតីត​ស្ថាបនិក​ស៊ីខាវឌូ ដែលត្រូវបានបណ្តេញចេញដែរនោះ បានបញ្ជាក់ថា អ្នកស្រីមិនមែនប្តឹង ដើម្បីបិទសហជីព​ស៊ីខៅឌូនោះទេ តាមពិតការប្តឹងនេះ គ្រាន់តែចង់ឲ្យតុលាការសើរើទាក់ទងនឹងការកេងប្រវ័ញ្ច និងប្រព្រឹត្តិអំពើពុក​រលួយ​នៅកន្លែងហ្នឹងទេ។ រីឯការដែលលើកឡើងថា អ្នកស្រីប្តឹងបិទអង្គភាពនោះ ជាការបំវែរឿងរបស់លោក អាត់ ធន់ ដើម្បីទទួលបានការគាំទ្រពីខាងកម្មករ ព្រោះថាកម្មករដែលមកចូលរួមនៅថ្ងៃនេះ មានអ្នកខ្លះមិនដឹងរឿងអីទេ។

មន្រ្តីច្បាប់ទទួលបន្ទុក ផ្នែកដោះស្រាយវិវាទលោក សៀង យ៉ូត បានថ្លែងឱ្យដឹងទៀតថា ការបោះឆ្នោតកន្លងមក បានបង្ហាញលទ្ធផលមកគឺលោក អ៊ុំ វិសាល និងអ្នកស្រី រឿន ចាន់ថន បានធ្លាក់សម្លេងឆ្នោត អត់ជាប់ជាប្រធាន អនុប្រធាន ឬក៏លេខានោះទេ ហើយក៏គ្មានសិទ្ធិណាមួយធ្វើជាថ្នាក់ដឹកនាំដែរ។ តែផ្ទុយទៅវិញ អ្នកទាំងពីរនាក់នេះ​បែរ​ជាចោទថា អាត់ ធន់ គង់ អាទិត្យ ឯក សុភក្តី កេងប្រវ័ញ្ចលុយរបស់កម្មករនៅរោងចក្រអ៊ីហ្គាមិន ហើយយក​«លេស»ណ្នឹង ឱ្យតុលាការតែងតាំងពួកគេ ឲ្យមកធ្វើជាថ្នាក់ដឹកនាំសហជីពស៊ីខៅឌូ ជាបណ្តោះអសន្នរហូតមាន​ការដោះស្រាយចប់។

បកស្រាយទៅទៅលើបញ្ហានេះលោក អ៊ុំ វិសាល ប្រកាសថា៖ «ខ្ញុំសូមអះអាងថា ខ្ញុំមិនមែនចង់ដឹកនាំស៊ីខាវឌូទេ ប៉ុន្តែខ្ញុំចង់ឱ្យស៊ីខាវឌូធ្វើជាអង្គការមួយដូចដើម។ (..) ខ្ញុំចេញមុខ ដោយសារតែខ្ញុំជាស្ថានិករបស់ស៊ីខាវឌូ ជាអ្នក​ជាប់លេខរៀងទី៤នៃការបោះឆ្នោត អញ្ចឹងបើខ្ញុំមិនធ្វើតើអ្នកណាធ្វើ។ ក្នុងពេលដែលអ្នកទាំងបីនាក់នេះ ត្រូវបញ្ឈរ​ជើង ខ្ញុំត្រូវបង្កើតគណកម្មការមួយបណ្តោះអាសន្ន។»

លោកបន្ថែមថា លោកបានដាក់ពាក្យសុំរក្សាការពារ ប្រសិនបើតុលាការរកឃើញថា លោក អាត់ ធន់ លោក គង់ អាទិត្យ និងលោក ឯក សុភក្តី មានបទល្មើស ដូច្នេះពួកគេមិនអាចដឹកនាំស៊ីខៅឌូបានទេ។ ស៊ីខៅឌូ ត្រូវតែមាន​គណកម្មការបណ្តោះអាសន្នមួយ ដើម្បីធ្វើការដឹកនាំ ព្រោះពួកគាត់ទាំងបីស្ថិតនៅការស៊ើបអង្កេត អញ្ចឹងចាំបាច់​ត្រូវតែសុំដីការរក្សាការពារ។

ការលើកឡើងរបស់លោក អ៊ុំ វិសាល ត្រូវបានអ្នកច្បាប់មួយរូបស្និតនឹងសំនុំរឿង និយាយថា ជាការស្នើសុំដោយ​ខុសច្បាប់។ អ្នកច្បាប់ដែលនិយាយក្នុងលក្ខខណ្ឌមិនបញ្ចេញឈ្មោះ បានបញ្ជាក់ថា បើគ្រាន់តែក្រដាសបណ្ដឹង​មួយសន្លឹក ឡើងទៅតុលាការ ហើយតុលាការមិនទាន់សម្រេចវិន្និច្ឆ័យទោស និងសម្រេចទោសយ៉ាងណាផងនោះ ចុងចោទនឹងមិនត្រូវបានចាត់ទុកថា មានទោស និងគ្មានច្បាប់ណាមួយ ដែលតម្រូវឲ្យដកហូតតំណែង​កំពុងបំពេញ​ភារកិច្ច របស់​ចុង​ចោទនោះឡើយ។ ម្យ៉ាងទៀត លោក អ៊ុំ វិសាល ជាមន្ត្រីស្ថាបនិកដែលសហជីពបណ្ដេញចេញ​មួយរូប។ លោកអាចប្ដឹងទាស់ពីការបណ្ដេញចេញនេះ តែមន្ត្រីស្ថាបនិករូបនេះ គ្មានសិទ្ធិត្រឡប់ចូលមកកកូរកកាយ ផ្ទៃក្នុងសហជីពដែលមានលក្ខណៈ ដូចជាបុគ្គលខាងក្រៅមួយរូប ចូលមករំខានស្ថាប័នមួយយ៉ាងដូច្នេះឡើយ។ លោក អ៊ុំ វិសាល អាចធ្វើដឹងលឺរឿងផ្ទៃក្នុងរបស់សហជីពឡើងវិញបាន លុះត្រាណាតែតុលាការសម្រេចសេចក្ដីថា ការបណ្ដេញរូបលោកចេញពីសហជីព ក្នុងពេលកន្លងមក ជាការបណ្ដេញ«ខុសច្បាប់»៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី២១ មេសា ២០១៤